Mbamba minlañ mia taté éyoñe mia nyo mon mia nyoñ éyoñe ya laan, môt ase a kate’e nyô mbo’o mame mé.

Minlañ mi ne bo mbia ayaé a bisoé. Éyoñe bone bôé be mbe tyôtyoé, é mbe tyi’ibi na be zu wo kate jôm ése be bili nlô. Ve éyoñe be nto bisoé ji, be nji dañe beta laan a wo, a fe na, ô se ngule ya beta yem asimesane dap a avale ba wô’ôtane mam. É nto ve ane beta ôsôé a ne mia zañ. Nya ajôô ki a ne na, ô kusa yen aval afe, éyoñ éte ébiene nje bongô ba tu’a yi môte ba be be be ne laan!

Jeñe’ na ô ve b’éyoñ, éyoñe ba kômbô laan a wo. Bo’o de to’o da sili na mi laan e zañ alu.

“Éko éziñ ô ne kômbô sili na, ‘Y’awolo di nde wo kômbô laan? Nga bia wo bi tabeya va ngumba môs!’ Ve nde bi ne kôme wô’ô ôlun aya éyoñe bone bangan ba kômbô yoé bia minleme miap? Nga jame mbiaé ase a yi nde le?”​—Lisa.

“To’o mbôle ma nye’e me ji’a bômbô si, mbamba minlañ me biya a bisoé biam mi mbe éyoñe zañ alu é lôteya.”​—Herbert.

ÑYE’ELANE YA BIBLE: “Môt a bo’o te jeñ mvaé jé émien, ve môt ase a jeñe’ mvaé bôte befe.”​—1 Becorinthien 10:24.

Te kañese na jam afe é ke wo nlô. Ésa éziñ a meme na: “É wô’ô kui na me simesane mam mefe éyoñe bone bam ba laan a ma. A be ne ngule ya yemelane na, me nji vô’ôlô be!”

Nge Télé, nge minsini mfe ane téléfôn ba bo na ô bo teke kôme vô’ôlô be, dime be a kele bôé be ôyap. Kôme’e baa alo e jame mone wôé a kate wo, ô nyoñe jam ete ane jam é ne nya mfii, ja’a womien ô nji dañe yene de ane beta jam.

“Bia jeñe na bi liti bone bangane na mame ba wô’ôtan me ne mfi mise mangan. Nge sa nalé, b’aye beta yoé bia minleme miap, a be ne viane jeñe mvolane be môte mfe.”​—Maranda.

“Te ji’a yaa, ja’a mame mone wôé a jô me nji yian.”​—Anthony.

ÑYE’ELANE YA BIBLE: “Taba’ane ñhe ntyel a avale mia vô’ôlô.”​—Luc 8:18, Mfefé Nkôñelan.

Yeme’e belane fan ô ne bi na ô laan a be. Biyoñe biziñ bongô be ne yene na é ne tyi’ibi ya kobô éyoñe be nji tabe bebiaé bap ôsu, be fombane mis.

“Bia belane fane ya laan a be éyoñe bi ne metua été. Éyoñe be to ma fefel a lôte na bi fombane mis, nalé a ve mbamba minlañ tyi’ibi.”​—Nicole.

Éyoñe ya di é ne fe ve fane ya laan a bongô.

“Éyoñe bia di, môt ase a ne ngule ya kate mbamba be mam nge ki mbia be mam a te tôbane me a môs. Nalé a late bia, a môt ase a yeme na a nji yiane biban étam asu na a dañe minju’u mié.”​—Robin.

ÑYE’ELANE YA BIBLE: “Môt ase a bo’ avôle ya wôk, [a] ôtete’e ya kobô.”​—Jacques 1:19.