IVBIOTU E KRISTI vbe orre nokaro keghi loo ẹrhiọn ya kporhu “iyẹn nọ maan ọghe Arriọba” ma emwa nibun. (Mat. 24:14) Eso kue mu okhian gha rrie ẹvbo ọvbehe ya gha kporhu. Vbe igiemwi, ukọ e Pọl keghi kporhu ẹsẹsẹmwẹse vbe ọ mu okhian gha rrie ẹvbo na ghi tie ẹre Turkey vbe ẹghẹ na. * Ukpo 2014, nọ gba vbe ukpo 2,000 ne Pọl ya kporhu vbe ẹvbo nii, ẹre etẹn ru emwamwa ne kpataki ne iran vbe ya kporhu vbe evba. Vbọzẹe ne iran na ru emwamwa na? De emwa ni ghaa mwẹ obọ vbọ?

Etẹn ni ya iyẹn wewe vbe Turkey gberra 2,800, sokpan emwa ni rre ẹvbo nii keghi re ẹbo 79. Ọni rhiema wẹẹ, emwa ni rrie odẹ 28,000 ẹre ọtẹn ọkpa nọ ya iyẹn wewe khian kporhu ma. Nọ rhiema wẹẹ, ibozẹghẹ emwa ẹre etẹn he sẹtin kporhu ma vbe ẹvbo nii. Evbọzẹe ne etẹn na ru emwamwa na, ọre ne iran sẹtin loo ovbi ẹghẹ kherhe ya kporhu ma emwa nibun. Etẹn ni rrie odẹ 550 ni zẹ urhuẹvbo e Turkey ẹre ọ ke ẹvbo ughughan rre do deba etẹn ni rre Turkey kporhu. Vbe iran sẹtin fiangbua?

Iran keghi ya ikporhu iyẹn nọ maan vẹwae. Iko ọkpa nọ rre Istanbul keghi gbẹn wẹẹ: “Emwa ghi bẹghe ima, iran na nọ wẹẹ: ‘Asikoko ne kpataki wa do ra? Avbe Osẹe Jehova wa gba ehe hia!’” Iko ọvbehe nọ rre ẹvbo na tie ẹre Izmir na vbe gbẹn vbekpae okpia ọkpa nọ winna vbe ehe ne okotọ na kun sie. Ọ keghi nọ ọkpa vbe ediọn wẹẹ, ‘Vbọ sunu?’ Vbene ẹmwata, etẹn wa gele ye ikporhu iyẹn nọ maan vẹwae.

Etẹn ni ke ẹvbo ọvbehe rre wa sọyẹnmwẹ iwinna ikporhu iyẹn nọ maan vbe Turkey. E Steffen nọ ke Denmarki rre keghi kha wẹẹ: “Ẹdẹgbegbe ẹre I ya gha miẹn emwa ni ma he ka họn vbekpae Jehova. Ọna keghi wa gha ye ọyẹnmwẹ sẹ mwẹ.” Jean-David nọ ke France rre na vbe kha wẹẹ: “Ughaẹdẹ nibun ẹre ima ya kporhu vbe idunmwu ọkpa. Emwa nibun ma he ka rẹn vbekpae Avbe Osẹe Jehova. Iyobemwahia ne ima miẹn vbe owa ẹre ọ rhie ehọ ne ima taa yi, ẹre ọ ghee vidio, ẹre ọ vbe miẹn ima ebe. Emwi ọyunnuan ghaa nọ.”

Etẹn ni re 550 keghi rrie ebe iyẹn nọ rrie odẹ 60,000 ladian vbe uzọla eva kẹkan ne iran ya kporhu. Te iran wa gele ye ikporhu iyẹn nọ maan vẹwae.

 Etẹn kegha mwẹ izọghae sayọ. Emwamwa ikporhu na keghi gua etẹn ni rre Turkey kpa ne iran ya ru sayọ. Iran nibun na gele rhie obọ ye iwinna arọndẹ ọghe ẹghẹ hia, nọ ghi ya arọndẹ ni rre Turkey muan sayọ vbe iyeke emwamwa ne kpataki ne etẹn ya kporhu.

