Ôwé. Bia buni na Kalate Zambe ase a ne “nsoane be Zambe, a ne fe mvolan mfa’a ya ñye’elan.” (2 Timothée 3:16) Nnôme ba Mfefé élat bese be ne mejô me Zambe. Bia dañe belane bifia “mintilane ya nkobô hébreu” a “mintilane ya nkobô grec”. Nalé a volô na, bôt be bô te buni na vôm éziñ ya Kalate Zambe a ntoo nnôm nge ntuk.

A ngule ya mbamba nsisim, nlômane Paul ô nga tili na: “Amu na, mam mese me nga tiliban melu mvus, me nga tiliban mfa’a ya ñyé’ane wongan.” (Beromain 15:4) Mintilan ya nkobô hébreu mi bili minye’elane mi ne ve bia mbamba melep.

• Minkañete ya melu mvus. Mintilane ya nkobô hébreu mia kate bia ane Zambe a nga té biôm bise, a avale môt a binam a nga bo abé. Nge nkañete te ô nji be Kalate Zambe été, bi nji ye bi biyalane ya minsili mi: “Nne bia so so vé? Amu jé môt a binam a wu?” (Metata’a 2:7, 17) Mintilane ya nkobô hébreu mia kañete fe aval avé Zambe a nga nyiñe a bôte be nga tôbane minjuk, a mevak me funa’ane a éñmiangan.—Jacques 5:17.

• Mbamba melep. Kalate Minkana a Ecclésiaste, be ne mintilane ya nkobô hébreu, ba ve bia aval meleb é ne te yômbô. Ba liti ane nda bôt é ne nyiñe meva’été (Minkana 15:17), ane bi ne bi mbamba ôsimesane mfa’a ya ésaé (Minkana 10:4; Ecclésiaste 4:6), a aval avé bendôman a bengon be ne yeme belane ényiñe jap (Ecclésiaste 11:9–12:1).

Bia nyoñ abui meleb éyoñ bia lañe metiñe me Môze me ne Tora (bekalate betan be ôsu ya Kalate Zambe). Bi nji bô metiñe Môze si, ve jam da metiñe mete ma ve bia abeñ melep.—Lévitique 19:18; Deutéronome 6:5-7.