Buk o divaes—?pikinini blong yu i laekem blong rid long weswan?

 Plante yangfala oli laekem moa ol divaes. Dokta Jean M. Twenge i talem se: “Jeneresen ya i lan blong klik long wan link o skrol i go long nekis pej kwiktaem, taswe oli luk se ol buk oli boring.” a

 I tru, ol divaes oli givhan long yumi long plante rod. Jon we i gat 20 yia, i talem se: “Skul we mi mi go long hem i yusum ol divaes blong rid. Taem mi klik long ‘Lukaotem,’ hemia i givhan long mi blong mi faenem ol infomesen kwiktaem.”

 Ol divaes oli gat plante narafala tul we yumi save yusum taem yumi rid. Wan eksampol: Wan smol klik mo yumi save faenem mining blong wan tok, plei odio, wajem video, o faenem sam narafala save long hyperlink. ?Hemia i min se i moa gud blong rid long divaes i bitim long buk?

 Samfala oli laekem blong yusum buk taem oli stadi dip. ?From wanem?

•   Fokas. Wan tineja we nem blong hem Natan, i talem se: “Taem mi stap yusum divaes, ol advetaesmen mo mesej we oli kamaot, oli pulum tingting blong mi i gowe long samting we mi traem blong fokas long hem.”

   Karen we i gat 20 yia, i fesem sem problem. Hem i se: “Taem mi rid long fon o tablet, i isi blong wan narafala app i pulum ae blong mi, o mi wantem plei wan gem.”

   Rul blong Baebol: “Yusum taem blong yu long rod we i beswan.”—Kolosi 4:5, Phillips.

   Blong tingbaot: ?Pikinini blong yu i bos long tingting blong hem taem hem i stap yusum wan divaes blong rid o stadi? ?Hem i naf blong blokem ol samting we oli save pulum ae blong hem? Sipos no, ?olsem wanem yu save givhan long hem blong i fokas?

   Traem hemia: Givhan long pikinini blong i kasem save se, sipos hem i letem ol narafala samting long divaes i pulum ae blong hem, bambae hem i tekem longtaem moa blong finisim homwok blong hem, mo bambae i gat smol taem nomo blong mekem ol narafala samting we hem i wantem mekem.

•   Kasemsave. Buk ya Be the Parent, Please i talem se: “Oli mekem tes long plante rida, mo oli faenemaot se olgeta we oli rid long divaes oli no kasemsave gud olsem olgeta we oli rid long ol buk.”

   Wan risen, hemia se olgeta we oli yusum divaes blong rid, oli no tekem taem blong tingting long samting we oli ridim, from we oli rid kwiktaem tumas. Nicholas Carr we i raetem wan buk, i talem se: “Taem yumi stap long Intenet, yumi wantem se ol ae mo fingga blong yumi oli muv kwiktaem, blong yumi save kasem plante infomesen long sot taem.” b

   Samtaem i gud blong rid kwik olsem. Be Carr i talem wan problem, se hemia i save “kam olsem bigfala fasin blong yumi.” Taswe, pikinini blong yu i save tekem fasin ya blong rid kwik, be hem i no kasemsave gud.

   Rul blong Baebol: “Nomata wanem samting yu yu gat, be yu mas traehad blong kasemsave samting.”—Ol Proveb 4:7.

   Blong tingbaot: ?Olsem wanem yu save halpem pikinini blong yu, blong i lanem blong lukaot ol dip save, nating se hem i yusum divaes o buk?

   Traem hemia: Yu no mas mekem i strong tumas long hem. Yu no mas ting se hem i mas yusum buk nomo, o hem i mas yusum divaes nomo. I gat sam gudfala samting long saed blong tugeta rod ya. Sam samting long divaes oli save givhan long hem blong i kasemsave. Taswe, yu no mas strong tumas blong folem prapa tingting blong yu, taem yu tokbaot ol gudfala samting mo nogud samting long saed blong divaes mo buk. Mo tu, yu mas luksave se ol pikinini oli defdefren.

•   Rimemba. Long wan atikol long Scientific American, Ferris Jabr i talem se, taem yumi rid long divaes, hemia i save “mekem bren blong yumi i taed moa [i bitim we yumi rid long buk] . . . taswe i had moa blong rimemba ol samting we yumi ridim.”

   Traem tingbaot: Taem yumi rid long buk, yumi “pijarem” long tingting blong yumi, ples long pej we yumi faenem wan spesel poen, mo hemia i givhan long yumi blong rimemba poen ya. I olsem wan “bukmak” we i save halpem yumi blong faenem poen ya bakegen.

   Mo tu, ol man blong mekem risej oli faenemaot se olgeta we oli ridim buk, oli rimemba moa ol save we oli ridim. Hemia from we fasin ya i halpem olgeta blong lanem gud samting we oli ridim.

   Rul blong Baebol: “Yu mas holemgud waestok we i wok gud, mo fasin blong yusum gud tingting.”—Ol Proveb 3:21.

   Blong tingbaot: ?Olsem wanem? ?I had blong pikinini blong yu i kasemsave o rimemba samting we hem i ridim o i stadi long hem? Sipos yes, ?olsem wanem yu save halpem hem blong i kam gud moa blong stadi? ?Yu ting se i gud moa sipos hem i yusum wan buk long ples blong divaes?

   Traem hemia: I moagud yu tingbaot sipos pikinini i stap lanem samting i bitim we yu letem hem i yusum rod we hem i laekem moa. I isi blong ting se yumi rid gud long divaes, be maet yumi no lanem plante samting.