YOMARA a bendôme bé, Marcelo ba Hiver ba nyiñe mone nlam éziñe ya Guatemala. Yomara a nga taté na a yé’é Bible a Bengaa be Yéhôva, mvuse ya valé bendôme bé fe be nga taté na ba yé’é. Ve nju’u be bili ô ne na, bese belale be ne mindindim, a be nji be be yeme’e lañe nkobô mindindim. Ajô te éyoñ be mbe be bo’o ayé’é, ñye’ele Bible wop a mbe a lañe’e mebeñ a bifuse bi Bible asu dap.

É nji fe be tyi’ibi asu dap na be tabe bisulan. Asu na be ke Aba Éjôé é mbe é dañe bebé a vôm be mbe be too, be mbe be yiane wulu minute 40. Mbôle be nji be ngule ya wulu étam, bobejañe ya akônda be nga volô be na be tabe bisulane bise. Éyoñe bobejañe bete bebaé a kale jap be nga taté na ba bo bisaé bisulane ya zañe sondô, bobejañ be mbe be volô’ô be na be ba’ale bisaé biap nlô.

Ngone tane ya mbu 2019, be nga taté na ba bo bisulan nlame wop. Éyoñ éte ébien, mojañ éziñe ba ngale be nga ke bo ésaé nkpwa’a mefane jap nlam ôte. Nsôñane wop ô be na be volô bobejañe bete a kale jap na be yé’é ane ba lañ a tili nkobô mindindim. To’o be nji be be yeme’e lañe nge tili nkobô mindindim, be mbe be bili nkômbane ya ye’ele beyé’é Bible be mbe mindindim ane ba bo de. Ajô te be nga ke menda ba kuane bekalate, a kuse bekalate ya nkobô mindindim asu na be yé’é avale be ne volô bôte bevok na be yeme kobô nkobô ôte.

Mvuse bone bengon, bobejañe bete belale be mbe be nga lañe nkobô mindindime tyi’ibi, a nalé a nga volô be na be tu’a yemete élate jap a Yéhôva. a Éyoñe ji Yomara, Marcelo, a Hiver be ne bekpwa’a mefan. Marcelo a nto diakon. Sondô ase be yeme a mame ya nsisim, a nalé a ve bôte bevok éva’a ya vu be.

Bobejañe belale bete ba ve bobejañe ya akônda abui akiba amu nye’ane be nga liti be. Yomara a jô na: “Éyoñ ôsu bi nga tôbane Bengaa, be nga liti bia nya nye’ane bekristen.” Marcelo ki a jô na: “Bi bili mbamba bemvôé akônda dangan, a bi nto bibu’a ya nda bôte bobejañ a besita ya si ése é ne nlatan a nye’an.” Yomara a bendôme bé be ne ôjeja’a ya yen ane Yéhôva a bo si na é bo Paradis.​—Bsa. 37:10, 11; Ésa. 35:5.