Bibulu bɛ mun fɔ Nowɛli ko la?

A BILA A LA

Bibulu bɛ jaabi min di

Bibulu tɛ Yesu bangedon fɔ, wa a tɛ a fɔ fana ko an ka kan ka a bangedon seli kɛ. McClintock ani Strong’s Cyclopedia b’a fɔ ko: “Ala m’a ɲini an fɛ an ka Nowɛli seli kɛ wa Nowɛli ko fɔlen tɛ krecɛnw ka gɛrɛkikan sɛbɛnniw kɔnɔ.”

Ni an ye Nowɛli ko sɛgɛsɛgɛ, an b’a ye ko a sun bɔra josɔnnaw yɔrɔ. Bibulu b’a jira ko ni an ye Ala bato cogo la min man di a ye, an bɛ a dusu kasi.—Ekisode 32:5-7.

Nowɛli seli ni a laadaw sunw bɔra yɔrɔ min na

Yesu bangedon sanyɛlɛmaseli kɛli: “Krecɛn fɔlɔw tun tɛ [Yesu] bangedon seli kɛ ka d’a kan u tun bɛ bangedon seli suguw bɛɛ jate josɔnnaw ka laadaw ye.”—The World Book Encyclopedia.
Desanburukalo tile 25: Dalilu foyi tɛ yen min b’a jira ko Yesu bangera o don na. A bɛ se ka kɛ ko Egilisi ɲɛmɔgɔw ye o don in sugandi ka bɛn josɔnnaw ka seli ma min bɛ kɛ solstice d’hiver waatiw la.
Nilifɛnw, dumunibaw, seli ɲɛnajɛw: The Encyclopedia Americana b’a fɔ ko: “Saturnalia, ni o ye Romɛkaw ka seliw ye minnu tun bɛ kɛ densaburukalo cɛmacɛ la, o kɛra misali ye ka ɲɛsin Nowɛli seli laadalako caman ma. Misali la dumunibaw kɛli, nilifɛnw dili ani buziw mɛnɛni sun bɔra o seli ninnu de la.” The Encyclopædia Britannica y’a jira ko “baaraw bɛɛ ani sanni feerew si tun tɛ kɛ” Saturnalia don na.
Yeelenba minnu bɛ kɛ Nowɛli don na: Ka kɛɲɛ ni The Encyclopedia of Religion ye, Erɔpu mɔgɔw tun bɛ u ka sow labɛn “ni yeelenw ni jiri fura bulu kologɛlɛnw suguw bɛɛ ye” walasa ka solstice d’hiver seli kɛ ani ka hakilimaa juguw gɛn.
Gui, houx, olu ye jiriw ye mɔgɔw bɛ baara kɛ ni minnu ye kosɛbɛ walasa ka Nowɛli labɛn: “Gui tun ye jiri senuma ye Gaulois bolo kɛrɛnkɛrɛnnenya la, wa a tun jatelen bɛ iko jinɛmori fɛn walasa ka mɔgɔw tanga dabali juguw ma. Houx ni o ye jiri ye min fura buluw kolo ka gɛlɛn o tun bɛ bato iko tile bɔtɔ layidu talen”—The Encyclopedia Americana.
Nowɛli jiri: “Jiri batoli tun ka ca Erɔpu josɔnnaw fɛ, o batoli tora sen na hali u kɛlen kɔ krecɛnw ye.” O batoli in taara a fɛ ka kɛ laada caman kɔnɔ i n’a fɔ min bɛ kɛ vakansiw sen fɛ fonɛnɛ waati la ni o ye “ka jiri labɛn k’a bila so da la walima so kɔnɔ.”—Encyclopædia Britannica.