Ol Strong Promes Blong God Oli Mekem i Gud Long Man We i Obei

“[God] i yusum nem blong hem nomo blong mekem tok ya blong hem i strong, from we i no gat man we i hae moa long hem.”—HIB. 6:13.

YU TRAEM LUK SIPOS YU SAVE ANSA:

?From wanem yumi bilif strong se stamba tingting blong God bambae i kamtru?

?Afta we Adam mo Iv, tufala i sin, God i mekem wanem promes?

?Wanem gudfala samting we yumi kasem from promes ya we God i mekem wetem Ebraham?

1. ?From wanem ol promes blong Jehova oli defren long ol promes blong man?

JEHOVA i “no save giaman.” (Hib. 6:18) Ol man oli no stret gud olgeta, taswe yumi no save trastem evri samting we oli talem. Be God “i no olsem man we i save giaman.” (Ridim Namba 23:19.) Taem God i promes blong mekem wan samting, bambae hem i mas mekem samting ya. Yu traem tingbaot taem God i mekem wol ya. Baebol i talem se hem i mekem evri samting long sikis dei. Hemia i no ol dei blong 24 aoa, be hem i wan longfala taem. Long stat blong olgeta dei ya wanwan, God i talemaot samting we bambae hem i mekem long dei ya. Ale, ol samting ya oli kamtru stret olsem we hem i talem. Taswe long en blong namba sikis dei, taem God i “luk olgeta wok ya we hem i mekem, hem i luk we oli gud we i gud tumas.”—Jen. 1:6, 7, 30, 31.

2. ?God i spel long namba seven dei, hemia i minim wanem? ?From wanem God i makem dei ya se i tabu?

² Afta we God i talem se olgeta wok ya blong hem oli gud, hem i tokbaot namba seven dei se, long namba seven dei ya, hem i spel. God i spel, i min se wok blong hem blong mekem ol samting long wol, i finis. Be dei ya we God i spel long hem, i no wan dei blong 24 aoa. Hem i wan longfala taem. (Jen. 2:2) Dei ya i stap gohed yet naoia. (Hib. 4:9, 10) Baebol i no talem stret se dei ya i stat wetaem. Be yumi save se dei ya i stat smoltaem afta we God i mekem Iv, woman blong Adam, hemia 6,000 yia bifo. I no longtaem bambae Kraes i rul blong wan taosen yia. Long taem ya, God bambae i mekem stamba tingting blong hem long wol ya i kamtru. God i wantem we wol ya i kam wan paradaes nao ol man oli save laef blong olwe mo oli no moa gat sin. (Jen. 1:27, 28; Rev. 20:6) !Yu save bilif strong se, wan dei, bambae yu yu save kasem gudfala laef ya! “God i blesem namba seven dei, mo i makem dei ya se i tabu.” Tok ya i olsem wan promes se nomata wanem samting i hapen, be bambae God i mas mekem stamba tingting ya blong hem i kamtru. I min se long en blong longfala dei ya we God i spel long hem, bambae wol ya i kam olsem we God i wantem fastaem.—Jen. 2:3.

3. (1) ?Taem dei blong spel blong God i stat, wanem i hapen? (2) ?Jehova i talem se bambae hem i stretem trabol ya olsem wanem?

 ³ Sore tumas we taem dei blong spel blong God i stat, i gat sam man we oli mekem stronghed. Wan enjel long heven, hemia Setan, i traem pulum ol narafala blong oli wosip long hem i bitim we oli wosip long God. Setan i statem fasin blong giaman. Hem i trikim Iv, nao Iv i brekem loa blong Jehova. (1 Tim. 2:14) Biaen, Iv tu i pulum man blong hem blong i brekem loa blong Jehova. (Jen. 3:1-6) Fasin we trifala ya i mekem i nogud we i nogud tumas. Setan i tok nogud agensem Jehova, se Jehova i giaman. Nating se i olsem, Jehova i no gat tingting ya se hem i mas talem wan strong tok blong pruvum se ol promes blong hem long saed blong wol ya bambae oli kamtru. Hem i mekem wan samting we i defren olgeta. Hem i talem wan narafala promes we ol man bambae oli kasem save long hem plante yia biaen. Jehova i talemaot rod we bambae hem i folem blong stretem trabol ya. Hem i talem se Setan mo woman ya, bambae tufala i ‘agens long tufala.’ Mo ol pikinini we bambae oli kamaot biaen long Setan wetem ol pikinini we bambae oli kamaot biaen long woman ya, olgeta tu bambae oli stap “badfren” long olgeta. Nao wan pikinini bambae i bon long laen blong woman ya, mo pikinini ya bambae i “smasem hed” blong Setan, mo Setan bambae i “kakae leg blong pikinini ya.”—Jen. 3:15, futnot; Rev. 12:9.

