Ukpo 1934 ẹre a biẹ mwẹ. Switzerland ẹre evbibiẹ mwẹ ke rre, sokpan ma keghi ya yin ẹvbo ọkpa na tie ẹre Timmins, nọ re ovbi ẹvbo ọkpa nọ rre Ontario, vbe Canada, emwa ni gualọ emwi ighobioye vbe uwu otọ ẹre ọ mobọ rre ẹvbo na. Vbọ ghi rre odẹ ukpo 1939, iye mwẹ keghi suẹn gha tie Watchtower, ọ na vbe suẹn gha yo iko ọghe Avbe Osẹe Jehova. Ọ kegha rhie imẹ vbe etẹn mwẹ lele egbe, etẹn ehan ẹre I mwẹ. Vbọ ma he kpẹẹ vba, ọ keghi do khian ọkpa vbe Avbe Osẹe Jehova.

Erha mwẹ ma zẹdẹ ghọghọ ye ọna, sokpan te emwi ne iye mwẹ ghaa ruẹ wa gha yẹẹ ọre, ọ na vbe tama egbe ẹre wẹẹ, te irẹn khian rhikhan mu e Jehova. Uhiẹn, vbe ẹghẹ na na mu awua ye iwinna Avbe Osẹe Jehova vbe Canada vbe ukpo 1940, iye mwẹ ma ye sẹ e Jehova rae. Vbe uwu ẹghẹ na, te iye mwẹ wa ye gha ya obọ esi mu erha mwẹ, erriọ vbe ya gha ya ọghọ nẹẹn, agharhemiẹn wẹẹ, te erha mwẹ wa gha ya ukpẹ rri ọre. Igiemwi esi ọghe iye mwẹ wa ru iyobọ ne imẹ vbe etẹn mwẹ ya do la odẹ ẹmwata. Erha mwẹ keghi do gha ya obọ esi mu ima vbene ẹghẹ ya khian, ọna wa ya ima gha ghọghọ.

Vbe ẹghẹ uyunmwu ọghe ukpo 1950, I keghi yo Theocracy’s Increase Assembly vbe New York City. Etẹn nikpia kevbe etẹn nikhuo ni ke ehe ughughan rre vbe uhunmwu otagbọn na kevbe avbe emwi ne I miẹn ruẹ vbe obọ etẹn ni yo Owebe Gilead na nọ rẹn ọta vbe asikoko nii, wa gele ru iyobọ mẹ! Ẹre I na ghi kha wẹẹ, I gha la iwinna ugamwẹ ẹghẹ hia. Vbe I ghi wa sẹ owa I keghi rhie obọ ye iwinna arọndẹ ọghe ẹghẹ hia. Abotu nọ rre Canada keghi gbẹn gu mwẹ wẹẹ, ne I ka dinmwiamẹ nẹ. October 1, 1950 ẹre I dinmwiamẹ. Uki ọkpa ghi gberra nẹ, I keghi rhie obọ ye iwinna arọndẹ ọghe ẹghẹ hia, a na ghi vbe gie mwẹ gha rrie Kapuskasing. Eke ne I ghi rrie na wa gha rree ne eke ne ẹgbẹe mwẹ ye.

 Vbe ukpo 1951, abotu keghi rhie igiọdu ne etẹn ni gua zẹ e French ne iran si gha rrie eke na na zẹ urhẹvbo e French vbe Quebec. A wa gha gualọ iyobọ etẹn vbe evba. I ghaa zẹ e French kevbe Ebo, rhunmwuda ọni, I keghi rhie egbe ladian, ẹre a na ghi gie mwẹ gha rrie Rouyn. I ma rẹn ọmwa rhọkpa vbe evba. Zẹvbe ne I ka tae sin, adrẹsi na rhie mẹ ẹre I ghaa loo ya gualọ owa ne I rrie. Sokpan emwi hia keghi khian ẹse. Mẹ vbe Marcel na do khian ọse ne kankankan, I wa sọyẹnmwẹ iwinna ugamwẹ mwẹ vbe Quebec vbe ukpo enẹ ne I ya gha rre evba vbene ẹghẹ ya khian I na suẹn gha ga zẹvbe arọndẹ ne kpataki.

Vbe I rre Quebec, I keghi ghọghọ vba tie mwẹ gha die Owebe nogie 26 ọghe Gilead vbe South Lansing, nọ rre New York. I ladian vbe owebe nii vbe February 12, 1956, ẹvbo ọkpa na ghi tie ẹre Ghana, b vbe West Africa ẹre a gie mwẹ gha rrie. Sokpan I ke kpa, te I khian ka dọlegbe gha rrie Canada “vbe uzọla eso,” a te miẹn we ebe asẹ mwẹ ladian.

