MVOLAN ASU BÔTE BE BILI AWU

Mvolane wo yian asu bôte be bili awu

Vô’ôlô nkobô

MELU MA, ABUI BÔT E FASEYA AJÔ YA MINTAÉ MÔT A WÔ’Ô BI ÉYOÑE MÔT A TO A NYE’E A TE WU. Ve da, avale bia te yene mvus, abeñe melebe beyem mam be ne ve me wô’ô lu’an a fe’e ja so Kalate Zambe. Nalé a nga liti ne ngeññ na, miñye’elane ya Kalate Zambe mi ne mfi éyoñ ése. Ve, Bible a bili fe melebe me ne mfi a dañ abime bi ne simesan. A ve miñye’elane bi vo’o koone mie vôme mfe, mi to fe ngule ya ve bôte be bili awu abui mvolane nlem.

Ndi nleme ya yeme na bôte bi nga too bi nye’e be nga wu be nji juk

Bible a jô kalate Ecclésiaste 9:5 na: “Miñwuan mi ne te yeme jam. . . . amu ôsimesane bôt b’ asimesane be ô maneya vuan.” (Besam 146:4) Ajô te Bible a ve’e awu ane ôyo môt a ke teke bo jôm éziñ.—Jean 11:11.
E bi ngule mbunane be Zambe a ne nye’an a soo ngule nyul

Bible a jô kalate Besam 34:15 na: “Mise me Yéhôva * m’afombô bôt be ne zôsô, a melo mé me yoo mfa’a ya ñyône wop.” E kate Zambe aval bia wô’ôtan éyoñe bia ye’elan a dañe mvolan ôse bi ne bi éyoñe bia laan a môt, nge zen ése é ne volô bia na bi bi mvolan. Mboon ôte wo volô bia na bi late ngbwa a Nté wongan, nnye ate a ne belane ngule jé asu na a volô bia minlem.
Mbamba ényiñe ya yange asu melu ma zu

Tame simesan melu ma zu éyoñe bôte be ne mesoñ ba ye womô, a beta zu nyiñe si va! Kalate Zambe a kobô ajô éte abui biyoñ. Éyoñ a kat avale si ja ye bo, Bible a jô na Zambe “a ye fimi mili’i mese mise [mangan]; a awu de aye fe bo; nalé fe ôlun vi aye fe bo, nge ñyôn, nge mintaé.”—Nlitan 21:3, 4.

Bôte bese ba buni Zambe a ne jôé na Yéhôva, be bili ngule ya dañe mintaé ba wôk amu be yé’éya na ba futi ndi nleme jap e be nye. Évé’an é ne na Ann, nnye nnôm a nga wu valé a bili mimbu 65 a jô na: “Kalate Zambe a ve ma ndi nleme na, bôte bi mbe bi nye’e be nga mane wu be nji juk, a na Zambe a ye mane wômôlô ba bese be ne ôsimesane wôé. Mejô mete ma volô ma éyoñ ése éyoñ ma simesan môte wom a nga wu, a nalé a ve ma ngule ya jibi mbia be mam be ne ma kui ja’a mam me ngenane te tame tôbane me!”

Tiina bia te jô nye nlô ajô ya mvus a mi mivok, a jô na: “Nté ane Timo a nga wu, ma wô’ôtane na Zambe a su’u ma. Ma kôme wô’ôtane wo Yéhôva éyoñ nlem ô ne ma ntya’an. A ngaka’a ya ñwômane miñwuan Bible a jô je é ne fo’o été asu dam. Nalé ate a ve ma ngule nyul na, me ke ôsu a jibi akekui môs ma ye beta yene Timo.”

Bemilion be bôte be ne tyiñe jia a Tiina. Ane nye, be’e fe be too ndi na mam me ne Kalate Zambe me ne fo’o bebela. Nge wo yene v’ane bengaka’a ya Kalate Zambe be nji bo été, nge na be ne fo’o ve biyeyem, jeñe na ô bi mendem ma liti wo na, melep a bengaka’a y’été me ne betotyii. Womien wo ye bo ngule ya yene Bible ane kalate a ve mvolan asu ba ba jibi mintaé ya awu.