Baebol i talem se yumi mas glad blong givim samting long narafala, mo yumi no mas mekem blong kasembak samting. Mo tu, Baebol i talem se taem yumi givim samting long gladhat, yumi harem gud mo yumi mekem narafala i harem gud tu. (Ol Proveb 11:25; Luk 6:38) Jisas i talem se: “Man i harem gud moa taem hem i givim samting long narafala, i bitim we hem i kasem samting.”—Ol Wok 20:35.

•  ?God i glad long wanem kaen fasin blong givim samting?

•  ?God i no glad long wanem kaen fasin blong givim samting?

•  Ol vas blong Baebol

 Taem yumi glad blong givim samting, yumi harem gud moa. Baebol i talem se: “I gud olgeta man wanwan oli givim samting olsem we oli jusumaot finis long hat blong olgeta. I nogud oli no glad, be oli givim, no oli harem olsem we narafala i fosem olgeta, from we God i lavem man we i glad blong givim samting.”—2 Korin 9:7, futnot.

 Givim samting wetem fulhat blong yumi, hemia haf blong “wosip” we God i glad long hem. (Jemes 1:27) Taem man i givim samting we narafala i nidim, God i tingbaot samting ya olsem wan lon we man ya i givim long hem. (Ol Proveb 19:17) Baebol i talem se God bambae i givimbak pei long hem.—Luk 14:12-14.

 Taem yumi givim wetem tingting we i no stret. Olsem yumi givim:

•   Blong ol man oli leftemap yumi.—Matiu 6:2.

•   Blong kasembak wan samting.—Luk 14:12-14.

•   Blong traem pulum God blong i sevem yumi.—Ol Sam 49:6, 7.

 Taem oli yusum presen ya blong mekem samting we God i no laekem. Taswe, i rong blong givim mane long wan man we bambae i yusum mane ya blong plei laki o pem drag mo strong dring. (1 Korin 6:9, 10; 2 Korin 7:1) Long sem fasin, i no stret blong givim mane long wan man we hem i naf blong wok be i stap les nomo.—2 Tesalonaeka 3:10.

 Taem yumi givim tumas samting, nao yumi no gat naf blong famle blong yumi. Baebol i talem se hed blong famle i mas wok blong kasem ol samting we famle i nidim. (1 Timoti 5:8) I no stret we hed blong famle i givim tumas samting long ol narafala, nao hem i no naf blong givim ol samting we stret famle blong hem i nidim. Long sem fasin, Jisas i jajem ol man we oli no wantem lukaot long olfala papa mo mama blong olgeta, from we oli talem se ol samting we oli gat oli “givim finis i go long God.”—Mak 7:9-13.