Sokpan uki ihinrọn ẹre I gbe vbe Toronto ne I ya gha khẹ ebe asẹ nii. Vbe uwu ẹghẹ na, owa ọghe ẹgbẹe Cripps ẹre I ghaa ye, evba nii ẹre I na rẹn Sheila, ne ovbi iran nokhuo. Ma keghi do hoẹmwẹ egbe. Kherhe ẹre ọ ghi kẹ ne I nọ rẹn deghẹ ọ gha rọnmwẹ mwẹ, ẹre ebe asẹ mwẹ na wa ladian. Mẹ vbe Sheila ghi mu ẹmwẹ na ye erhunmwu nẹ, ima eva na ghi kue yọ wẹẹ, I gha yo ehe na gie mwẹ gha rrie. Ma na wẹẹ, ma a gha gbẹn eleta gie egbe, ma ghi vbe zin egbe kherhe ne ima mieke na ghee ẹre ghee deghẹ ma gha ye sẹtin rọnmwẹ egbe vbe odaro. Ọ ma zẹdẹ gha khuẹrhẹ ne ima, sokpan ma wa ghọghọ ye azẹ ne ima ru nii.

Ọwara uki ọkpa ẹre ọ rhie re I ke sẹ Accra, nọ rre Ghana. I la okọ, I la okọ erhẹn, I vbe la okọ ẹhoho. I na gha ga zẹvbe ọgbaroghe ọghe odin vbe evba. Rhunmwuda ọni, I wa mu okhian yo ẹvbo ughughan vbe Ghana, uhiẹn I mu otuẹ yo ẹvbo eso ni rre ọkpẹn Ghana vbe na ghee Ivory Coast (na ghi tie ẹre Côte d’Ivoire) kevbe Togoland (na ghi tie ẹre Togo). Mẹ ọkpa ẹre ọ mobọ gha mu otuẹ yo avbe ẹvbo na, imọto ọghe abotu ẹre I ghaa loo. Te I wa sọyẹnmwẹ iwinna ugamwẹ na!

 I ghaa mwẹ iwinna ne I ghaa ru vbe avbe asikoko nekherhe vbọ ghaa rre ufomwẹ uzọla. Ma ma gha mwẹ Ọgua Asikoko rhọkpa. Rhunmwuda ọni, avbe etẹn ghi loo ekpokoro kevbe ewanmwẹ ya ru irhu ne ovẹn nọ tua ghẹ mieke na gbe iran. Iran ma gha mwẹ fridge na viọ evbare yi nẹ ghẹ mieke na rhia, rhunmwuda ọni, ọ mwẹ eke ne iran ghaa viọ avbe aranmwẹ yi vbe ọkpẹn evba. Ẹghẹ gha sẹ, iran ghi ya viọ eso ne iran khian gbele ya le evbare ne emwa ni rrie asikoko.

Emwi eso wa gha sunu vbe avbe asikoko na ni ghaa ya ima giẹ. Ọ mwẹ ẹghẹ ne ọtẹn nokpia ọkpa na tie ẹre Herb Jennings c ya gha ya ọta guan, arọndẹ na gie yo isi vbe gha nọ. Zẹvbe nọ ya gha ya ọta nii guan, ẹmila ọkpa na wa lẹẹ hin eke na na le evbare rre. Ọ na gha die eke na na ya ọta guan, ne emwa na gbẹbu. Ọtẹn Nokpia Herb na ghi dobọ yi, nene ẹmila ma ghi rẹn eke nọ khian la ghee. Sokpan etẹn nikpia enẹ ni kakabọ mwẹ ẹtin keghi muẹn werriegbe gha rrie eke na na le evbare, etẹn ni gbẹbu na ghi gha kpee obọ.

Vbe uwu uzọla ọghe avbe asikoko na, I ghi ya kpee vidio ọghe ima nọ khare wẹẹ, The New World Society in Action vbe avbe igue ni sikẹ eke ne ima ye. I ghi de ukpọn ọkpa na tie ẹre canvas sheet ye erhan eva ra e pole eva, I ghi mu e projector ye odaro ẹre, ne iran mieke na gha bẹghe ikueta na vbe ukpọn nii. Ikueta na wa gha yẹẹ emwa ni rre avbe igue na! Nọ ne enibun vbe uwu iran, ọna kegha re ẹghẹ okaro ne iran he ya ghee ikueta. Iran ghi wa ya ekhọe hia gha kpee obọ vbe iran gha bẹghe emwa ni dinmwiamẹ vbe ikueta nii. Ikueta na wa ru iyobọ ne iran ya rẹn wẹẹ, otu nọ mwẹ akugbe vbe uhunmwu otagbọn hia ẹre ima khin.

