ABỌ 9
Uwa Koko Gha Ga E Jehova Zẹvbe Ẹgbẹe
“Uwa ghughẹ rre ne uwa ya uhunmwu rhanmwẹ otọ vbe odaro Osanobua, ọmwa ne ọ yi ẹrinmwi kevbe agbọn.”—Arhie Maan 14:7
Zẹvbe ne u ruọre vbe ebe ẹmu na, avbe ilele nọ gha ru iyobọ nuẹ kevbe ẹgbẹe ruẹ keghi rre uwu e Baibol. E Jehova hoo ne u gha mwẹ oghọghọ. Irẹn yan rẹn wẹẹ, adeghẹ u na mu ugamwẹ ọghẹe ye okaro, “irẹn gha ya emwi ni ghi dekẹ hia sẹ uwa ọkẹn.” (Matiu 6:33) Irẹn gele hoo ne u gha re ọse irẹn. Loo ẹkpotọ ke ẹkpotọ nọ rhirhi kie nuẹ ya họọn rẹn asikẹgbe na gu Osanobua mwẹ. Ukpamuyọmọ ọvbehe nọ sẹ ọna i ghi rrọọ.—Matiu 22:37, 38.
1 YA ASIKẸGBE NE U GU E JEHOVA MWẸ KHIAN NỌ WEGBE
EMWI NE BAIBOL KHARE: “Imẹ ghi gha re erha uwa, wa ghi gha re ivbi mwẹ ne ikpia kevbe ne ikhuo, erriọ Nọyaẹnmwa Oghodua kha re.” (2 Kọrinti 6: 18) Osanobua hoo ne u do gha re ọse irẹn ne khuankhuankhuan. Odẹ ọkpa ne u khian ya ru ọna ọre ne u gha na erhunmwu. E Jehova keghi gie na tie ruẹ ne u “gha na erhunmwu vbe ẹghẹ hia.” (1 Tẹsalonaika 5:17) Irẹn muegbe ne ọ ya danmwehọ vbe u gha tama rẹn emwi nọ da ruẹ vbe orhiọn. (Filipai 4:6) Adeghẹ uwẹ vbe ẹgbẹe ruẹ na gha na erhunmwu kugbe, iran ghi do dẹghe ẹre wẹẹ, uwẹ ghee Osanobua zẹvbe ọmwa nọ gele rrọọ.
Gberra wẹẹ ọ khẹke ne u gu Osanobua guan, ọ vbe khẹke ne u gha danmwehọ re. U gha sẹtin ru ọna lekpae ne u gha ruẹ Evbagbẹn Nọhuanrẹn kevbe avbe ebe ughughan na gbẹnnẹ ni hẹnhẹn egbe yan e Baibol. (Psalm 1:1, 2) Gha muẹn roro ighẹ emwi ne u ruẹ. (Psalm 77:11, 12) Odẹ ọvbehe ne u khian ya danmwehọ Osanobua ọre ne u gha yo iko vbe ẹghẹ hia.—Psalm 122:1-4.
Emwi ọvbehe ne kpataki nọ gha ya asikẹgbe ne u gu e Jehova mwẹ khian nọ wegbe sayọ, ọre ne u gha gu emwa ọvbehe guan vbekpa re. Vbene u ya ru ọna, erriọ u ya sikẹ ọre sayọ.—Matiu 28:19, 20.
EMWI NE U GHA SẸTIN RU:
-
Ze ẹghẹ kọ ne u khian ya gha tie Baibol kevbe ne u khian ya gha na erhunmwu
-
Zẹvbe ẹgbẹe, gie a miẹn wẹẹ iwinna orhiọn ẹre uwa ka loo ẹghẹ yi, uwa ke do gha loo ẹghẹ ye, a sọyẹnmwẹ egbe ọmwa kevbe irọkhegbe
2GIE IRUẸMWI ẸGBẸE ỌGHE UWA GHA SẸ UWA ỌYẸNMWẸ
EMWI NE BAIBOL KHARE: “Uwa sikẹ Osanobua, irẹn gha vbe sikẹ uwa.” (Jems 4:8) Ọ khẹke ne uwa ru emwamwa yotọ ọghe iruẹmwi ẹgbẹe na ruẹ vbe ẹghẹ hia, kevbe uwa ghi vbe hia ne uwa gha lele emwamwa na. (Gẹnẹsis 18:19) Sokpan ọni ọkpa ma sẹ. Gha lele adia ọghe Osanobua vbe ẹdẹgbegbe. Yae khian nọ wegbe asikẹgbe ne uwẹ vbe ẹgbẹe ruẹ gu Osanobua mwẹ, lekpae ne uwa gha guan vbekpa re “vbe u a gha rre owa kevbe u a kpa hin owa rre, vbe u gha hẹwẹ kevbe, vbe u gha winna.” (Diuteronomi 6:6, 7) Gha mwẹ atamuolọyan vbene Jọsua ghaa ye, nọ na kha wẹẹ: “Zẹvbe ọghomwẹ kevbe ẹgbẹe mwẹ, e Nọyaẹnmwa ma gha ga.”—Jọsua 24:15.
EMWI NE U GHA SẸTIN RU:
-
Gha mwẹ emwamwa iruẹmwi ne uwa lele vbe ẹghẹ hia ne u gha ya ru iyobọ ne dọmwadọghẹ vbe ẹgbẹe ruẹ
