Traem tingbaot wan ples we ol soldia oli stap wanples long hem mo oli save lukluk i gokros long draeples mo luk olgeta ples raonabaot. Ol soldia blong ol man Filistia we oli stap long ples ya oli luk wan samting. Oli luk tu man, we oli blong Isrel, tufala i stap stanap long open ples long medel blong tu bigfala hil. Ol soldia ya oli harem gud tumas, from oli luk se tufala i no save mekem trabol long olgeta. Longtaem finis nao, ol man Isrel oli stap aninit long paoa blong ol man Filistia. Sipos oli wantem sapenem ol tul blong garen blong olgeta, oli no save mekem olgeta wan, oli mas askem help blong ol enemi blong olgeta hemia ol man Filistia. Ol soldia blong ol man Isrel oli no gat tumas tul blong faet. !Antap moa, hemia tu man nomo! Nating sipos tufala man ya i gat ol gudfala tul blong mekem faet, be bambae tufala i no save mekem bigfala trabol. Nao ol man Filistia ya oli stap jikim tufala, mo oli singaot i go long tufala se: “!Ei! !Yutufala i kam! !Mifala i wantem talem wan samting long yutufala!”—1 Samuel 13:19-23; 14:11, 12.

Be, ol man Filistia ya oli no tingbaot se bambae olgeta nao oli lanem wan lesen. Tufala man Isrel ya i klaem long saed blong krik we rod i pas long hem, mo tufala i stat blong klaem. Hil ya i stanap stret, taswe tufala i mas yusum ol han mo leg blong tufala blong klaem, be tufala i go, tufala i stap go stret long ples we ol soldia ya oli putum haos tapolen blong olgeta long hem. (1 Samuel 14:13) Naoia ol man Filistia ya oli luksave se man ya we i stap kam fastaem, i karem ol tul blong faet wetem hem, mo man blong karem ol tul blong faet blong hem i stap folem hem. Be, ?olsem wanem? ?Man ya i krangke ya, we tufala nomo i go blong mekem faet long ol hip soldia ya?

Nogat, hem i no krangke. Hem i wan man we i gat bigfala bilif. Nem blong hem Jonatan, mo stori blong hem i stap blong tijim sam lesen long ol tru Kristin tede. Nating se tede yumi no moa stap mekem faet, be yet yumi save lanem lesen from fasin blong Jonatan blong soem strong tingting, fasin blong stap tru, mo hem i no tingbaot hem wan nomo. Hemia ol fasin we yumi nidim blong wokem trufala fasin blong bilif.—Aesea 2:4; Matiu 26:51, 52.

Blong kasem save from wanem Jonatan i wantem go faet agensem ol soldia ya blong Filistia, bambae yumi tokbaot smol se Jonatan hem i hu. Jonatan i fasbon boe blong fas king blong Isrel, hemia Sol. Taem oli putumap Sol i kam king, Jonatan i wan bigman finis, maet long taem ya hem i gat 20 yia o maet i olfala moa. I luk olsem se Jonatan i fasgud wetem papa blong hem, we plante taem Sol i stap talemaot ol sikret blong hem long boe blong hem. Long taem ya we Sol i kam king, Jonatan i no jes luk papa blong hem olsem wan longfala man we i gat naes bodi mo wan strong man blong faet, be hem i luk papa blong hem olsem wan man blong bilif mo i gat tingting daon. Jonatan i luksave from wanem Jehova i jusum Sol blong i kam king, nating se profet Samuel i talem se i nogat wan man we i olsem Sol.—1 Samuel 9:1, 2, 21; 10:20-24; 20:2.

I sua se Jonatan i mas haremgud tumas blong folem oda blong papa blong hem blong go faet agensem ol enemi blong ol man blong Jehova. Ol faet long taem ya oli no olsem ol faet long taem blong yumi tede. Long taem ya, Jehova i jusum nesen blong Isrel blong i representem hem, mo blong go faet agensem ol nesen we oli stap wosipim ol giaman god. Fasin blong ol man Filistia i nogud tumas, from we oli stap wosipim ol giaman god olsem Dagon, mo tu oli traem blong spolem ol man we Jehova i jusumaot olgeta.