OL STRONG TOK BLONG SOEMAOT SE SAMTING WE MAN I TALEM I TRU

4, 5. ?Ebraham i talem wanem blong soemaot se tok blong hem i tru?

⁴ Taem God i mekem olgeta samting fastaem, i no gat sin. Ol man mo ol enjel, olgeta evriwan oli lavem God mo oli folem fasin blong God. Long taem ya, oli no nid blong pruvum se samting we oli talem i tru, from we olgeta evriwan oli tok tru mo oli save trastem olgeta. Be afta we Adam mo Iv, tufala i sin, fasin blong ol man i jenis. Ol man oli stap giaman, mo oli ting se fasin ya i stret nomo. Taswe biaen, taem ol man oli wantem pruvum se samting we oli talem i tru, oli mas mekem tok blong olgeta i strong. Ale strong tok ya, i kam olsem wan loa we i mekem se sipos wan man i no holem tok ya we hem i talem, bambae hem i kasem panis.

⁵ Ol stori long Baebol oli soemaot se Ebraham tu i stap talem ol strong tok blong soemaot se samting we hem i talem i tru. I luk olsem se hem i mekem samting ya long tri defren taem long laef blong hem. (Jen. 21:22-24; 24:2-4, 9) Wan long ol taem ya, hemia afta we hem i winim faet agensem king blong Elam wetem sam narafala king bakegen. King blong Salem mo king blong Sodom tufala i kam blong mitim Ebraham. Melkisedek i king blong taon ya Salem mo hem i “pris blong God ya we i hae we i hae.” King ya i blesem Ebraham mo i presem God tu from we hem i givhan long Ebraham blong i winim ol enemi blong hem. (Jen. 14:17-20) Nao, king blong Sodom i wantem givim wan presen long Ebraham blong talem tangkiu we hem i bin sevem ol man blong hem. Be Ebraham i mekem wan strong tok se: “Long fes blong Hae God we i hae we i hae, we i mekem skae mo graon, mi mi mekem wan strong tok finis long nem blong hem, se bambae mi no save holem wan samting nating we i blong yu. Nating we strap nomo blong olfala sandel blong yu, be bambae i mas gobak long yu bakegen, blong bambae yu no save talem samtaem, se yu yu mekem mi mi kam rijman.”—Jen. 14:21-23.

JEHOVA I MEKEM PROMES BLONG HEM LONG EBRAHAM I STRONG

6. (1) ?Wanem eksampol we Ebraham i soem long yumi? (2) ?Wanem blesing we yumi save kasem from samting ya we Ebraham i mekem?

⁶ Jehova tu i yusum ol tok blong mekem promes blong hem i strong. Hem i mekem samting ya blong givhan long ol sinman blong oli trastem ol promes blong hem. Taem Jehova i mekem ol promes blong hem oli strong, hem i yusum ol tok olsem, “Mi mi Hae God, mi Masta blong yufala, mo mi laef, mi stap we mi stap.” (Esik. 17:16) Baebol i tokbaot samwe long 40 taem we Jehova i talem ol tok olsem. Wan long olgeta ya hemia taem hem i mekem promes long Ebraham. Jehova i mekem plante defdefren promes long Ebraham. Hem i soemaot se Mesaea bambae i bon long famle blong Ebraham, long laen blong pikinini blong hem Aesak. (Jen. 12:1-3, 7; 13:14-17; 15:5, 18; 21:12) Nao Jehova i talem long Ebraham blong mekem wan samting we i traem bilif blong hem. Hem i talem long Ebraham blong i kilim Aesak blong mekem sakrefaes long hem. Nating  se Ebraham i laekem pikinini blong hem tumas, hem i rere nomo blong mekem wanem we Jehova i talem. Be jes bifo we hem i kilim Aesak i ded, wan enjel i blokem hem. Nao Jehova i mekem promes ya long Ebraham se: “Long nem blong mi, mi mi promes se bambae mi blesem yu bigwan. Pikinini ya blong yu i wan nomo we yu yu gat, be yu yu no holemtaet hem, yu rere nomo blong letem hem i ded. Mo from we yu yu mekem olsem, mi mi promes long yu se olgeta we bambae oli kamaot biaen long yu, bambae oli plante we plante. Bambae oli plante olsem ol sta long skae, mo olsem sanbij daon long solwota. Olgeta ya bambae oli stap winim ol enemi blong olgeta. Bambae ol man blong ol narafala kantri oli save prea long mi blong mi blesem olgeta, olsem we bambae mi blesem olgeta ya. Be bambae mi mi mekem i gud tumas long olgeta we bambae oli kamaot biaen long yu, from fasin ya we yu yu mekem tede, we yu obei long tok ya blong mi.”—Jen. 22:1-3, 9-12, 15-18.

