Ol Stori Blong Hem Oli Tru
Ol Stori Blong Hem Oli Tru
“Mi mi stap luklukgud longtaem finis long olgeta samting ya, i stat long stat blong hem.”—LUK 1:3.
?BAEBOL I DEFREN OLSEM WANEM? Ol kastom stori oli no talem stret ples we ol samting i hapen, taem we i hapen, mo nem blong ol man we oli laef bifo. Be ol stori long Baebol oli talem klia ol samting ya. Ol man we oli ridim Baebol oli save gat strong tingting se ol tok blong hem “i trutok.”—Ol Sam 119:160.
YU TRAEM TINGBAOT: Baebol i talem se: “King Nebukadnesa blong Babilonia, hem i holem King Jehoeakin, i putum hem long kalabus.” Biaen “King Evilmerodak i kam king blong Babilonia. Nao long sem yia ya, . . . king ya i tekemaot [King Jehoeakin blong Juda] long kalabus, i letem hem i go fri.” Mo “evri dei, king ya i stap givim mane long hem, blong i save pem ol samting we hem i wantem.”—2 King 24:12; 25:27-30.
OL SAMTING WE OL MAN BLONG DIGIM GRAON OLI FAENEM: Long ples we taon ya Babilon i bin stap long hem, ol man blong digim graon oli faenem ol ston we i blong taem we King Nebukadnesa 2 i rul. Long wan ston i gat lis blong ol kakae we oli givim long ol man long kalabus, mo long ol narafala we king i mas lukaot long olgeta. Long lis ya i gat nem blong “Yaukin [Jehoeakin],” we i “king blong kantri ya Yahud (Juda),” mo nem blong famle blong hem. ?Olsem wanem long Evilmerodak, man ya we i kam king biaen long Nebukadnesa? Ol man blong digim graon oli faenem wan graonpot klosap long taon ya Susa. Ol toktok long graonpot ya i talem se: “Haos blong Amil-Marduk [Evilmerodak], king blong Babilon, pikinini blong Nebukadnesa, king blong Babilon.”
?WANEM TINGTING BLONG YU? ?I gat wan narafala tabu buk blong bifo we ol stori blong hem i klia mo i stret, no Baebol nomo i olsem?
[Tok blong makem poen long pej 5]
“Ol save we Baebol i talem long saed blong taem mo ples we ol samting oli hapen, oli stret mo oli tru, i bitim ol narafala buk blong bifo.”—A SCIENTIFIC INVESTIGATION OF THE OLD TESTAMENT, WE ROBERT D. WILSON I RAETEM
[Tok blong pija long pej 5]
Ston we nem blong King Jehoeakin blong Juda i stap long hem
[Foto Credit Line pej 5]
© bpk, Berlin/Vorderasiatisches Museum, SMB/Olaf M. Tessmer/Art Resource, NY