Ol man olsem Jonatan, oli luk fasin ya blong go mekem faet olsem wan wok we oli mekem blong Jehova God. Mo Jehova i blesem ol traehad blong Jonatan. Smol taem afta we Sol i kam king, hem i putumap boe blong hem blong i lukaot long grup blong 1,000 soldia, nao Jonatan i lidim olgeta oli go mo oli kilim komanda blong ol man Filistia long Geba. Nating se ol man ya oli no gat tumas tul blong mekem faet, be Jehova i givhan long Jonatan mo i mekem hem i win long dei ya. Nao ol man Filistia oli girap mo oli mekem rere wan bigfala ami blong go mekem faet agensem ol man Isrel. Plante long ol soldia blong Sol oli fraet tumas. Samfala oli ronwe mo oli go haed, mo samfala oli go joenem ol man Filistia blong mekem faet. Be strong tingting we Jonatan i gat i no jenis nating.—1 Samuel 13:2-7; 14:21.

Long dei ya we Jonatan bambae i go mekem faet agens long ol man Filistia, hem i aot we i no mekem noes nating mo hem i tekem nomo man blong karem ol tul blong faet blong hem. Taem tufala i stap kam klosap long ples we ol man Filistia oli stap long hem long Mikmas, Jonatan i talemaot plan blong hem long man blong karem ol tul blong faet blong hem. Bambae tufala i wokbaot pas nomo blong ol soldia blong Filistia we oli stap antap long hil ya oli luk tufala. Sipos ol soldia ya oli singaot i go long tufala blong tufala i go mekem faet long olgeta, hemia nao saen we i soemaot se Jehova bambae i givhan long tufala. Man blong karem ol tul blong faet blong Jonatan i rere nomo blong mekem olsem, maet from ol nambawan toktok we Jonatan i talem, se: “Hae God bambae i givhan long yumi . . . nomata we yumitufala nomo no yumi plante, be bambae yumi save winim olgeta.” (1 Samuel 14:6-10) ?Jonatan i wantem minim wanem?

Jonatan i savegud God blong hem. I sua se hem i mas save se long ol taem bifo, Jehova i bin halpem ol man blong hem blong oli winim ol enemi blong olgeta we oli plante moa long olgeta. Mo samtaem, Jehova i yusum wan man nomo blong mekem ol man blong hem oli win. (Jajes 3:31; 4:1-23; 16:23-30) Taswe, Jonatan i save se i no namba o paoa o ol tul blong faet blong ol man blong God we bambae i mekem se oli win, be hem i bilif blong olgeta. From bilif, Jonatan i letem Jehova i soemaot long hem sipos hem mo man blong karem ol tul blong faet blong hem bambae oli go mekem faet agens long ol man Filistia ya o nogat. Mo hem i jusum wan saen we bambae i soemaot se Jehova i agri long tingting ya. Taem Jehova i givim saen blong soem se hem i agri, kwiktaem nomo Jonatan i go we i no fraet nating.

I gat tu samting long saed blong bilif blong Jonatan. Faswan, hem i soem bigfala respek long God blong hem, Jehova. Hem i save se God ya we i gat bigfala paoa, i no dipen long paoa blong ol man blong wol ya blong mekem ol stamba tingting blong hem oli kamtru. Be yet, Hem i blesem ol man we oli mekem wok blong hem. (2 Kronikel 16:9) Namba tu, Jonatan i wet blong luk sipos Jehova i agri wetem tingting blong hem bifo we hem i tekem aksen. Tede, yumi no nid blong wet mo luk ol saen we oli kam long God, blong save sipos hem i agri wetem ol desisen blong yumi. Tede yumi gat finis Tok blong God, hemia i naf from we i givim evri samting we yumi nidim blong save ol tingting blong God. (2 Timoti 3:16, 17) ?Olsem wanem? ?Yumi stap lukluk i go long Baebol fastaem bifo we yumi mekem wan impoten desisen? Sipos yes, yumi soemaot se yumi tinghae long ol tingting blong God bitim tingting blong yumi wan, sem mak olsem Jonatan.

Ale Jonatan wetem man ya blong karem ol tul blong faet blong hem, tufala i klaem kwiktaem nomo i go antap long hil ya blong ol ston we i go stret long ples blong ol soldia ya. Nao ol man Filistia oli jes luksave se bambae tufala man ya i atakem olgeta, mo oli sanem ol man blong olgeta blong go kilim tufala ya. I sud isi blong ol man Filistia ya oli kilim tufala, from we oli plante moa, mo tu from we oli stap antap long hil we oli save luk evri samting. Be Jonatan i stap faetem olgeta wanwan, mo man blong karem ol tul blong faet blong hem i stap biaenem hem i stap kilim olgeta oli ded. !Long smol taem ya nomo, tufala i kilim 20 soldia we oli ol enemi blong tufala! Mo i no hemia nomo, Jehova i mekem wan narafala samting bakegen. Baebol i talem se: “Nao ol man Filistia olbaot long ples ya oli fraet we oli fraet, mo olgeta we oli stap long ol haos tapolen oli seksek tumas. Nao biaen, graon i seksek, mo Hae God i mekem olgeta oli fraet krangke we oli lusum hed.”—1 Samuel 14:15.

