Éyoñ me nga bi mimbu 13, élate jam a Yéhôva é nga taté na ja tek. E sikôlô, me mbe me kômbô’ô bo ane bongô bevok, amu be mbe be bili fili ya bo mam mese ba yi. Me mbe me wô’ô metiñe bebiaé bam a ma me Yéhôva angôndô ya adit. Me nga taté fe na ma wô’ô mame ya nsisim njuk. Me mbe fo’o me yeme’e na Yéhôva a ne, ve me nji mbe me bili ngul élat a nye.

Me mbe me nyoñe’e ésaé nkañete éngbwemese. Me mbe teke fe kômesan éyoñ ma ke nkañete. Ajô te, e mbe ma ayaé na me taté minlañ a bôt nge kee mie ôsu. Nalé a nga bo na ésaé nkañete jam é bo teke wume bibuma, a na me tu’a vini vini je. Me mbe me sili’i mamiene na, ‘Aval avé bôt be ne yeme bo ésaé ji sondô ase a ngon ése?’

Éyoñ me nga bi mimbu 17, me nga yi na mamien me wulu ényiñe jam. Nde me nga ka’a bikpwaé biam, a kôlô nda bebiaé bam na me ke nyiñ Australie. Jam ete e nga taé bebiaé bam nlem abui. Minlem mi  mbe mi tyele be yôp, ve be nga to ndi na mé ke ôsu a bo Yéhôva ésaé.

Éyoñ me nga kui Australie, élate jam a Yéhôva é nga tu’a ndaman. Me nga taté na ma bu’i bisulan. Me mbe me yeñe’e a bobejañ be mbe be bo’o ane ma. Môse bia te tyi’i na bia tabe ésulan, mvuse ya valé, bia ke nyu meyok a jeme beboîte de nuit. Éyoñe ma simesane biyoñ bite, me mbe me bili abo da benya mejôô, abo da émo. Ve me nji be me bili benya meva’a.

Mvuse mimbu mibaé, me nga tôbane sita éziñ a nga bo na me fase fatan ényiñ me mbe me bili. Me mbe me too nda jia a besita betan befe. Bi nga bañete njome mekônda ba minga wé, Tamara, na be zu bo sondô jia a bia. Nté nnôm wé a mbe a bo’o bisaé ya akônda, Tamara a mbe a lôte’e éyoñ a bia, a la’ane bia mbamba minlañ. Me nga nye’e minlañ mite. Me nga yene na a ne mbamba môt, a na e mbe tyi’ibi ya laane a nye. Me nga kame na aval étôtôlô Kristene éte é ne ngule ya bo fianga a bôt.

Tamara a mbe tene ôsesa. Nye’an a mbe a nye’e ésaé nkañete a benya mejôô ô nga nambe ma. Nté me mbe me bo’o éles ésaé nkañete, teke yen ava’a y’été, nye a mbe a bu’uba’ane meva’a ya bo Yéhôva ésaé a nlem ôse. Été nsisime jé a meva’a a mbe a bu’uba’ane me bi nga tyendé ényiñe jam. Mbamba éve’ela wé a nga bo na me simesane ñye’elane wu: Yéhôva a yi na môt ase ya be bia a bo nye ésaé “a mevak” a “ñyiane bia.”​—Bs. 100:2.

Me mbe me kômbô’ô ava’a Tamara, ve me mbe me yeme’e na asu na me bi de, ma yiane bo beta mintyendan ényiñe jam. E nga sili ma abui éyoñ asu na me ta’a ényiñe jam. Me nga taté na ma bo me kômesa’an ôsusua na ma ke nkañete, me bo fe me nyoñ ésaé nkpwa’a mefane ya étun éyoñ. Nalé a nga volô ma na me taté minlañ tyi’ibi a bôt. Mbôle me mbe me bela’ane Kalate Zambe abui, nalé a nga bo na me tu’a nye’e ésaé nkañete. Mvuse mon éyoñ, me nga taté na  ma nyoñ ésaé nkpwa’a mefane ya étun éyoñ ngon ése.

Me nga taté na ma late ngbwa a bobejañ ya ôkala ôse, ba bese ba bu’ubane meva’a ya bo Yéhôva ésaé. Mbamba éve’ela wop a nga volô ma na me kôme fase mam ma telé ôsu ényiñ jam, a na me bi fulu ya lañe Kalate Zambe môs ôse. Me nga ke ôsu a bu’uban ésaé nkañete jam, ane me nga su’ulane nyoñ ésaé nkpwa’a mefane ya éyoñ ése. Me nga bo mimbu mimbu me teke wô’ôtan aval ava’a ete. Me mbe me wô’ôtane na akônda e ne nda bôte jam.

