Mi mi bon long Dominikan Ripablik, long ples ya Santo Domingo. I gat fo pikinini long famle, mi mi lasbon. Papa mo mama blong mi, tufala i skul gud, mo tufala i wantem se mifala ol pikinini, mifala i gruap wetem ol man we oli gat gudfala fasin. Fo yia bifo we mi bon, papa mo mama blong mi, tufala i mitim ol misinari blong Momen. Tufala i laekem fasin blong ol boe ya we klos blong olgeta i klin mo oli toktok wetem respek. Ale, tufala i mekem desisen se famle blong mifala bambae i joenem Momen jos. Taswe long aelan blong mifala, famle blong mifala i wan long ol faswan blong joen long skul ya.

Taem mi stap gruap, mi laekem blong joen wetem ol yangfala long jos, mo mi glad we jos i tinghae long famle mo ol gudfala fasin. Mi mi praod se mi wan Momen, mo mi wantem kam wan misinari.

Taem mi mi gat 18 yia, famle blong mifala i muv i go stap long Yunaeted Stet, blong mi save go long wan gudfala yunivesiti. Wan yia afta, smol sista blong mama blong mi wetem man blong hem we tufala i Witnes blong Jehova, tufala i kam luk mifala long Florida. Tufala i singaot mifala i go long wan asembli wetem tufala. Mi mi sapraes blong luk se evriwan we oli sidaon klosap long mi, oli jekem ol vas long Baebol blong olgeta mo oli raetem ol not. Taswe, mi askem wan pen mo wan pepa, ale mi tu mi stat blong raetem ol not.

Afta long asembli ya, smol mama blong mi mo man blong hem, tufala i talem se, from we mi wantem kam wan misinari blong Momen, tufala i glad blong givhan long mi blong mi save moa long Baebol. Mi talem se hemia wan gudfala tingting, from we mi mi save moa Buk Blong Momen i bitim Baebol.

Mifala i yusum telefon blong storian long Baebol. Oltaem tufala i talem long mi se  mi mas jekem bilif blong mi wetem Baebol. Tufala i wantem se mi wan mi luksave trutok.

I gat plante bilif blong Momen we mi mi folem, be mi no save olsem wanem oli laenap wetem Baebol. Smol mama blong mi i sanem Wekap! blong Jenuware-Maj 1996 long mi, we i tokbaot bilif blong Momen. Taem mi ridim, mi sapraes se mi no save plante tijing blong Momen. From samting ya, mi go long Websaet blong Momen blong jekem sipos ol tok long Wekap! ya i tru. Taem mi jekem, mi luk se evri samting i tru. Mo taem mi go long musium blong ol Momen long Utah, mi pruvum tu se ol samting we Wekap! i talem i tru nomo.

Fastaem, mi mi ting se Buk Blong Momen mo Baebol tufala i tokbaot sem samting. Be taem mi ridim gud Baebol, mi luksave se tijing blong Momen i defren olgeta long Baebol. Mi ridim Esikel 18:4 long Baebol we i talem se sol i save ded. Be long Buk Blong Momen, Alma 42:9 i talem se: “Sol i no save ded samtaem.”

Antap long ol defdefren tijing ya, tingting blong mi i trabol from we skul Momen i leftemap kantri we jos blong olgeta i kamaot long hem. Oli tijim se garen blong Iden i bin stap long Jackson County, Missouri, Yunaeted Stet. Ol profet blong jos oli talem se taem God i rulum wol, flag blong Yunaeted Stet bambae i flae blong soemaot se ol man oli fri mo oli sem mak nomo, mo i no gat wan samting we bambae i sakem doti long flag ya.

Mi stap tingbaot se: ?Be olsem wanem long kantri blong mi mo ol narafala kantri? Taem wan yangfala Momen we i stap tren blong kam misinari i ring i kam long mi, mi askem kwestin ya long hem, mo mi askem tu se: ‘Sipos i gat wan faet i kamaot, ?bambae yu yu faet agensem ol Momen long narafala kantri?’ Mi mi sapraes blong harem we hem i talem se yes. Mi stadi gud long ol tijing blong Momen, mo mi toktok long ol lida blong jos tu. Oli talem se ol ansa blong ol kwestin blong mi oli stap haed, mo se wan dei, laet bambae i saen moa nao bambae oli kam klia.

Mi mi no glad nating long toktok blong olgeta. Ale, mi tingting dip blong faenemaot se from wanem mi mi wantem kam wan misinari blong Momen. Nao mi luksave se mi mi wantem nomo blong givhan long ol man. Mo tu, mi save se sipos mi kam misinari, ol man bambae oli respektem mi. Be taem mi skelem gud, mi luk se mi mi no save God. Bifo, mi mi lukluk long Baebol plante taem, be mi no tinghevi long ol tok blong hem. Mi no save nating se God i gat wan plan blong wol ya mo ol man.

Taem ol Witnes blong Jehova oli mekem Baebol stadi long mi, mi kasem save long plante samting. Mi lanem se God i gat wan nem, wanem i hapen long man taem hem i ded, mo wok we Jisas i mekem blong plan blong God i kamtru. Mi stat blong save gud nambawan buk ya Baebol, mo mi laekem blong tokbaot ol trutok we mi stap lanem. Bifo finis, mi mi save se God i stap, be naoia mi mi prea long hem olsem we mi stap toktok long Besfren blong mi. Ale, long 12 Julae 2004, mi mi baptaes blong kam wan Witnes blong Jehova. Sikis manis afta, mi mi stat blong mekem wok blong God fultaem.

Mi wok faef yia long hedkwota blong ol Witnes blong Jehova long Brooklyn, New York. Mi glad tumas we mi bin gat janis ya blong givhan blong wokem ol Baebol mo ol buk we oli halpem plante milian man long olgeta ples long wol. Mo mi harem gud yet long wok blong givhan long ol narafala man blong oli save God.