FUNANKƐNINW
11: Kɛ mɔgɔ ye baara ka di min ye
O KƆRƆ YE MUN YE?
Baara ka di mɔgɔ min ye, o tigi tɛ boli baara ɲɛ. Nka a bɛ baaraba kɛ ni nisɔndiya ye walasa ka a magoɲɛfɛnw sɔrɔ ani ka tɔw dɛmɛ—hali ni o baara tɛ baara ye bɛɛ bɛ boli min nɔfɛ.
MUN NA O NAFA KA BON?
A diyara an ye wo, an ma diya an ye wo, fɛn caman bɛ yen an ka kan ka minnu kɛ an ka ɲɛnamaya kɔnɔ. Nin diɲɛ in kɔnɔ, baara kɛli man di mɔgɔ caman ye, o la ka kɛ baarakɛla ye nafaba bɛ o la.—Waajulikɛla 3:13.
“Ne y’a ye ko ka to ka baaraba kɛ, o b’a to i ka nisɔndiya i yɛrɛ kɔrɔ ani ka wasa sɔrɔ. O nisɔndiya sɔrɔli y’a to baara kɛli diyara ne ye. Ka to ka baara kɛ ka ɲɛ, o b’a to i ka tɔgɔ ɲuman sɔrɔ.”—Reyon.
BIBULU SARIYAKOLO: “Nafa bɛ baara sifa bɛɛ la.”—Ntalenw 14:23.
I BƐ SE KA MIN KƐ
Walasa ka hakilina ɲuman sɔrɔ baara ko la, laadilikan nata ninnu waleya
To ka i dege baara kɛcogo ɲuman na. Ni i bɛ baara fɛn o fɛn kɛ, sokɔnɔbaaraw wo, lakɔli baara wo, dahirimɛ sɔrɔli baara wo, o kɛ ka ɲɛ. N’i sera ka baara dɔ kɛ ka ɲɛ, a ɲini k’a dɔn i bɛ se ka a kɛcogo fisaya teliya la siɲɛ wɛrɛ cogo min na. Ni i bɛ to ka baara kɛ ka ɲɛ, i bɛna nisɔndiya sɔrɔ ka ta’a fɛ i ka baara kɛlen na.
BIBULU SARIYAKOLO: “I ye mɔgɔ dɔ ye min bɛ se a ka baara la kosɛbɛ wa? O na baara kɛ masakɛ ye, nka a tɛna baara kɛ mɔgɔ gansanw fɛ.”—Ntalenw 22:29.
I ka baara bɛ tɔw dɛmɛ cogo min na, o jateminɛ. Tuma caman na, i ka kan ka baara minnu kɛ, ni i ye olu kɛ ka ɲɛ, tɔw bɛ o nafa sɔrɔ. Misali la, ni i ye sokɔnɔbaaraw kɛ ka ɲɛ, o bɛ dukɔnɔmɔgɔw tɔw lafiya.
BIBULU SARIYAKOLO: “Duba bɛ nili la ka tɛmɛn sɔrɔli kan.”—Kɛwalew 20:35.
Baara min bɛ di i ma, kana dan o dɔrɔn kɛli ma. Baara min dira i ma, sani i ka dan o dɔrɔn kɛli ma, baara wɛrɛw kɛ walasa ka o baara dafa. O la, e de bɛna i ka kokɛtaw ɲɛminɛ—ka a sugandi ka dɔ fara i ka baara kɛtaw kan k’a sɔrɔ mɔgɔ si ma i jagoya.—Matiyu 5:41.
BIBULU SARIYAKOLO: “I bɛ ko ɲuman min kɛ ne ye, o kana kɛ diyagoya ye, nka o ka kɛ ni diyaɲe.”—Filemon 14.
Kɛ mɔgɔ ye min ka kow bɛrɛbɛnnen don. Baara ka di mɔgɔ min ye, o tigi tɛ salabaatɔ ye nka a tɛ baara fana kɛ k’a damatɛmɛn. A tigi ka kow bɛrɛbɛnnen don, a bɛ nisɔndiya sɔrɔ a ka baara waatiw ni a ka lafiya waatiw la.
BIBULU SARIYAKOLO: “Tɛgɛ kelen falen hɛrɛ la, o ka fisa ni tɛgɛ fila falen ye baara ni fiɲɛ ɲinili la.”—Waajulikɛla 4:6.