Longwe lelebet, Sol mo ol wajman blong hem oli luk we ol man Filistia oli stap resis olbaot from we oli lusum hed, mo oli stap kilkilim olgeta bakegen. (1 Samuel 14:16, 20) Maet long taem ya ol man Isrel oli tekem janis blong go tekemaot ol tul blong faet blong ol man Filistia we oli ded. Jehova i mekem ol man blong hem oli win long dei ya, mo kam kasem tede fasin blong hem i no jenis nating. Tede, sipos yumi bilif strong long hem, olsem we Jonatan mo man blong karem ol tul blong faet blong hem oli mekem, bambae yumi neva harem nogud from ol samting we yumi jusum blong mekem.—Malakae 3:6; Rom 10:11.

Sol i no glad tumas olsem Jonatan from we hem i mekem sam bigfala mastik. Sol i no obei long profet Samuel, taem hem i bonem sakrefaes we profet nomo i sud mekem, from we hem i wan Livaet. Taem Samuel i kamtru, hem i talem long Sol se fasin we hem i mekem i no stret nating, taswe kingdom blong hem bambae i no stap olwe. Mo tu, bifo we Sol i sanem ol man blong hem blong go mekem faet, hem i talem wan samting we i no waes nating, i se: “I tabu blong man i kakae tede, gogo mi mi kilim ol enemi blong mi blong givimbak olgeta trabol we oli mekem long mi. !Sipos man i brekem tabu ya, bambae hem i mas ded!”—1 Samuel 13:10-14; 14:24.

Ol toktok blong Sol oli soemaot se fasin blong hem i stap jenis. ?Olsem wanem? ? Gudfala man ya blong God we i gat tingting daon i kam wan rabis man we i tingbaot hem wan nomo? Antap moa, Jehova i neva talem wan strong samting olsem long ol gudfala soldia ya we oli wok had blong oli folem. Taswe, ?olsem wanem long ol tok blong Sol we i se “gogo mi mi kilim ol enemi blong mi”? ?Hem i ting se faet ya i long saed blong hem wan nomo? ?Hem i fogetem se stret fasin blong Jehova nao i moa impoten, be i no from we hem i kros mo i wantem givimbak nogud fasin, kasem haenem, o winim faet ya?

Jonatan i no save nating se papa blong hem i putum wan tabu long olgeta. Hem i taed tumas, i nogat paoa afta we oli mekem faet, nao hem i tekem stik blong hem mo stikim wan bed blong hani i kakae, mo wantaem nomo hem i kasembak paoa. Nao wan long ol man blong hem i talemaot se i tabu blong kakae from we Sol i talem long olgeta blong oli no kakae eni samting. Jonatan i girap i se: “!Hemia i wan rabis samting ya we papa blong mi i mekem long yumi! !Yufala i luk! !Mi mi harem gud, mi kam strong nao, from we mi kakae hani ya! Tede ya yumi winim ol man Filistia, mo sipos yumi evriwan i bin kakae ol kakae ya we yumi faenem long ples blong olgeta, bambae i moa gud. Bambae yumi save kilim plante man moa long olgeta oli ded.” (1 Samuel 14:25-30) Ol tok we hem i talem oli tru tumas. Jonatan i wan boe we i stap tru, be hem i no blaen. Hem i no stap agri wetem evri samting we papa blong hem i stap mekem o i talem, mo hemia i mekem we ol narafala oli gat respek long hem.

Taem Sol i harem se Jonatan i brekem tabu ya we hem i putum, hem i no wantem luksave se samting ya we hem i bin talem i krangke nomo. Be i girap i talem se boe blong hem i mas ded. Jonatan i no traem blong agiu o askem papa blong hem blong i sore long hem, nogat. Makem samting we hem wan i talem, i se: “Mi mi stap, mi rere nomo blong ded.” Be ol man Isrel oli girap oli talem se: “!No King! !Man ya nao we i mekem yumi win tede! ?Yu ting se bambae yumi kilim hem i ded? Hae God i laef, i stap we i stap, mo mifala i promes long nem blong hem, se yumi no save kilim hem. Nating we wan smol hea nomo blong hem, be bambae yumi no save pulumaot. Samting ya we hem i mekem tede, God nao i givhan long hem.” Ale, ?wanem i hapen? Sol i luksave se hem i rong. Baebol i talem se: “Long tok ya blong olgeta oli sevem Jonatan, nao hem i no ded.”—1 Samuel 14:43-45.