Vbe I ghi gbe odẹ ukpo eva nẹ vbe Africa, ẹkpotọ keghi kie mẹ ya yo asikoko ọghe emwa ni ke ẹvbo ughughan rre vbe ukpo 1958 vbe New York City. Te ẹko wa gha sẹ mwẹ ọyẹnmwẹ. I ma sẹtin ghọghọ vbe I miẹn Sheila, e Quebec ẹre ọ ke gha die asikoko na, evba nii ẹre ọ na gha ga zẹvbe arọndẹ ne kpataki. Vbe nọ te sẹ ẹghẹ na, elẹta ẹre ima ya gha guan, sokpan vbe ima ghi miẹn egbe, I na nọ rẹn deghẹ ọ gha rọnmwẹ mwẹ, ọ na wa kue yọ. Ẹre I na ghi nọ Ọtẹn Nokpia Knorr d deghẹ Sheila gha sẹtin yo Owebe Gilead, nọ mieke na sẹtin do deba mwẹ ru iwinna ugamwẹ vbe otọ Africa. Ọ keghi kue yọ. Ẹre Sheila na ghi gha die Ghana. October 3, 1959 ẹre ima ru orọnmwẹ vbe Accra. Ma wa bẹghe ẹre wẹẹ, te Jehova wa gele fiangbe ima rhunmwuda ne ima na mu ugamwẹ ọghẹe karo vbe ẹdagbọn ima.

Vbọ ghi rre ukpo 1961 otu na gie ima gha rrie Cameroon. Otu keghi tama mwẹ wẹẹ, ne I deba etẹn eso winna na mieke na mu abotu ọghe ọgbọn gbọọ, rhunmwuda ọni, I wa gha mwẹ iwinna nibun ne I ru vbe obọ. Ugbẹnvbe a miẹn wẹẹ, te I da suẹn gha ga zẹvbe ọmwa nọ siẹnro iwinna ima vbe ẹvbo nii, emwi wa bun nọ khẹke ne I ruẹ. Ọ ghi rre ukpo 1965 ma na do bẹghe ẹre wẹẹ, e Sheila hanmwa. Ma ma rherhe yayi wẹẹ, ima ẹre ọ khian wa vbe do gha re evbibiẹ emọ. Sokpan vbe ẹmwẹ ọmọ na ghi suẹn gha gbe ima otiti kevbe vbe ima ghi suẹn gha mu egbe ne ima ya dọlegbe gha rrie Canada, emwi nọ wegbe na ghi sunu.

Egbe keghi gu e Sheila ro. Ọbo ebo na tama ima wẹẹ, okpia ẹre nene ọmọ te khin. Ọ gberra ukpo 50 ne ọna ghi ya sunu, sokpan, te ima ye ye ẹre rre. Agharhemiẹn wẹẹ, emwi nọ sunu na kakabọ da ima, ma na ye gha ru iwinna ugamwẹ ima vbe Africa, te iwinna na wa gha yẹẹ ima.

A wa mobọ gha zẹ etẹn ni rre Cameroon kpokpo rhunmwuda ne iran ma na gha mwẹ obọ vbe ẹmwẹ otu azẹ. Ẹghẹ ne ukpokpo na ya tua sẹ, ọre ẹghẹ na ya zẹ president ye ukpo arriọba. Emwi ne ima wa gha na erhunmwu nẹ ghẹ sunu na gele do sunu vbe May 13, 1970, a keghi mu awua ye iwinna Avbe Osẹe Jehova. Arriọba na ghi miẹn ima abotu ọgbọn ne mose mose ne ima da bọ, uki isẹn ẹre ọ ghaa ye ne ima he ya si laọ. Vbe uwu uzọla ọkpa kẹkan, a na khulo arọndẹ na gie yo isi hia ni rre ẹvbo nii hin ẹvbo nii rre, ya sẹ egbe imẹ vbe Sheila. Ẹmwẹ etẹn ni rre evba wa kakabọ gha da ima vbe ima khian ghi kpa, rhunmwuda ma ya ekhọe hia hoẹmwẹ iran, ma vbe gha si osi rhunmwuda ma ma rẹn vbene iran khian khian hẹ vbe ima gha kpa nẹ.