7, 8. (1) ?Taem God i mekem promes long Ebraham from wanem hem i mekem promes ya i strong? (2) ?Wanem blesing we “ol narafala sipsip” blong Kraes bambae oli kasem from strong promes ya we God i mekem long Ebraham?

⁷ ?Taem God i mekem promes long Ebraham, from wanem hem i mas talem wan tok blong mekem promes ya i strong? Hem i mekem olsem from we hem i tingbaot ol narafala ya we oli olsem “laen” blong Ebraham. Olgeta ya bambae oli rul wetem Kraes long Kingdom. Jehova i wantem mekem bilif mo tingting blong olgeta i kam strong moa long promes blong hem. (Ridim Hibrus 6:13-18; Gal. 3:29) Aposol Pol i talem se Jehova i “talem nem blong hem blong mekem promes ya blong hem i kam strong moa.” Taswe, i gat tu samting we i givhan long olgeta we tabu spirit i makemaot olgeta, blong oli save ‘putum tingting blong olgeta i stap strong long promes blong God.’ Tufala samting ya, hemia tok blong promes blong hem, wetem tok blong mekem promes ya i strong. Tufala tok ya, tufala i no save jenis from we “God i no save giaman.”

⁸ Promes we God i mekem long Ebraham i karem blesing i kam long olgeta we tabu spirit i makemaot olgeta. Be i no olgeta nomo we oli kasem blesing. Jehova i mekem wan strong promes se bambae hem i “yusum olgeta we bambae oli kamaot biaen” long Ebraham, blong “blesem ol man blong olgeta narafala kantri long wol.” (Wok 2:35; Jen. 22:18) Ol man blong ol narafala kantri hemia ol “narafala sipsip” blong Kraes. Olgeta ya oli obei long ol tok blong Jisas mo bambae oli gat laef we i no save finis long Paradaes long wol. (Jon 10:16) Sipos yu yu wan brata no sista we tabu spirit i makemaot yu blong yu go long heven, no sipos yu yu wan long ol “narafala sipsip” ya, be yumi evriwan i mas ‘putum tingting blong yumi i stap strong long promes blong God.’ Hemia i min se yumi mas wok strong blong kasem laef ya we God i promes blong givim. Yumi mas obei long God oltaem.—Ridim Hibrus 6:11, 12.

OL STRONG PROMES WE OLI JOEN WETEM PROMES BLONG GOD LONG EBRAHAM

9. ?Taem ol man long laen blong Ebraham oli stap wok slef long Ijip, God i mekem wanem promes long olgeta?

⁹ Plante handred yia afta long Ebraham, Jehova  i mekem sam narafala strong promes. Hem i mekem samting ya taem hem i sanem Moses i go toktok long ol man long laen blong Ebraham. Long taem ya, oli stap wok slef long Ijip. (Eks. 6:6-8) God i talem se tok ya we Moses i talemaot long olgeta, hem i wan strong promes. Hem i talem se: “Long taem ya, mi mi promes blong tekemaot olgeta i gowe long ples ya, blong lidim olgeta oli kam long wan kantri we mi jusumaot finis blong oli kam stap long hem. Kantri ya i gud we i gud, . . . Graon blong hem i gud tumas, oltaem i stap karem fulap kakae.”—Esik. 20:5, 6.

10. ?Wanem promes we God i mekem long ol man Isrel afta we hem i tekemaot olgeta long Ijip?

¹⁰ Jehova i karemaot neson blong Isrel long Ijip. Nao hem i mekem wan narafala promes long olgeta: “Sipos yufala i obei long mi, mo yufala i holemgud promes ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol. Nating we olgeta man long wol ya oli blong mi, be yufala bambae i tabu, yufala i man blong mi nomo, mo bambae yufala i pris blong mi [“bambae yufala i kam wan kingdom blong pris,” NW], yufala i stap mekem wok blong mi.” (Eks. 19:5, 6) !Samting ya we Jehova i talem long olgeta, i wan nambawan blesing! Sipos oli obei long Jehova, wan dei, bambae oli kam king mo pris mo bambae oli blesem ol man blong olgeta kantri long wol. Long wan narafala taem bakegen, Jehova i talem long ol man Isrel se “promes” ya we hem i bin mekem wetem olgeta, hem i strong olsem promes blong mared.—Esik. 16:8.