Mvuse mbu wua, me nga yeme Alex. A mbe mbamba môt, a nye’e Yéhova a ésaé nkañete. A mbe diakon, a boya fe ésaé nkpwa’a mefan tañe mimbu mi saman. A nga ke su’u ésaé vôme bekañete mbamba foé ba jembane Malawi, tañe bebé ngone mwom. Éyoñ a mbe wôé, a nga tôbane bemissionaire béziñ be nga li’i nye mbamba éve’ela. Be nga lebe nye na a ke ôsu a telé mame ya nsisim ôsu.

Mbu 2003, bia Alex bi nga lu’an. Ataté éyoñ éte, bi nga dañe belane éyoñ jangan ésaé Yéhôva. Yéhôva a nga ye’ele bia abui mam, a noo bia abui bibotan.

Mbu 2009, be nga lôme bia Timor Oriental na bi ke saé ane bemissionaire. A ne mone nlam ya Indonésie. Bi nga wô’ô mevak, ve woñ ô mbe fe été. Mvuse ngon étan, bi nga suane tisoñe ya Dili.

Ényiñe ya wôé é mbe é sela’an a ji bi nga taté bi. Bi mbe bi yiane yembane metum, nkobô, bidi, a fatan ényiñ ya wôé. Bi nga koon abui bôt é to azoé, teke ke sikôlô, be tôba’ane fe abui étibila’a. Bi nga koone fe abui bôt e nga jibi mintaé ya mbia be mam a bita bi nga bobane nlam ôte. *

 Ésaé nkañete é mbe é wumu’u abui bibuma. Môs éziñ, me nga tôban éngôngole mona minga é bili mimbu 13, a too jôé na Maria. * Nyia wé a nga wu bone mimbu mvus, a ba ésaa wé be mbe teke dañe yenan. Aval ane abui bongô ya ôkala wé, Maria a mbe teke yeme jam a ne bo ényiñ jé. Ma simesane môs éziñ, éyoñ a nga kañete ma ényiñe jé, a nga taté na a yôn, ve me nji be me wô’ô mam mese a mbe a kate’e ma amu me mbe me ngenan teke yeme kobô nkobô wé mvo’é. Ane me nga ye’elane Yéhôva na a liti ma aval avé me ne ve mona minga ate ngule nyul. Éyoñe te me nga lañe nye bifuse ya Kalate Zambe bi nga volô nye nlem. Mimbu mi nga tôé valé, me nga yen ane benya mejôô ba volô Maria na a bo beta mintyendan ényiñe jé. Mvuse ya valé, a nga duban, a éyon ji, a ye’ele bôte mejô me Zambe. Den, Maria a bili beta nda bôte ya nsisim, vôm a wô’ôtan nye’an.

Yéhôva a nga botan ésaé bi nga bo Timor Oriental. Akusa bo abui bekañete mbamba foé ya wôé e ngenan teke bo mimbu awôm benya mejôô, abui e nto bekpwa’a mefan, bediakon a bemvendé. Ba bevok ba saé vôme ba kôñelane bekalate asu na bekalate bangan be kui abui minkobô ya wôé. Mevak me mbe me jaé’ ma nlem ne lut éyoñ ése me mbe me wô’ô ane ba yia bia bisulan, a éyoñ me mbe me yene’e ane ba yaé nsisim.

Ényiñ bi nga bi Timor Oriental é mbe é sela’an a ji bi nga bi Australie, ve é nga soo bia abui mevak. Biyoñ biziñ éyoñ bia ke dulu, bi mbe bi bete’e bone bemetua be too njalan a bôt, mikôte mi kos, a bidi bi so’o makit. Biyoñ bife ki, asu na bi ke bo meyé’é, bi mbe bi yiane ke nyine bone menda be too ayôñ a mvit, bekup be kele’e ba mate mbil fefel. Ve akusa bo minju’u me nga tôbane mie, me nga bi abui mevak.

Éyoñ ma simesane mam mese me nga kui ma ényiñ, ma ve bebiaé bam akiba amu be nga ye’ele ma benya mejôô, a su’u ma to’o éyoñ mbunane wom ô nga tek. Jam e ne ntilan Minkana 22:6 e nga tôéban mfa’a wom. Bebiaé bam be ne mevak ya yen ane bia Alex bia bo Yéhôva ésaé. Ataté mbu 2016, bia jome mekônda méziñ ya Australasie.

Ma kame na éyoñ me mbe ésoé, me mbe me yene’e ésaé nkañete njuk. Éyoñe ji, ma nye’e je nya abuii! Me nga yene fo’o na, bi kusa tôbane jé ényiñe jangan, bia bi benya mevak éyoñ bia bo Yéhôva ésaé a nlem ôse. Teke bisô na mimbu 18 bia Alex bi nga bo Yéhôva ésaé mi ne mi mi nga dañe soo ma abui mevak ényiñe jam. Éyoñ ji, ma kôme yeme na David a nga bele éyoñ a nga jô Yéhôva na: “Ba bese ba sobô be wo be va’ak. . . . Ba fe ba nye’e jôé dôé be va’a be wo.”​—Bs. 5:11.