Etẹn ni ke ẹvbo ọvbehe rre keghi guan kaan vbene ikporhu ne iran kpere vbe Turkey ya ru iyobọ ne iran hẹ vbe iran sẹ owa. Ọtẹn nokhuo Şirin, nọ ke Germany rre keghi kha wẹẹ: “Ẹi zẹdẹ lọghọ etẹn ni rre Turkey ne iran kporhu vbe ẹkpotọ gha wa kie. Ne I na re ọmwa ne ekhue mu, ikporhu ẹkpotọ nọ rhirhi kie i zẹdẹ khuẹrhẹ mẹ. Emwamwa ikporhu na, igiemwi ọghe etẹn ni rre Turkey kevbe erhunmwu ne I ghaa na vbe ẹghẹ hia ẹre ọ ru iyobọ mẹ. Te I mẹ ghi sẹtin kporhu ma emwa ni khian vbe ukpo nia, I vbe rhie ebe ne iran! Ekhue i ghi mu mwẹ vbene ọ ka ye.”

Johannes nọ ke Germany rre keghi kha wẹẹ: “I ruẹ emwi nibun nọ dekaan ifuẹro na ya kporhu iyẹn nọ maan. Ẹkpotọ nọ rhirhi kie ẹre etẹn ni rre Turkey ya kporhu rhunmwuda iran hoo ne emwa hia họn igiuhunmwu na. I keghi tamuolọyan rẹn wẹẹ, I gha ya egbe ta iran vbe I ra sẹ owa. Nia, te imẹ ghi vbe loo ẹkpotọ nọ rhirhi kie ya kporhu ma emwa.”

Zeynep nọ ke France rre na vbe kha wẹẹ: “Emwamwa na, wa ru iyobọ mẹ. Te I ghi mwẹ udinmwẹ vbe ikporhu iyẹn nọ maan kevbe wẹẹ, amuẹtinyan ni mwẹ dae Jehova na vbe wegbe sayọ.”

Etẹn keghi sikẹ egbe sayọ. Ahoẹmwọmwa kevbe akugbe ne etẹn ni ke ẹvbo ughughan rre rhiema keghi re nai sẹtin mianmian ẹdẹ. Jean-David, ne a ka yunu kaẹn ban na vbe kha wẹẹ: “Ma keghi do bẹghe ẹre vbene etẹn ni rre Turkey mu ọghọ ye ọmwa egbe hẹ. Iran keghi miẹn ima yi zẹvbe ọse kevbe etẹn vbuwe ẹgbẹe. Iran na viọ ima la owa. Evba nii ẹre I na gele rẹn wẹẹ ẹgbẹe ọkpa ma khin vbe otagbọn hia. I ka tiẹ re vbe ebe ọghomwa sokpan te aro mwẹ ghi wa sẹ ọre nia. Te ọyẹnmwẹ ghi wa sẹ mwẹ ne I na re ọkpa vbe usun eguọmwadia e Jehova. I kpọnmwẹ e Jehova ye ukpo amuyọmọ nọ hiunsi na.”

E Claire nọ ke France rre khare wẹẹ: “Etẹn ni ke  Denmark, France, Germany kevbe Turkey rre, kegha yin zẹvbe ẹgbẹe ọkpa. Ọ na yevbe na miẹn wẹẹ Osanobua ye agbẹnvbo hia khian ẹgbẹe ọkpa nẹ.”

Stéphanie nọ ke France rre keghi rhie tẹ wẹẹ: “Emwamwa ikporhu ne kpataki na, maa ima re wẹẹ, ẹi re emwi arre ra urhuẹvbo ọghe ima ẹre ọ ya ima mwẹ akugbe. Ọ keghi re ahoẹmwọmwa ne ima mwẹ dae Jehova.”

Etẹn nibun ni ghaa mwẹ obọ vbe iwinna ikporhu na, keghi do gha mwẹ ọnrẹn vbe orhiọn ne iran si gha die Turkey do ru iyobọ, rhunmwuda, ako ne ikporhu ma he sẹ vba ye gẹdẹgbẹẹ. Eso vbọ si sẹ Turkey nẹ. Etẹn ni rre Turkey wa gele gbọyẹmwẹ yọ.

Vbe igiemwi, ọ mwẹ iko ọkpa nọ rre eke nọ wa khian rre vbe Turkey. Etẹn ni ya iyẹn wewe vba keghi re 25. Ọdiọn ọkpa ẹre ọ wa gha ga vbe iko nii vbe ukpo nibun sokpan u miẹn ọyẹnmwẹ nọ ghaa sẹ etẹn ni rre iko nii vbe etẹn ehan ke Germany kevbe Netherlands rre do deba iran!