11. ?Ol man Isrel oli mekem wanem taem God i talem long olgeta se oli save kam ol spesel man blong hem?

¹¹ Jehova i no talem long ol man Isrel se oli mas mekem wan strong promes blong obei oltaem. Mo hem i no fosem olgeta tu se oli mas kam ol spesel man blong hem. Be ol man Isrel oli wantem mekem wan strong promes long Jehova. Oli talem se: “Bambae mifala i mekem olgeta samting we Hae God i talem.” (Eks. 19:8) Tri dei biaen, Jehova God i talem long ol man Isrel wanem we oli mas mekem blong stap olsem ol man blong hem. Fastaem, hem i givim ol Tenkomanmen long olgeta. Mo biaen hem i talem long Moses blong i talemaot sam narafala loa long olgeta. Ol loa ya oli stap long Eksodas 20:22 kasem Eksodas 23:33. ?Taem ol man Isrel oli harem ol loa ya, oli talem wanem? “Olgeta man ya evriwan oli tok wantaem, oli talem se, ‘Bambae mifala i mekem evri samting we [Jehova] i talem.’” (Eks. 24:3) Nao Moses i raetemdaon ol tok ya long ‘buk blong promes blong Hae God’ mo hem i ridimaot long ol man blong oli save harem ol tok ya bakegen. Afta long hemia, we hem i namba tri taem blong hem, ol man Isrel oli promes bakegen se: “Bambae mifala i obei long Hae God, mifala i mekem evri samting we hem i talem.”—Eks. 24:4, 7, 8.

12. ?Afta we Jehova i mekem promes wetem ol man Isrel, hem i mekem wanem? ?Ol man Isrel oli mekem wanem afta we oli mekem promes long God?

¹² Stret afta we God i mekem promes wetem ol man Isrel, hem i stat wok blong mekem promes ya blong hem i kamtru. Hem i jusum ol pris blong oli mekem wok long haos wosip blong olgeta, hemia haos tapolen. Ol pris ya oli mas givhan long ol man Isrel blong oli fren gud wetem God. Ol man Isrel ya oli ol spesel man blong God. Be smoltaem nomo biaen, oli no moa obei long God. Oli no mekem ol samting ya we oli bin promes blong mekem, mo oli “mekem [God] i harem nogud.” (Sam 78:41) Wan dei taem Moses i stap antap long Hil ya Sinae mo Jehova i stap givim ol loa long hem, ol man Isrel oli kam kros from we oli stap wet longtaem. Oli no moa trastem God. Oli ting se Moses i lego olgeta finis. Ale, oli wokem pija blong wan bul long gol mo oli talem se: “!Olgeta! Hemia nao God blong yumi, we i tekemaot yumi long Ijip.” (Eks. 32:1, 4) Oli tekem ol anamol i kam, nao oli mekem sakrefaes long bul ya, mo oli stap bodaon long hem. Oli talem se oli stap mekem wosip long Jehova. Be taem Jehova i luk we oli stap wosip long bul ya, hem i talem long Moses se: “Fasin ya we mi mi talem long olgeta blong oli folem, olgeta oli lego finis.” (Eks. 32:5, 6, 8) Long ol yia we oli kam biaen, ol man Isrel oli mekem plante narafala promes long God. Be oli no holem ol promes ya nating.—Nam. 30:2.

TU NARAFALA STRONG PROMES

13. ?Wanem promes we Jehova i mekem long Deved? ?Olsem wanem yumi save se promes ya i stap tokbaot Mesaea?

¹³ Taem Deved i king blong Isrel, Jehova i mekem tu strong promes long hem. Tufala promes ya bambae i mekem i gud long ol man we oli obei long God. Long fas promes blong hem, hem i talem se olgeta  we bambae oli kamaot biaen long Deved bambae oli king oltaem, mo Pikinini ya we God i promes blong sanem bambae i kam king long laen blong Deved. (Sam 89:35, 36; 132:11, 12) Pikinini ya, hemia Mesaea, bambae i bon long laen blong Deved, mo ol man bambae oli singaot hem se “Laen ya blong King Deved.” (Mat. 1:1; 21:9) Deved i gat tingting daon taem hem i singaot Pikinini ya se “Masta,” from we Mesaea i hae moa long hem.—Mat. 22:42-44.

14. ?Jehova i talem wanem long saed blong Pikinini ya we hem i promes blong sanem? ?Strong promes ya i mekem i gud long yumi olsem wanem?