Ẹre ima na ghi gha rrie abotu nọ rre France, uki ehan ẹre ima gbe vbe evba nii. Evba ẹre I ke gha ru iyobọ ne etẹn ni rre Cameroon. Vbọ ghi rre December vbe ukpo nii, otu na ghi gie ima gha rrie abotu nọ rre Nigeria, abotu na ẹre ọ ghi gha siẹnro iwinna ne etẹn ru vbe Cameroon. Etẹn ni rre Nigeria wa ya ekhọe hia gbe ọbokhian ne ima, ma wa vbe sọyẹnmwẹ iwinna ugamwẹ ọghe ima vbe ẹvbo na vbe ukpo eso.

Vbọ ghi rre ukpo 1973, ọ mwẹ azẹ nọ wa gha lọghọ ima na ru. Sheila kegha mwẹ emianmwẹ nọ wegbe nọ ghaa khuọnmwi. Vbe ima ghi rre asikoko nọkhua vbe New York, ọ na wa gbe akhe eve rua, ọ na kha wẹẹ: “I i ghi sẹtin! Ẹghẹ hia ẹghẹ hia ẹre I wa ya khuọnmwi.” Ọ gberra ukpo 14 ne ima eva ke ga vbe West Africa. Ọ wa gele hia, te I wa yae hio, sokpan, ọ mwẹ afiwerriẹ eso nọ khẹke ne ima ru. Ma ghi koko zẹ iro yan ẹmwẹ na nẹ, ma na rhiegba ye erhunmwu na na, ma na ghi wẹẹ, ma gha dọlegbe gha rrie Canada, na mieke na sẹtin gbaroghe ọvbokhan mwẹ ẹse. Azẹ nọ ghi lọghọ sẹ ne ima he ru, ọre ne ima na dobọ iwinna arọndẹ na gie yo isi kevbe iwinna ugamwẹ ẹghẹ hia yi, te ọ wa gele da ima.

Vbe ima ghi sẹ Canada, I na suẹn gha winna lele ọse mwẹ nẹdẹ ọkpa nọ khian imọto vbe ẹvbo ọkpa nọ rre odẹ okuọ ọghe Toronto. Ma keghi mu owa, ma na vbe dẹlẹ emwi hia ne ima gualọ, sokpan emwi na ka loo nẹ ẹre ima dẹlẹ, erriọ ima ya suẹn agbọn vbene ima ma na de ye osa rhọkpa. Ma ma zẹdẹ mu ẹmwẹ igho yan uhunmwu, rhunmwuda ma  ya aro yọ wẹẹ, ẹdẹ ọkpa khẹ ẹdẹ ọkpa ma gha dọlegbe la iwinna ugamwẹ ẹghẹ hia. Ọ keghi wa kpa ima odin wẹẹ, a ye tie ima vbe iwinna ugamwẹ ẹghẹ hia, ma ma te zẹdẹ ya aro yọ.

I keghi suẹn gha deba etẹn ni bọ Ọgua Asikoko winna vbe Norval, nọ rre Ontario. Ẹdẹ Satọde ẹre I ya gha yo. Vbene ẹghẹ ya khian, iran na we ne I gha gbaroghe Ọgua Asikoko na (Assembly Hall overseer). Egbe Sheila keghi fẹko gha situa, ma na ghi zẹ ọre vbe iro wẹẹ, ọ gha sẹtin deba mwẹ vbe iwinna na. Rhunmwuda ọni, vbe June 1974, eke ne emwa dia vbe Ọgua Asikoko nii ẹre ima ghi si gha rrie. Ma ma sẹtin ghọghọ wẹẹ, ma dọlegbe suẹn iwinna ugamwẹ ẹghẹ hia!

Ma wa ghọghọ wẹẹ, emianmwẹ ọghe ọvbokhan mwẹ keghi si yo. Ukpo eva ghi gberra nẹ, ma na ghi dọlegbe suẹn iwinna ọgbaroghe ọghe otako. Eke ne ima na gha ga kegha rre Manitoba, nọ rre Canada, oni oguozizi wa fi vbe evba. Etẹn ni rre evba wa gele gha mwẹ ahoẹmwọmwa. Ma do bẹghe ẹre nẹ wẹẹ, ẹ i re iwinna ne ima ru vbe ugamwẹ e Jehova ẹre ọ ru ekpataki sokpan, ne ima ye gha ga e Jehova ẹre ọ ru ekpataki.

