Nogat, wol bambae i neva lus, o bon long faea, mo bambae i no gat wan narafala wol i tekem ples blong hem. Baebol i tijim se God i wokem wol ya blong man i laef long hem blong olwe.

•   “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29.

•   “[God i] putum wol ya i stap strong long fandesen blong hem, we bambae hem i no save muf nating.”—Ol Sam 104:5.

•   “Wol ya, hem i stap sem mak nomo, i no jenis nating.”—Prija 1:4.

•   “[God] i wokem wol ya, mo i mekem i strong, blong i save stap longtaem . . . hem i no mekem blong i ples nating nomo, hem i mekem blong man i save stap long hem.”—Aesea 45:18.

 God bambae i no letem ol man oli spolem wol ya long ol faet, o from ol doti we oli sakem long win mo wota, o eni narafala samting. Be God bambae i “spolem ol man ya we oli stap spolem wol.” (Revelesen 11:18) ?Bambae hem i mekem samting ya olsem wanem?

 Kingdom blong God long heven bambae i tekem ples blong ol gavman blong man we oli no lukaot gud long wol. (Daniel 2:44; Matiu 6:9, 10) Jisas Kraes we i pikinini blong God bambae i rul long Kingdom ya. (Aesea 9:6, 7) Taem Jisas i stap long wol, hem i mekem plante merikel, blong soemaot paoa we hem i gat long ol samting raonabaot long yumi, olsem win mo solwota. (Mak 4:35-41) Taem Jisas i rul, bambae i gat paoa long evri samting long wol ya. Hem bambae i mekem wol ya i kam niuwan bakegen, olsem garen blong Iden bifo.—Matiu 19:28; Luk 23:43.

 No, i no olsem. Ol man oli kasem rong tingting taem oli ridim 2 Pita 3:7, we i se: “Be skae mo graon we i stap naoia, . . . tufala i stap wet blong bambae faea i kasem tufala.” Traem makem tu impoten samting we i save givhan long yumi blong kasem save mining blong vas ya:

1.   Long Baebol, ol tok ya “heven,” “wol,” mo “faea”oli save minim plante samting. Traem tingbaot, long Jenesis 11:1, sam Baebol oli talem se: “Fastaem, wol i gat wan lanwis nomo.” Long vas ya, “wol” i minim ol man.

2.   Ol vas raonabaot long 2 Pita 3:7 oli talemaot stret mining blong ol tok ya heven, wol, mo faea. Vas 5 mo 6 i tokbaot bigfala wota we i ron long taem blong Noa. Long taem ya, wol blong bifo i lus, be graon i no lus. Wota i spolem ol rabis man nomo, hemia “wol.” (Jenesis 6:11, NW) Hem i spolem “skae” tu, we i minim ol man we oli rulum wol. Taswe, long taem ya, ol rabis man nao oli lus, be i no graon. Noa mo famle blong hem oli laef tru long taem ya we God i spolem wol, mo oli gohed blong laef long sem graon ya afta we bigfala wota i ron.—Jenesis 8:15-18.

 “Faea” we 2 Pita 3:7 i tokbaot i sem mak long bigfala wota long taem blong Noa. Hem i min se bambae ol rabis man oli lus, be i no wol blong yumi.[2] God i promes se bambae i gat “niufala skae mo wan niufala wol we stret fasin nomo bambae i stap long tufala.” (2 Pita 3:13) “Niufala wol” hemia ol man, we bambae oli stap aninit long rul blong wan “niufala heven” hemia niufala gavman ya Kingdom blong God. Aninit long rul blong Kingdom ya, wol bambae i kam wan Paradaes we ol man oli stap long pis.—Revelesen 21:1-4.