?God i Yusum Evolusen Blong Krietem Ol Defren Kaen Laef Samting?

PLEI

Ansa we Baebol i givim

Nogat. Baebol i talem klia nomo se God i krietem ol man wetem ol defren “kaen” animol mo plant. a (Jenesis 1:12, 21, 25, 27; Revelesen 4:11) Hem i talem se olgeta man oli kamaot long tufala faswan perens blong yumi, hemia Adam mo Iv. (Jenesis 3:20; 4:1) Stori blong Baebol i no sapotem tingting ya se God i yusum evolusen blong mekem se ol defren kaen laef samting oli stap. Be Baebol i agri wetem save blong sayens we i talem se evri laef samting oli gat defdefren kaen blong olgeta. b

?God i yusum evolusen?

Ol man we oli bilif se God i yusum evolusen blong krietem ol laef samting, oli gat defren tingting long wei we hem i mekem olsem. Sam man oli bilif se “naturol seleksen c i wan rod we God i yusum blong mekem ol samting long wol.”

Bilif ya i save minim ol tingting ya tu:

Evri laef samting oli kamaot long wan samting we i laef bifo we bifo olgeta.
Wan kaen laef samting i save jenis fulwan i kam wan narafala kaen laef samting, hemia wan tingting we samtaem oli kolem se makroevolusen.
Long sam wei, God nao i mekem ol jenis ya.

?Evolusen i laenap wetem Baebol?

Bilif ya se God i yusum evolusen blong krietem ol laef samting, i givim tingting se stori blong Jenesis long saed blong kriesen, i no rili tru. Be, Jisas i bilif se stori blong Jenesis i tru from we hem tu i tokbaot. (Jenesis 1:26, 27; 2:18-24; Matiu 19:4-6) Baebol i talem se bifo we Jisas i kam long wol, hem i laef long heven wetem God, mo i joen wetem hem blong “mekem olgeta samting.” (Jon 1:3) Taswe, tingting ya se God i yusum evolusen blong krietem olgeta defren laef samting, i no laenap wetem ol tijing blong Baebol.

?Olsem wanem long fasin ya blong ol plant mo animol we oli naf blong jenis mo stap laef?

Baebol i no eksplenem se wan laef samting i save gat hamas defren kaen blong hem. Mo tu, hem i no agensem tingting ya se ol defren kaen animol mo plant we God i krietem, oli save jenis taem oli stap long wan niufala envaeronmen, o taem oli stap kam plante. Nating sipos sam man oli ting se ol jenis ya oli wan kaen evolusen, be jenis ya i no krietem wan niufala kaen laef samting.

a Baebol i yusum tok ya “kaen,” we mining blong hem i bigwan moa, i bitim tok ya “spesis” we ol saentis oli stap yusum. Plante taem, ol saentis oli jusum blong talem se wan niu spesis i kamaot, be rili hem i sem kaen laef samting nomo we i jenis smol, olsem tok ya we i stap long stori blong Jenesis.

b Samtaem oli kolem tingting ya se maekroevolusen.

c Naturol seleksen hem i tingting ya se wan animol o plant we i gud moa long wan envaeronmen, i save laef i stap mo kam plante.