A gha da biẹ ọmọmọ, ọ keghi gbe ọmwa otiti, sokpan ẹi re iwinna kherhe ẹre ọ lelẹe khian. Ọ gha kpa uwa odin wẹẹ, ọmọ ne uwa da biẹ na, ẹre uwa ghi wa loo ẹghẹ hia kevbe ẹtin ne uwa mwẹ ya koko. Rhunmwuda ne uwa ghi na siosi ye ẹmwẹ ọmọ, uwa i khian ghi gha vbiẹ ẹse, kevbe ọna sẹtin ye egbe kan uwa ugbẹnso. Te uwẹ vbe ọmwa ne uwa gba rrọọ vbe orọnmwẹ gha ru afiwerriẹ eso ne uwa mieke na sẹtin gbaroghe ọmọ ne uwa biẹ kevbe ne uwa ye hoẹmwẹ egbe zẹvbe ọdọ vbe amwẹ. De vbene ibude nọ rre Baibol khian ya ru iyobọ ne uwa hẹ ne uwa ya sẹtin guẹ suan ighẹ avbe isievẹn na?

EMWI NE BAIBOL KHARE: “Te ahoẹmwọmwa zin egbe emwi, ọ vbe mwẹ itohan.” Kevbe wẹẹ, “emwi i daẹ, egbe i kaẹn.” (1 Kọrinti 13:4, 5) Zẹvbe okhuo nọ da biẹ, emwi nọ khẹke nọ, ne u gha mwẹ ẹghẹ ne ọmọ ne u biẹ. Vbọrhirhighayehẹ, odafẹn ruẹ sẹtin vbe gha roro ẹre wẹẹ u i ghi mwẹ ẹghẹ ne irẹn, rhunmwuda ọnii, vbe gha mwẹ ọnrẹn vbe orhiọn wẹẹ te ọ khẹke ne u vbe gha mwẹ ẹghẹ nẹ. Fẹko mwẹ iziengbe, kevbe u ghi vbe kue nọ ru iyobọ nuẹ ya gha gbaroghe ọmọ. Ẹghẹ nii, ẹi ghi roro wẹẹ te u yan irẹn fua.

‘Uwa ne avbe ọdọ . . . gha mwẹ amuroro da iran.’ (1 Pita 3:7) Ọ khẹke ne u rẹn wẹẹ te ọvbokhan ruẹ khian gha miẹn ẹsọn vbe ẹghẹ hia ya koko ọmọ ne uwa biẹ. Rhunmwuda iwinna ọghe ọgbọn na, nọ rre ọre izabọ, egbe sẹtin wọọ re, ra iro sẹtin vbe han rẹn. Ugbẹnso ọ sẹtin wa ya yọ ruẹ egbe, sokpan hia ne u ko udu rre, rhunmwuda wẹẹ “ọmwa ne ọ ziengbe, ẹre ọ maan sẹẹ ne ọ hẹ ẹtin.” (Itan 16:32) U ghi gha loo azanmemwi, ne u fẹko rhie iyobọ nọ gualọ nẹ. —Itan 14:29.

EMWI NE U GHA SẸTIN RU:

• Avbe Erha Emọ: Gu ọvbokhan ruẹ gha gbaroghe ovbi uwa, uhiẹn vbe ẹghẹ asọn. Fiaẹn kanmwa, ẹghẹ ne u te loo ye emwi ọvbehe ne u mieke na gha mwẹ ẹghẹ sayọ ne ọvbokhan ruẹ kevbe ovbuẹ

• Avbe Iye Emọ: Adeghẹ ọdafẹn ruẹ na gha hoo nọ ru iyobọ nuẹ ya gbaroghe ọmọ, u ghi miẹn ọnrẹn yi. Adeghẹ ọ ma ru ẹre se vbene u gualọe yi, ghẹ guẹ gui, u ghi fẹko ma re

EMWI NE BAIBOL KHARE: “Iran ghi gha re ọkpa.” (Gẹnẹsis 2:24) Agharhemiẹn wẹẹ uwa biẹ nẹ, ghẹ miamia wẹẹ “ọkpa” ẹre uwa ye khin.” Hia vbe odẹ ke odẹ ne u gie ahoẹmwọmwa ne uwa mwẹ da egbe gha wegbe sayọ.

