Baebol i yusum wan pijatok blong soemaot olsem wanem ol man long trufala skul oli defren long ol narafala, i se: “Bambae yufala i luksave olgeta long frut blong laef blong olgeta. ?Yufala i ting se man i save tekem frut blong grep long ol ropnil, mo frut blong fig long ol rabis gras?” (Matiu 7:16) Yumi luksave olsem wanem rop blong grep i defren long ropnil from frut blong hem, mo long sem fasin, yumi luksave trufala mo giaman skul from frut blong olgeta. Hemia ol frut olsem:

1.   Trufala skul i tijim trutok we i kamaot long Baebol, be i no waes blong wol. (Jon 4:24; 17:17) Hemia trutok long saed blong ol samting olsem sol, mo hop blong laef we i no save finis long paradaes long wol. (Ol Sam 37:29; Aesea 35:5, 6; Esikel 18:4) Mo tu, trufala skul i no fraet blong talemaot ol rong tijing blong ol giaman skul.—Matiu 15:9; 23:27, 28.

2.   Trufala skul i givhan long ol man blong oli save God, mo prapa nem blong hem Jehova. (Ol Sam 83:18; Aesea 42:8; Jon 17:3, 6) Trufala skul i no tijim se yumi no naf blong save God, mo hem i no wantem save yumi from we hem i hae tumas, be i tijim se hem i wantem we yumi fren gud wetem hem.—Jemes 4:8.

3.   Trufala skul i tokbaot Jisas Kraes olsem rod we God i yusum blong sevem yumi. (Ol Wok 4:10, 12) Olgeta long trufala skul oli obei long ol tok blong Jisas, mo oli traehad blong folem eksampol blong hem.—Jon 13:15; 15:14.

4.   Trufala skul i tijim se Kingdom blong God nomo i hop blong ol man. Olgeta long trufala skul oli talemaot Kingdom ya long ol narafala man.—Matiu 10:7; 24:14.

5.   Trufala skul i tijim ol man blong oli tingbaot ol narafala fastaem mo lavem olgeta. (Jon 13:35) Skul ya i tijim se yumi mas respektem ol man blong ol narafala kantri, mo i welkamem ol man blong ol defdefren kala, kalja, lanwis, mo famle. (Ol Wok 10:34, 35) From we ol man blong trufala skul oli lavlavem olgeta, oli no joen long ol faet.—Maeka 4:3; 1 Jon 3:11, 12.

6.   Trufala skul i no gat ol lida we oli pem olgeta, mo oli no singaot ol man we oli lukaot long olgeta long ol taetel.—Matiu 23:8-12; 1 Pita 5:2, 3.

7.   Trufala skul i no joen nating long politik. (Jon 17:16; 18:36) Be ol man blong hem oli respektem gavman mo oli obei long gavman, folem samting we Baebol i talem, se: “Ol samting we oli blong Sisa [ol haeman], yufala i givimbak long Sisa, mo ol samting we oli blong God, yufala i givimbak long God.”—Mak 12:17; Rom 13:1, 2.

8.   Trufala skul i wan fasin blong laef, be i no ol kastom, o ol samting we yu mekem blong soem yu nomo. Ol man blong trufala skul oli folem ol gudfala fasin we Baebol i leftemap, long evri haf blong laef blong olgeta. (Efesas 5:3-5; 1 Jon 3:18) Oli no harem nogud blong mekem olsem, be oli glad blong wosipim “hapi God ya.”—1 Timoti 1:11.

9.   Baebol i talem se bambae i no gat plante man we oli folem trufala skul. (Matiu 7:13, 14) Mo tu, ol narafala man bambae oli lukluk daon long olgeta, jikim olgeta, mo ronem mo kilim olgeta, from we oli mekem samting we God i wantem.—Matiu 5:10-12.

Trufala skul i no minim nomo ‘skul we i stret long mi’

 I denja blong jusum wan skul from we i mekem yu yu harem gud. Baebol i talem se i gat wan taem we bambae ol man “oli go lukaot plante narafala tija olbaot [long saed blong skul], we oli save switim sora blong olgeta.” (2 Timoti 4:3) Be Baebol i pulum yumi blong folem ‘wosip we i klin mo i no gat doti long hem long fes blong God mo Papa blong yumi,’ nating se ol narafala man oli no glad long skul ya.—Jemes 1:27; Jon 15:18, 19.