Avale minsili di e wô’ô bômbô éyoñ njet a évô bia boban: ‘Ye Zambe a lôô fo’o? Amu jé avale mame di da boban? Ye njet a évô a bii fo’o man? Nne me ne ke ôsu a nyiñ aya a woñe nlem?’ Kalate Zambe a yalane minsili mite mise étua ya abeñ.

 Zambe a vini njet a évô. (Besam 11:5; Minkana 6:16, 17) Aval avé Yésus a nga liti na Ésaa a vini njet éyoñ a mbe si va? A nga kobô beyé’é bé éyoñ wua ya be be a nga dimine yaa a môt. (Matthieu 26:50-52) Bôte béziñ ba bele tote Zambe éyoñ ba bo njet a évô, ve ba laa minsos, sa ke Zambe nnye a lôme be. Nya ajôô a ne na Zambe a vô’ôlô ki meye’elane map.​—Ésaïe 1:15.

 Zambe a wô’ô bôte bese be ne éngôngol mintaé, ja’a ba ba wu étibela’ étome njet a évo. (Besam 31:7; 1 Pierre 5:7) Bible a jô jô fe na Zambe a mbeme zu vaa njete si va.​—Ésaïe 60:18.

 Éfuse ya Bible di ja yalane tyi’ibi na: “Môte wua a jôô môte mfe njôane ya ndamane nye.” (Ecclésiaste 8:9) Aso melu kôa, bôte ba ja zu ba belan éjôé jap na be tibili ba bevok. Wônaa bôte béziñe ba belane njete na be kune bebien.​—Ecclésiaste 7:7.

 Zambe a ka’ale bia na é vaa woñ a njete si va a bo na bi bu’ubane mvo’é. (Ésaïe 32:18; Michée 4:3, 4) É bo mam ma:

•   E vaa jôme ja yame njet. Zambe é fol éjôé mota binam a énjé. Yésus Krist, Njôô ya Éjôé Zambe, é belane bôte bese avale da, a vaa étibela’a a fatan évô ése si va. (Besam 72:2, 14) Teke môt é beta bo njete si nyi éyoñ éte. Bôte bese “ba ye yene mvé jap amu abui mvo’é.”​—Besam 37:10, 11.

•   E saé ba be nga juk étome njet. Zambe é mane saé ba bese njet é nga ndamane nyul a nyabe minlem a mintaé. (Ésaïe 65:17; Nlitan 21:3, 4) A jô fe na é wômô bewu a bo na be beta nyiñe si va mvo’é été.​—Jean 5:28, 29.

 Bible a liti na Zambe é bo mam mete ana’ana. Ve éko éziñ wo sili womiene na: ‘Amu jé a beta yange?’ Yene’e vidéo a ne nlô ajô na Amu jé Yéhôva a kamane ki na bi tôbane minjuk? asu na ô bi éyalane ya nsili ôte.