From we Jonatan i gat strong tingting blong wok strong mo hem i no tingbaot hem wan nomo, ol man oli gat gudfala tingting long hem. Mo taem hem i stap long denja, ol narafala oli rere blong givhan long hem. Yumi mas lukaotgud long ol fasin blong yumi evridei. Baebol i talem se gudnem i impoten tumas. (Prija 7:1) Olsem Jonatan, sipos yumi traehad blong mekem se yumi gat gudnem wetem Jehova, bambae gudnem blong yumi ya i olsem wan sas ston.

Nating se Sol i mekem plante mastik, be Jonatan i gohed blong faet klosap long papa blong hem blong plante yia. Traem tingbaot olsem wanem hem i harem nogud tumas taem papa blong hem i no moa obei long Jehova mo i kam praod. Fasin blong papa blong hem i stap kam moa nogud, mo Jonatan i nogat paoa blong stopem samting ya.

Be problem i kam moa nogud taem Jehova i sanem Sol blong go mekem faet agensem ol man Amalek, we oli ol rabis man, stat long taem blong Moses finis i kam, mo Jehova i bin talemaot finis se bambae hem i spolem ful nesen ya. (Eksodas 17:14) Jehova i talem long Sol blong i kilim olgeta animol blong ol man Amalek, wetem king blong olgeta, hemia Agag. Sol mo Jonatan i winim faet ya. Nating se i olsem, Sol i no obei long Jehova, hem i no kilim Agag i ded mo i tekem ol sas samting blong ol man Amalek wetem ol animol blong olgeta. Nao profet Samuel i talemaot panis we Jehova bambae i mekem long Sol, i se: “Yu yu tanem baksaed finis long Hae God, yu no moa wantem obei long tok blong hem, mo from samting ya, naoia, hem i tanem baksaed long yu, i no moa wantem blong yu yu king blong mifala.”—1 Samuel 15:2, 3, 9, 10, 23.

Samtaem biaen, Jehova i tekemaot tabu spirit blong hem i gowe long Sol. From samting ya, fasin blong hem i jenis bigwan, hem i kam kros mo fraet i kavremap hem. I olsem se God i sanem wan rabis spirit i kam tekem ples blong tabu spirit. (1 Samuel 16:14; 18:10-12) Ating Jonatan i harem nogud tumas blong luk se fasin blong papa blong hem i jenis bigwan. Be, Jonatan i neva stop blong mekem wok blong Jehova. Hem i gohed blong mekem bes blong hem blong sapotem papa blong hem, mo samtaem hem i tok stret long papa blong hem. Hem i gohed blong fasgud long Jehova, God ya we fasin blong hem i neva jenis.—1 Samuel 19:4, 5.

?Yu bin luk finis wan man we yu lavem hem tumas, maet wan famle blong yu, we fasin blong hem i jenis i kam mowas? Hemia wan samting we i save mekem yumi harem nogud tumas. Be eksampol blong Jonatan i mekem yumi tingbaot samting we man blong raetem Sam, i se: “[Jehova]. Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.” (Ol Sam 27:10) Jehova i no save lego ol man blong hem. Nating sipos wan sinman i mekem yu harem nogud, be bambae Jehova i stap wetem yu mo bambae hem i beswan Papa we yu neva tingbaot.

Ating Jonatan i save finis se Jehova i no moa wantem se Sol i king. Be ?wanem tingting blong hem? ?Yu ting se hem i gat tingting ya se bambae hem i wan nambawan king? O ?Hem i traem blong stretem ol mastik blong papa blong hem blong traem soem se hem i wan king we i soemaot gudfala eksampol blong stap tru mo obei? Yumi no save ol tingting we hem i gat. Be yumi save se hem i neva traem blong mekem ol samting ya. ?Hemia i min se Jehova i fogetem gudfala man ya blong hem? Nogat, Jehova i yusum Jonatan olsem wan nambawan eksampol long saed blong fasin blong stap tru, olsem wan trufala fren long Baebol. Fasin we hem i gat i olsem wan trufala fren, bambae i kamaot long nekis haf long saed blong Jonatan.