HERODOTUS, wan man Gris we i raetem histri mo we i laef 2,500 yia bifo, i talem stori blong ol man Ijip long taem blong hem. Hem i talem se: “Long lafet blong ol rijman, afta we oli kakae, wan man i karem wan bokis blong dedman mo i wokbaot i goraon long ol man we oli stap. Longfala blong bokis ya i klosap long wan meta. Insaed long bokis ya, i gat wan pija blong dedman we oli katem long wud mo oli pentem gud. Ale hem i soem long olgeta man we oli stap long taem ya mo i talem se: ‘Yu dring mo yu glad from we taem yu ded, bambae yu olsemia nao.’”

I no ol man Ijip nomo we oli gat tingting ya long saed blong laef mo ded. Tede, plante man oli stap talem se: “Yu kakae, yu dring, mo yu harem gud.” Tok ya i no moa gat mining long olgeta. Long tingting blong olgeta, sipos ded i en blong evri samting, i gud oli harem gud naoia we oli laef yet. ?From wanem oli mas traehad blong mekem samting we i stret? Sipos i tru se ded i en blong evri samting, i stret nomo we yumi traem blong harem gud long laef naoia. Aposol Pol i tokbaot tingting blong ol man we oli no bilif long laef bakegen, i se: ‘Sipos ol dedman oli no save laef bakegen, . . . “i gud yumi gohed, yumi kakae, yumi dring, from we tumora bambae yumi ded.”’—1 Korin 15:32.

Pol i no bilif se taem wan man i ded, hem i ded blong olwe. Hem i bilif strong se ol dedman oli save laef bakegen wetem janis ya blong no moa ded samtaem. Bilif blong Pol i stanap long wan impoten samting, we man i no save agensem nating. Hemia se God i mekem Jisas Kraes i laef bakegen. * Bilif blong ol fas Kristin i stanap long samting ya tu.

?Taem Jisas i laef bakegen, hemia i mekem i gud long yumi olsem wanem? ?From wanem yumi save se Jisas i laef bakegen? Bambae yumi luk samting we Pol i talem long ol Kristin long Korin.

Tingting blong sam Kristin long Korin bifo, i fasfas long saed blong laef bakegen. Sam narafala oli no bilif nating long laef bakegen. Taem Pol i raetem fas leta blong hem i go long ol Kristin ya, hem i tokbaot sam samting we i save hapen sipos i nogat laef bakegen. Hem i raetem se: “Sipos tok ya blong yufala i tru, hemia i min se Kraes i no laef bakegen. Mo sipos hem i no laef bakegen, hemia i min se mifala i stap talemaot gud nius ya, be blong nating nomo, mo yufala i stap bilif, be blong nating nomo tu. Antap bakegen, tok ya i min se mifala i giaman, mo stori we i tokbaot God, mifala i tanem i go krangke. . . . Yufala i bilif blong nating, mo yufala i stap yet long ol sin blong yufala. . . . Sipos tok ya i tru, hemia i min se ol man ya we bifo oli bilif long Kraes, nao oli ded finis, olgeta ya oli lus finis.”—1 Korin 15:13-18.

“Hem i kamtru long wan kampani blong ol man blong hem we oli moa long faef handred man, nao olgeta evriwan oli luk hem wantaem. . . . Mo biaen, hem i kamtru long Jemes, mo biaen bakegen, hem i kamtru long olgeta aposol blong hem. Nao biaen long olgeta ya, hem i kamtru long mi.”—1 Korin 15:6-8

Long stat blong toktok blong Pol, hem i talem wan tok we i no gat man i save agensem. Hem i se: Sipos ol dedman oli no save laef bakegen, hemia i min se Kraes tu i no save laef bakegen. Ale, sipos Kraes i no laef bakegen, ?wanem bambae i hapen? Bambae wok blong talemaot gud nius i blong nating nomo mo i wan bigfala giaman samting. Mo sipos i tru se Jisas i no laef bakegen, ?olsem wanem long bilif blong ol Kristin we i stanap from Kraes i laef bakegen? Samting ya bambae i mekem se man i no moa kasem save long ol stamba tijing blong Baebol we i joen wetem bilif ya se Jisas i laef bakegen. Ol tijing ya hemia hae rul blong God, nem blong hem, Kingdom blong hem, mo rod we hem i yusum blong sevem yumi. Sipos i nogat laef bakegen, ol samting we Pol mo ol narafala aposol i talemaot i blong nating nomo.

Mo tu sipos Kraes i no laef bakegen, bilif blong ol Kristin bambae i stanap long wan giaman samting nomo. Bambae Pol mo ol narafala oli giaman nomo se Jisas i laef bakegen mo oli giaman tu long saed blong man ya we i mekem hem i laef bakegen, Jehova God. Mo tu tok ya se Kraes i “ded blong tekemaot ol sin blong yumi” bambae i wan giaman toktok nomo. From we sipos Sevia blong yumi i no laef bakegen long ded, hem i no save sevem ol narafala man. (1 Korin 15:3) Hemia i min tu se ol Kristin we oli ded from bilif blong olgeta, oli ded from we oli bilif long wan giaman samting.