Vbe ima ghi ru iwinna ọgbaroghe ọghe otako na la ukpo eso nẹ, ọ ghi rre ukpo 1978 otu na wẹẹ, ne ima ya ga vbe Bẹtẹl nọ rre Canada. Vbọ ma he kpẹẹ vba, ọ mwẹ emwi nọ sunu nọ gele da mwẹ, sokpan I wa vbe miẹn emwi ruẹ vbọ. A keghi we ne I ya ọta guan vbe French vbe iko ne kpataki ọkpa na do vbe Montreal, ughaẹdẹ ọkpa vbe ukhiọnmwẹ ẹre a rhie mẹ. Ọ wa da mwẹ wẹẹ, ọta ne I ya guan vbe ẹdẹrriọ ma rhiẹnrhiẹn emwa ni gbẹbu, ẹre ọtẹn nokpia ọkpa nọ rre Service Department na ghi do rhie adia mẹ. I ma te rẹn vbe ẹghẹ nii wẹẹ, I i re ọmwa nọ mobọ gua ya ọta guan. Rhunmwuda ọni, I ma miẹn adia ọghe ọtẹn nokpia nii yi. Ma wa gui vbe ẹdẹrriọ, I na gha roro ẹre wẹẹ, ọ ma mu ẹmwẹ ye owa ẹse, kevbe wẹẹ, ọ ma zẹdẹ tian mwẹ. Te I wa ba ẹre ku vbe ẹdẹrriọ, rhunmwuda, vbene ọtẹn ni ya rhie adia nii mẹ kevbe aro ọmwa ne I ghee ẹre wẹẹ ọ khin, ẹre I wa rhie aro tua ẹ i re adia nọ rhie mẹ.

Ọ ghi rre ikpẹdẹ eso vba, ọtẹn nokpia ọkpa nọ re ọkpa vbe agbaziro ọghe etẹn ni siẹnro abotu keghi do gu mwẹ guan vbekpa emwi nọ sunu na. Ẹre I na tama rẹn wẹẹ, I ma miẹn adia ne ọtẹn nii rhie mẹ yi, I na vbe tama rẹn nẹ ghẹ gui. Ẹre I na ghi ya gu ọtẹn nii nọ rhie adia mẹ zẹ iro. I keghi rinmwiaẹn, ọ na wa yabọ mwẹ. I i sẹtin mianmian emwi nọ sunu na, rhunmwuda ọ ya mwẹ rẹn vbe nọ ru ekpataki sẹ hẹ ne ọmwa gha mu egbe rriotọ. (Itan 16:18) Ẹ i re avbiẹ inugba ẹre I he mu ẹmwẹ na ye erhunmwu, I na rinmwian e Jehova nọ ru iyobọ mẹ ne I sẹtin gha miẹn adia yi.

Ọ gberra ukpo 40 nẹ nian ne I ke ga vbe Bẹtẹl nọ rre Canada, kevbe wẹẹ, ke ukpo 1985 gha dee ẹre I ke ga zẹvbe ọkpa vbe Agbaziro Ọghe Abotu. February 2021, ẹre ọvbokhan mwẹ ne uwa vbiẹ re vbe uwu. Ẹmwẹ ọnrẹn wa ye da mwẹ, emianmwẹ ne I khuọnmwi vbe rre evba. Sokpan, te I wa rhiegba ye ugamwẹ e Jehova sẹrriọ wẹẹ, I i ghi “si osi ye ẹmwẹ deghẹ a tọ ra a i tọ.” (Asan 5:20) I werriẹ aro daa ọlọghọmwa eso vbe ẹghẹ nọ gberra, sokpan emwi nọ ya mwẹ sọyẹnmwẹ ẹre ọ bun sẹ. I wa miẹn afiangbe nibun rhunmwuda ne I na mu ugamwẹ e Jehova karo, ukpo 70 ẹre ọ ye na ne I ya rre iwinna ugamwẹ ẹghẹ hia, I wa gele sọyẹnmwẹ ọnrẹn. Erhunmwu ne I na ọre ne etẹn ima nikpia kevbe etẹn ima nikhuo ni re igbama mu e Jehova ye okaro vbe ẹdagbọn iran, rhunmwuda I wa ya ekhọe hia yayi wẹẹ, iran gha wa vbe sọyẹnmwẹ ọnrẹn.