I ye mɔgɔ sugu min ye, o tɛ dan i tɔgɔ ni i yecogo dɔrɔn ma. Fɛn minnu nafa ka bon i bolo, i dalen bɛ fɛn minnu na ani i jogow, a bɛ boli olu fana kan. I ye mɔgɔ sugu min ye, o bɛ boli i yecogo ni i kɔnɔkow bɛɛ de kan.

I ye mɔgɔ sugu min ye, ni i dalen bɛ o la, i tɛna i yɛrɛ to i tɔɲɔgɔnw sago bolo nka i bɛna i ka dannayakow lafasa.

“Mɔgɔ caman bɛ i n’a fɔ manekin minnu jɔlen bɛ kɛ fini feere yɔrɔw la. U bɛ fini min don, mɔgɔ wɛrɛ de bɛ o sugandi u ye.”—Adrian.

“Ka to ka ɲuman lafasa hali ni o kɛli man nɔgɔn, ne ye n’dege o la. Ne bɛ se k’a dɔn ne teriw sɛbɛw ye mɔgɔ minnu ye u ka ko kɛtaw fɛ ani ne yɛrɛ kɛcogo fɛ ni ne ni u bɛ ɲɔgɔn fɛ.”—Courtney.

BIBULU SARIYAKOLO: “Aw kana aw ka ko kɛtaw kɛɲɛ ni nin diɲɛ ka ko kɛtaw ye tun, nka aw cogo ka yɛlɛma aw hakili kurayali fɛ.”—Romɛkaw12:2.

I ye mɔgɔ sugu min ye sisan ani i b’a fɛ ka kɛ mɔgɔ sugu min ye, miiri o la. Walasa ka o dɔn, i jogo ɲumanw, i ka fiɲɛw ani i dalen bɛ fɛn minnu na, olu sɛgɛsɛgɛ. Walasa ka o kɛ, i bɛ se ka nin ɲininkali ninnu jaabi.

I jogo ɲumanw: Ne bɛ se fɛn jumɛnw na ani fɛn jumɛnw kɛli ka nɔgɔn ne bolo? Jogo ɲuman jumɛnw bɛ ne la? (Misali la, yala ne ye mɔgɔ ye: min bɛ kɛ lɛrɛ la tuma bɛɛ, min bɛ a yɛrɛ minɛ, min ye baarakɛla ye ani min bolo labilalen don wa?) Ne bɛ ko ɲuman jumɛnw de kɛ?

LAADILIKAN: Yala i bɛ to ka dɛsɛ ka jogo ɲumanw ye i yɛrɛ la wa? I bangebaa dɔ walima i teri sɛbɛ dɔ ɲininka i jogo ɲumanw ye min ye ani mun na a tigi b’o fɔ.

BIBULU SARIYAKOLO: “Mɔgɔw bɛɛ kelen-kelen ka u yɛrɛw taama cogo sɛgɛsɛgɛ. O cogo la, ni yɛrɛbonya yɔrɔ bɛ u fɛ, u na o sɔrɔ u yɛrɛw la, mɔgɔ wɛrɛ sen tɛna kɛ o la.”—Galasikaw 6:4.

I ka fiɲɛw: Ne ka kan ka baara kɛ n’jogo jumɛnw de kan kosɛbɛ walasa ka u yɛlɛma? Waati kɛrɛnkɛrɛnnen jumɛnw de la ne ka telin ka ko jugu kɛ? Ko jumɛnw de la ne bɛ se ka cɛsiribaw kɛ walasa ka se ka n’yɛrɛ minɛ?

BIBULU SARIYAKOLO: “Ni an ko jurumu tɛ an na, an bɛ an yɛrɛw lafili.”—1 Yuhana 1:8.

I dalen bɛ fɛn minnu na: Fɛn jumɛnw de nafa ka bon ne bolo jogo tan fan fɛ? Yala ne bolo Alako ye tiɲɛ ye wa? Mun de y’a jira ne la ko Alako ye tiɲɛ ye? Ne bolo, wale jumɛnw de tilennen tɛ ani mun na? Ne dalen bɛ mun de la siniɲɛsigi ko la?

BIBULU SARIYAKOLO: “Ko sɛnsɛni hakili na i kɔlɔsi, faamuli na i mara.”—Ntalenw 2:11.