Yumi Lanem Samting Long Tok Blong God

?From Wanem God i Letem Fasin Nogud Mo Fasin Safa i Stap Long Wol?

Long haf ya i gat plante kwestin i stap. Maet yu tu yu wantem save ansa blong sam long ol kwestin ya. Haf ya bambae i soemaot weples yu save kasem ansa blong ol kwestin ya long Baebol blong yu. Ol Witnes blong Jehova oli glad blong storian wetem yu long saed blong ol ansa blong ol kwestin ya.

1. ?Fasin nogud i stat olsem wanem?

Fasin nogud i stat long wol ya taem Setan i giaman long Adam mo Iv. Taem God i mekem olgeta samting, Setan i wan gudfala enjel nomo. Hem i no gat fasin nogud. Be hem i no wantem “stap wetem olgeta we oli tok tru.” (Jon 8:44) Setan i wantem wan samting we hem i no gat raet blong kasem. Samting ya hemia wosip. Man i mas wosip long God nomo. Be Setan i wantem we man i wosip long hem. Ale hem i giaman long fas woman ya, Iv, mo i pulum Iv blong obei long hem i bitim we i obei long God. Adam tu i folem fasin blong Iv mo hem i no obei long God. Rod we Adam i jusum, i mekem we hem i safa mo i ded.—Ridim Jenesis 3:1-6, 17-19.

Taem Setan i pulum Iv blong no obei long God, hem i agensem hae rul blong God. Bighaf blong ol man long wol oli stap long saed blong Setan. Oli no wantem we God i rulum olgeta. Olsem nao, Setan i kam “masta blong wol ya.”—Ridim Jon 14:30; Revelesen 12:9.

2. ?Taem God i mekem olgeta samting, yu ting se sam long ol samting ya oli nogud?

Taem God i mekem ol man mo ol enjel fastaem olgeta, evriwan oli stret gud olgeta. Oli naf blong obei long olgeta samting we God i wantem olgeta blong mekem. (Dutronome 32:4, 5) God i letem yumi fri blong jusum sipos yumi wantem folem ol fasin we oli gud no yumi wantem folem ol fasin we oli nogud. Long rod ya nao yumi save soemaot sipos yumi lavem God tru no nogat.—Ridim Jemes 1:13-15; 1 Jon 5:3.

3. ?From wanem God i letem fasin safa i stap long wol?

Jehova i no spolem olgeta man we oli rebel agensem hae rul blong hem. ?From wanem? From we hem i wantem soemaot se ol man oli no save kasem gudfala samting taem oli stap aninit long narafala man bakegen. (Jeremaea 10:23) Naoia i mekem 6,000 yia finis we ol man nomo oli rulum man bakegen. Mo i klia se man i no naf blong rulum man from we oli no naf nating blong finisim olgeta faet long wol, oli no save blokem raf fasin, oli no save finisim fasin ya we man i ravem narafala man, mo oli no save finisim ol sik.—Ridim Prija 7:29; 8:9; Rom 9:17.

Be ol man we oli jusum God blong i lidim olgeta, oli gat wan gudfala laef. (Aesea 48:17, 18) I no longtaem bambae Jehova i finisim ol gavman we ol man oli stanemap. Ol man we oli jusum God blong i rulum olgeta, olgeta ya nomo bambae oli save stap long wol.—Aesea 2:3, 4; 11:9; ridim Daniel 2:44.

  4. ?From we God i gat longfala tingting, samting ya i givim janis long yumi blong mekem wanem?

Setan i talem se i no gat wan man nating we bambae i obei mo i holemstrong long Jehova oltaem. Taswe fasin ya we God i gat longfala tingting, i givim janis long yumi blong soemaot sipos yumi laekem moa we God i rulum yumi no yumi laekem moa we man i rulum yumi. Ol samting we yumi mekem long laef blong yumi oli soemaot se hu nao we yumi jusum blong i rulum yumi.—Ridim Job 1:8-11; Ol Proveb 27:11.

5. ?Yumi save mekem wanem blong soemaot we yumi jusum God blong i rulum yumi?

Baebol i soemaot wanem we yumi mas mekem blong wosipim God long fasin we i stret. Taem yumi traehad blong save ol fasin ya we oli stret, mo biaen yumi mekem laef blong yumi i laenap wetem ol fasin ya, yumi soemaot we yumi stap jusum God blong i rulum yumi. (Jon 4:23) Mo tu, yumi no joen long politik mo ol faet blong wol, olsem we Jisas tu i no joen long politik mo faet.—Ridim Jon 17:14.

Setan i yusum paoa blong hem blong pulum ol man blong mekem ol fasin we oli nogud. Hem i pulum ol man blong gat ol fasin we i spolem laef blong olgeta. Taem yumi sakemaot ol fasin nogud ya, maet sam fren mo famle blong yumi, oli jikim yumi mo maet oli agensem yumi. (1 Pita 4:3, 4) Long taem olsem, yumi mas jus. ?Bambae yumi stanap long saed blong ol man we oli lavem God no nogat? ?Bambae yumi obei long ol loa blong God we oli waes mo we oli soemaot se hem i lavem yumi? Sipos yumi jusum blong stanap long saed blong God mo yumi obei long hem, ale bambae yumi pruvum we Setan i giaman taem hem i talem se i no gat man we i wantem obei long God.—Ridim 1 Korin 6:9, 10; 15:33.

Blong save moa, lukluk japta 11 blong buk ya, we ol Witnes blong Jehova oli wokem.

[Tok blong pija long pej 22]

Adam i jusum rod blong fasin nogud

[Tok blong pija long pej 23]

Rod we yumi jusum i soemaot sipos yumi wantem we God i rulum yumi no nogat