¹⁴ Long namba tu promes blong Jehova, hem i talem long Deved se Pikinini ya we hem i promes blong sanem, bambae hem i no mekem wok blong King nomo be bambae hem i Hae Pris tu. Hemia i spesel ya from we long Loa we God i givim long ol man Isrel, ol pris oli mas kamaot long laen blong Livae mo ol king oli mas kamaot long laen blong Juda. Taswe i no gat wan man long Isrel we i save mekem wok blong pris mo king semtaem. Be Deved i tokbaot King ya we bambae i kam se: “King. Yu yu Masta blong mi. Hae God i talem long yu se, . . . ‘Yu sidaon long raet saed blong mi, yu wet. Bambae mi mekem ol enemi blong yu oli stap aninit long paoa blong yu, oli slef blong yu.’ Hae God i bin mekem wan strong promes long yu, mo bambae hem i no save jenisim tingting blong hem. Hem i talem se, ‘Yu yu pris olsem pris ya Melkisedek bifo, mo bambae yu holem wok blong pris oltaem gogo i no save finis.’” (Sam 110:1, 4) Jisas Kraes nao hem i pikinini ya we God i promes blong sanem. Mo naoia, Jisas i kam King finis long heven, olsem we Deved i bin talem. Mo hem i Hae Pris tu. Hem i stap givhan long ol man we oli tanem tingting blong olgeta from ol sin blong olgeta, blong oli save fren gud bakegen wetem God.—Ridim Hibrus 7:21, 25, 26.

NIUFALA ISREL BLONG GOD

15, 16. (1) ?Wanem tufala neson blong Isrel we Baebol i tokbaot? ?Weswan long tufala we Jehova i stap blesem tede? (2) ?Wanem tok we Jisas i talem long ol man blong hem long fasin ya blong mekem tok blong olgeta i strong?

¹⁵ Ol man Isrel oli sakemaot Jisas Kraes. Taswe, Jehova tu i sakemaot neson blong Isrel. Ale, ol man Isrel oli lusum janis ya blong kam wan “kingdom blong pris.” Jisas i talem long ol lida blong ol man Jiu se: “God bambae i tekemaot kingdom blong hem long yufala, mo bambae i givim long wan neson we i karem gudfala frut.” (Mat. 21:43, NW) Niufala neson ya we Jisas i tokbaot, i stanap long dei blong Pentekos long yia 33 K.T. Long taem ya, i gat samwe long 120 disaepol blong Jisas we oli stap wanples long Jerusalem, mo God i kafsaedem tabu spirit blong hem long olgeta. Olgeta ya nao oli niufala “neson” ya we Baebol i talem se hem i “Isrel blong God.” Smoltaem biaen, plante taosen narafala man we oli kamaot long olgeta kantri, oli joen long niufala neson ya. Olgeta tu oli kam Isrel blong God.—Gal. 6:16, NW.

¹⁶ Niufala Isrel blong God i no olsem ol man Isrel bifo. Ol man Isrel bifo, oli no obei long God, be niufala Isrel blong God i obei long God oltaem. I gat wan tok we Isrel blong God i mas folem long saed blong ol strong promes. Taem Jisas i stap long wol, ol man oli talem samting we i no tru be oli mekem tok blong olgeta i strong se samting ya i tru, mo oli mekem strong promes from ol samting we oli no impoten nating. (Mat. 23:16-22) Be Jisas i talem long ol man blong hem se taem oli mekem promes, oli no nid blong mekem tok blong olgeta i strong. Hem i talem se: “Sipos yu talem se ‘Yes’, yu mas talem ‘Yes’ nomo. Mo sipos yu talem se ‘No’, yu mas talem ‘No’ nomo. Ol narafala tok we yu save talem, hem i kamaot long Setan nomo.”—Mat. 5:34, 37.

17. ?Wanem ol kwestin we bambae yumi tokbaot long nekis stadi?

¹⁷ ?Olsem wanem nao? ?Samting ya i min se i no stret nating blong mekem wan strong promes? ?Taem Jisas i talem se yu mas talem ‘Yes’ nomo, hem i minim wanem? Bambae yumi luk ansa blong ol kwestin ya long nekis stadi. I gud yumi tingting dip long Tok blong God, mo yumi letem ol tok ya oli pulum yumi blong obei long God oltaem. Nao bambae Jehova i mekem i gud long yumi gogo i no save finis, from we hem i mekem promes blong hem i strong finis blong mekem olsem.

[Kwestin]

[Tok blong makem poen long pej 27]

Oltaem nomo, ol promes blong Jehova oli kamtru

[Tok blong pija long pej 25]

I no longtaem, bambae Ebraham i luk ol promes blong Jehova oli kamtru