Avbe amwẹ, uwa gha gbọyẹmwẹ ye iyobọ ne ọdafẹn uwa rhie ne uwa. U ruẹse kẹkan na ta sẹtin ‘mu ọmwa egbe rhaan.’ (Itan 12:18) Avbe ọdọ, uwa gha tama amwẹ ọghe uwa vbene uwa hoẹmwẹ iran hẹ. Uwa gha tian iran ye iwinna ne iran ye ne ẹgbẹe.—Itan 31:10, 28.

“Ọ ma ke ne ọmwa wa gha rẹn ọghe enegbe ẹre ọkpa, ọ kere ne ọ vbe gha rẹn ọghe emwa ọvbehe.” (1 Kọrinti 10:24) Gha ru emwi nọ ghi maan sẹ ne ọmwa ne uwa gba rrọọ vbe orọnmwẹ. Zẹvbe ọdọ vbe amwẹ, uwa gha gu egbe guan, uwa gha tian egbe uwa kevbe uwa ghi gha danmwehọ egbe. Uwa ghẹ gha mwẹ akhaẹn vbe ọ gha de ọghe na ru emwi ọdọ vbe amwẹ. Gha mwẹ amuroro daa ọmwa ne uwa gba rrọọ vbe orọnmwẹ. E Baibol khare wẹẹ: “Wa ghẹ gha ya emwi hin egbe unu, sokpan a ma wẹẹ, uwa gba taẹ nẹ wẹẹ ne uwa ru vberriọ la omwa ẹghẹ eso.” (1 Kọrinti 7:3-5) Rhunmwuda ọni, uwa wa koko tae zẹvbe ne uwa gualọe yi. Adeghẹ uwa na gha mwẹ iziengbe kevbe amuroro, ọna gha ye ahoẹmwọmwa ne uwa mwẹ daa egbe wegbe sayọ.

EMWI NE U GHA SẸTIN RU:

• Uwa gha mwẹ ọnrẹn vbe orhiọn wẹẹ, ọ khẹke ne uwa eveva vbe gha mwẹ ẹghẹ ne egbe uwa

• Gie ọmwa ne uwa gba rrọọ vbe orọnmwẹ rẹn wẹẹ u hoẹmwẹ ọnrẹn, a gha wẹẹ emwi kherhe ẹre u ru ne u ya rhiẹre ma, ọ sẹtin gha re emwi na gbẹn gie ọmwa ra emwi kherhe na dẹ gie ọmwa

EMWI NE BAIBOL KHARE: “U vbe rẹn wẹẹ, ke ẹghẹ ọvbokhan ruẹn gha dee, u keghi wa rẹn Ebe nii, ne ọ sẹtin rhie nuẹn ighẹ ẹwaẹn nii ne ọ su ọmwa la imiẹfan.” (2 Timoti 3:15) Mwamwaẹn yotọ emwi ne u gha ru ne u ya ma ọmọ nu biẹ emwi. Ọ keghi re emwi ọyunnua wẹẹ, uhiẹn vbe ọmọ gha he ye rre ẹko, te ọ sẹtin ruẹ emwi. Vbe ọ gha ye rre ẹko, ọ sẹtin rẹn deghẹ te uwa gui ra te uwa ghọghọ. Gha tie ebe ma rẹn vbe ọ gha ye rre ọmobọ. Agharhemiẹn wẹẹ irẹn i khian wa rẹn ototọ emwi ne u tie ma rẹn, ọna gha ru iyobọ nẹ, nọ ya gha re ọmwa nọ tie ebe vbe ọ gha waan nẹ.

Ghẹ ghee ọmọ ne u biẹ wẹẹ ọ kherhe gbe ne u gha sẹtin ma re emwi vbekpa Osanobua. Gha Sirria re na erhunmwu gie Jehova kevbe ne u giẹ gha họn. (Diuteronomi 11:19) Uhiẹn vbe u gha guẹ ku, u gha guan kaan emwi ne Osanobua yi. (Psalm 78:3, 4) Vbe ọ gha waan dee, ọ ghi miẹn vbene u hoẹmwẹ Jehova hẹ, kevbe irẹn ghi vbe gha hoo ne irẹn vbe hoẹmwẹ ọnrẹn.

EMWI NE U GHA SẸTIN RU:

• U ghi nọ Osanobua nọ rhie ẹwaẹn nuẹ ne u ya sẹtin ma ovbuẹ emwi

• Gha ta ẹmwẹ ne u hoo nọ rẹn yangbe yangbe, nọ mieke na rherhe rẹn ọnrẹn