Pol i finisim toktok blong hem olsem: “Sipos yumi stap putum tingting blong yumi long Kraes, be blong laef ya long wol nomo, man, sore tumas long yumi. Hemia, yumi kasem trabol we i bitim ol narafala man long wol.” (1 Korin 15:19) Olsem ol narafala Kristin, Pol tu i lusum wan famle long ded, ol man oli agensem hem, mo hem i kasem hadtaem. Mo klosap hem i ded from we hem i bilif long laef bakegen mo ol blesing we laef bakegen i mekem i kamtru. !I krangke nomo sipos man i ting se laef bakegen i wan giaman samting!

Pol i save se ol samting we ol Kristin oli bilif long hem, oli tru. Hem i save se Jisas i bin laef bakegen, mo hem i tokbaot sam samting we i pruvum se Jisas i laef bakegen. Hem i talem long ol Kristin long Korin se: “Kraes i ded blong tekemaot ol sin blong yumi, olsem we Baebol i talem. Olgeta oli berem hem. Mo long namba tri dei blong hem, hem i laef bakegen, olsem we Baebol i talem. Nao biaen, hem i kamtru long Pita, mo biaen, hem i kamtru long ol twelef * man blong hem.” Mo Pol i gohed i se: “Mo biaen, hem i kamtru long wan kampani blong ol man blong hem we oli moa long faef handred man, nao olgeta evriwan oli luk hem wantaem. Sam long kampani ya  oli ded finis, be bighaf blong olgeta oli stap laef yet. Mo biaen, hem i kamtru long Jemes, mo biaen bakegen, hem i kamtru long olgeta aposol blong hem. Nao biaen long olgeta ya, hem i kamtru long mi, we mi mi olsem wan pikinini we i no bon long stret taem blong hem.”—1 Korin 15:3-8.

Pol i statem toktok blong hem wetem wan tok we ol man oli save trastem. Hem i talem se Kraes i ded from ol sin blong yumi, oli bin berem hem mo biaen hem i laef bakegen. ?From wanem Pol i bilif se samting ya i bin hapen? From we plante man oli luk we Jisas i laef bakegen. Taem Jisas i laef bakegen, hem i kamtru long sam man (olsem Pol), long ol smol grup blong man, mo long wan kampani blong 500 man, we plante long ol man ya oli no bilif se Jisas i laef bakegen. (Luk 24:1-11) Plante long ol man we oli luk Jisas taem hem i laef bakegen, oli laef long taem blong Pol. Mo eni man i save askem long olgeta ya blong pruvum se tok blong Pol i tru. (1 Korin 15:6) Maet i isi blong man i sakemaot tingting blong wan no tu witnes, be hem i no save mekem olsem sipos i gat 500 no moa witnes.

I gud blong makem se Pol i talem tu taem, se ded blong Jisas, taem we oli berem hem, mo taem we hem i laef bakegen, “i olsem we Baebol i talem.” Ol samting ya oli soemaot se ol profet tok long Hibru haf blong Baebol we oli tokbaot Mesaea, oli kamtru. Hemia i pruvum se Jisas i Mesaea we God i promes blong sanem.

Nating se Baebol mo plante man oli talem se Jisas i laef bakegen, be plante man oli no bilif yet se samting ya i tru. Samfala oli talem se ol disaepol oli stilim bodi blong Jisas, mo oli giaman se hem i laef bakegen. Be ol disaepol oli no gat paoa blong blokem ol soldia blong ol man Rom, we oli stap gad long hol blong ston we oli berem Jisas long hem. Sam narafala oli talem se, i no Jisas we i stap kamtru long ol man, be hem i wan vison nomo. Be hemia i no tru from we hem i kamtru long plante man long ol defdefren taem.

 Nating se i olsem, samfala oli talem se ol disaepol oli mekemap wan giaman stori nomo se Jisas i laef bakegen. ?Be sipos ol disaepol oli mekem olsem, wanem gudfala samting we oli save kasem? Plante man oli jikim ol disaepol, oli agensem olgeta, mo oli kilim olgeta oli ded from we oli stap talemaot se Jisas i laef bakegen long ded. ?From wanem oli wantem putum laef blong olgeta long denja blong sapotem wan giaman tok? Mo yu traem tingbaot, oli go talemaot samting ya long Jerusalem fastaem, stret long fes blong ol man we oli agensem olgeta mo oli rere blong holemtaet olgeta mo kilim olgeta.

Ol disaepol oli bilif se Jisas i laef bakegen. Samting ya i givim strong tingting long olgeta blong oli tokbaot Masta blong olgeta, nating se ol man oli agensem olgeta bigwan. Bilif blong ol Kristin i stanap long samting ya. Ol fas Kristin oli putum laef blong olgeta long denja blong tokbaot wan tija we i waes, we ol man oli kilim hem i ded, be i no hemia nomo. Oli talemaot se from we Jisas i laef bakegen, hemia i pruvum se hem i Kraes, hem i pikinini blong God, mo hem i wan man we i gat paoa blong lidim mo blong givhan long olgeta. From we Jisas i laef bakegen, olgeta tu oli save laef bakegen. Tru ya, sipos Jisas i no laef bakegen, bambae i no gat Kristin skul. Sipos Jisas i no laef bakegen, bambae yumi neva save se hem i hu.

?Taem Jisas i laef bakegen, hemia i mekem i gud long yumi olsem wanem?