Baebol i talem se “oli kilim [Jisas] i ded long bodi blong man, be hem i laef bakegen long bodi we i spirit.”—1 Pita 3:18; Ol Wok 13:34; 1 Korin 15:45; 2 Korin 5:16.

 Jisas tu i soemaot se bambae hem i no laef bakegen long bodi blong man. Hem i talem se bambae hem i givim ‘mit blong bodi blong hem, blong ol man oli gat laef,’ hemia wan ransom blong pemaot ol man. (Jon 6:51; Matiu 20:28) Sipos hem i laef bakegen long bodi blong man, bambae ransom sakrefaes ya i blong nating nomo. Be i no olsem, from we Baebol i talem se hem i givim mit mo blad blong hem olsem wan sakrefaes, “wan taem nomo mo blong olwe.”—Hibru 9:11, 12.

Sipos Jisas i laef bakegen long bodi we i spirit, ?olsem wanem ol disaepol oli save luk hem?

•  Ol spirit oli save tekem bodi blong man. Long taem bifo, sam enjel oli tekem bodi blong man, mo oli kakae mo dring wetem ol man. (Jenesis 18:1-8; 19:1-3) Be oli save lego bodi blong man mo kam spirit bakegen.—Jajes 13:15-21.

•  Afta we Jisas i laef bakegen, hem tu i tekem bodi blong man blong smoltaem, olsem ol enjel bifo. From we hem i spirit, hem i save kamtru wantaem long ol man, mo hem i save lus bakegen wantaem nomo. (Luk 24:31; Jon 20:19, 26) Hem i no kamtru long ol man long sem bodi evritaem. Taswe, ol gudfala fren blong hem oli luksave hem nomo from ol samting we hem i talem mo i mekem.—Luk 24:30, 31, 35; Jon 20:14-16; 21:6, 7.

•  Jisas i kamtru long aposol Tomas long wan bodi we i gat ol mak blong soa. Hem i mekem olsem blong givhan long Tomas, blong bilif blong hem i kam strong bakegen, from we Tomas i no sua se Jisas i laef bakegen.—Jon 20:24-29.