De isievẹn eso ne etẹn ni do ru iyobọ vbe Turkey werriẹ aro daa? Agharhemiẹn wẹẹ iran werriẹ aro daa isievẹn eso, iran miẹn afiangbe nibun. Gia ghee emwi eso ne iran tae:

Federico nọ rre odẹ ukpo 40 nọ ke Spain rre, nọ vbe rhie okhuo nẹ keghi kha wẹẹ: “Rhunmwuda I ma gha mwẹ emwi nibun, ẹre ọ zẹe ighẹ I sẹtin rhie aro tua emwi nọ ru ekpataki sẹ. U gha mu okhian gha rrie isi rhunmwuda wẹẹ, u hoo ne u ru iyobọ ne emwa do rẹn vbekpae Jehova, te u sẹ arrọọ ruẹ rae ye ọre obọ vberriọ. U gele do bẹghe vbene ọ ya gbaroghe ruẹ hẹ. I rhie igiọdu ne etẹn ni gha sẹtin ne iran ru vberriọ.”

Rudy nọ rrie odẹ ukpo 60 nọ ke Netherlands rre, nọ vbe mwẹ okhuo keghi kha wẹẹ: “Ọ keghi emwi nọ wa sẹ ọmwa ọkẹn ne ima na rhiegbe ye ikporhu iyẹn nọ maan vbe ehe ne a na gele gualọ iyobọ kevbe ne ima na sẹtin kporhu ma emwa nibun ni ma he  họn iyẹn nọ maan ẹdẹ. Ọ keghi re emwi nọ wa ye ọyẹnmwẹ sẹ ọmwa vbe emwa na kporhu ma gha ye oghọghọ miẹn ẹmwata yi.”

E Sascha nọ rre odẹ ukpo 40 nọ ke Germany rre, nọ mwẹ okhuo keghi kha wẹẹ: “Ẹghẹ hia ẹre I ya gha kporhu ma emwa ni ma he ka họn ẹmwata nọ rre Baibol ẹdẹ. Ne I na sẹtin ru iyobọ, nọ ghi ya emwa vberriọ do rẹn e Jehova keghi re emwi nọ wa ya ẹko rhiẹnrhiẹn mwẹ.”

Ọtẹn nokhuo Atsuko nọ ke Japan rre, nọ rre odẹ ukpo 35 nọ vbe rọnmwẹ ọdọ nẹ keghi kha wẹẹ: “Erhunmwu ne I ka gha na ọre ne Amagẹdọn wa rhe banban. Sokpan ke ni ya sẹ e Turkey, te I ghi kpọnmwẹ e Jehova ye izinegbe ne ọ mwẹ. Zẹ vbene I ya miẹn obọ e Jehova vbe otu ọghẹe, erriọ I ya hoo ne I sikẹ ọre sayọ.”

Ọtẹn nokhuo Alisa nọ rre odẹ ukpo 35 nọ ke Russia rre keghi kha wẹẹ: “Ikporhu iyẹn nọ maan ni rhie egbe yi na, wa do ya mwẹ rẹn vbene Jehova gele maan hẹ.” (Psm. 34:8) Ọ na vbe rhietẹ wẹẹ: “Erha mwẹ kevbe Ọse mwẹ ẹre Jehova khin. Emwi nibun nọ gbe ọmwa otiti, emwi ẹwaen nibun kevbe afiangbe ne wọrhọ wọrhọ ẹre I he miẹn. Ena hia ẹre ọ ya mwẹ do rẹn Jehova sayọ!”

Emwamwa ne kpataki ne a ya kporhu iyẹn nọ maan vbe Turkey keghi ya emwa nibun họn iyẹn nọ maan. Sokpan ako ne gẹdẹgbẹ ye rrọọ ne a ma he na kporhu. Ẹdẹgbegbe ẹre etẹn ni kpaa gha rrie Turkey ya miẹn emwa ni ma he họn vbekpae Jehova ẹdẹ. Deghẹ u hoo ne u ya ru iyobọ vbe ehe ne a na gualọ iyobọ vberrio, ma rhie igiọdu nuẹn ne u “ya ghee ugbo, emwi orhọ wo nẹ, ọ vbe sẹ nẹ na rhọ.” (Jọn 4:35) U gha sẹtin ya ru iyobọ vbe ehe ne emwi orhọ na “sẹ nẹ na rhọ” ra? Deghẹ u gha sẹtin, suẹn gha ru emwamwa nia ne u mieke na sẹtin ru vberriọ. Gha mwẹ ọnrẹn vbe ilẹkẹtin wẹẹ, u gha ru sayọ vbe iwinna ikporhu iyẹn nọ maan “rhinrin ya sẹ ehe ne agbọn sẹe,” u gha miẹn afiangbe nẹi gia gie!—Iwiina 1:8.