Naoia i Gat Wajtaoa Long Inglis We i Isi Blong Ridim

MIFALA i glad blong talemaot se, stat long Wajtaoa blong Julae 15 long Inglis, bambae mifala i printim wan narafala Wajtaoa evri manis, long Inglis we i isi blong ridim. Bambae yumi traem samting ya blong wan yia fastaem. Long niufala Wajtaoa ya, bambae i gat ol haf blong stadi, wetem sam narafala haf sipos i gat naf ples. Mifala i ting se hemia bambae i givhan bigwan long plante Witnes blong Jehova. ?From wanem?

Ol Kristin brata blong yumi long plante kantri oli toktok Inglis, olsem long kantri blong Fiji, Gana, Kenya, Laeberia, Naejeria, Papua Niu Gini, mo Solomon Aelan. Nating se ol brata ya oli gat ol prapa lanwis blong olgeta, be plante taem oli yusum Inglis blong storian long ol narafala long ol miting mo long wok blong prij. Be Inglis we oli yusum i moa isi i bitim Inglis we i stap long ol buk blong yumi. Mo tu, i gat sam man blong Jehova we oli aot long kantri blong olgeta, oli go stap long ol kantri we ol man oli toktok Inglis. Ale, olgeta ya oli mas traehad blong toktok Inglis, nating se oli no save gud lanwis ya. Mo maet i no gat wan miting blong kongregesen we oli save go long hem long prapa lanwis blong olgeta.

Ol haf we yumi stadi long olgeta evri wik long Wajtaoa Stadi, oli bigfala rod blong yumi kasem ol save blong God we i olsem kakae long stret taem blong hem. Taswe, blong mekem se olgeta evriwan long miting oli save harem gud long ol kakae ya, niufala Wajtaoa ya i yusum ol isi wod nomo, mo i joejoenem ol wod ya long fasin we i isi blong ridim mo we oli ron gud. Fas pej long fored blong niufala Wajtaoa ya i defren long ol narafala magasin. Be ol smol stamba tok, ol paragraf, ol kwestin blong tingtingbak, mo ol pija long ol haf we yumi stadi long olgeta, oli laenap wetem narafala Wajtaoa we i stap kamaot oltaem. Ale evriwan oli save yusum wan long tufala Wajtaoa ya long taem blong Wajtaoa stadi. Sipos yu wantem skelem ol tok long tufala Wajtaoa ya, i gat wan eksampol daon. Hemia haf 2 blong fas stadi long magasin ya.

Mifala i wantem tumas se niufala magasin ya i ansa long prea blong plante man blong Jehova, we oli askem se: “Hae God. . . . Plis yu givim save long mi blong mi save lanem ol tok we yu yu putum.” (Sam 119:73) Mifala i gat strong tingting se, naoia olgeta we oli no save gud Inglis, wetem ol smol pikinini we oli toktok Inglis, bambae oli save rere gud from Wajtaoa Stadi evri wik. Yumi talem bigfala tangkiu long Jehova we i “lavem olgeta Kristin man,” from we hem i stap yusum “slef ya we i stret mo waes” blong givim fulap save long yumi we i olsem gudfala kakae.—1 Pita 2:17; Mat. 24:45, NW.

Hed Kampani Blong Ol Witnes Blong Jehova