Nge ô ne mone Bengaa, ô ne bo fe’e ne vema nge wo teme na ngumba nsamba bezimbi wo zu wo ba’ale wo nté wo nkañete. Jam ete e nga kui Joseph e Micronésie mbu 2017. Ba be bobejañe bela be nga ke ôbane kañete mon ékôte si éziñ.

Bese benyini be nga suane zañe môs, bôte be to wôé be ne bôte bebé 600. Maire émiene nnye a nga tame be mbamba nsoan. Joseph émien a kañete bia nlañ: “Maire a nga jô na metua bezimbi a zu ke a liti bia menda menda. Bi nga be fe’e ne vema ve bi nga ben. Bi mbe bi kômbô’ô kañete avale bi wô’ô zu bia bo.”

Ane bekañete be nga taté na ba ke a mebo, nsôñane wop ô mbe na be kañete abui bôt. Bobejañe ba jô na: “Bôte be nga nyoñe bia a mbamba nlem, be nye’e fe ba vô’ôlô foé bi nga soo je. Bi nji yeme na bia ye tabe ayap nda ése.”

Metua bezimbi a nga lôte biyoñe bibaé vôme bobejañe be mbe be kañete’e, étun é nga bem nde a nga tebe. Bezimbi be nga sili Joseph nge be ne ke ba liti nye menda a ngenane teke kute mimbé. Joseph a jô na: “Me nga yalane be na momo. Ve be nga yemete ma be jô’ô na: ‘A li’iya mia ve mon étun éyoñ, jôm éte nje bia kômbô kañete a mia menda me li’iya ma.’ Me nji be ve beta ben amu menda me be me ngenan abui. A mbe na, éyoñe bia kui nda éziñ, bezimbi mbe ba kate ma éyôlé ya nda bôt. Be nga jô jô na nge môt a teke diine mbé éyoñe bia kut, bebiene ba ye loñe toñ asu ya na mmie nda a yeme na bôte ba jeñe nye.

“Mvolane wop ô nga bo na bi mane kañete menda mete mese ve môs ôte wuwua. Bi nga ve bôt abui bekalate, bi nga ta’a fe na, bia ye zu bo minjomane mi bôte be mbe be kômbô’ô yé’é.”

Bezimbi be nga kate Joseph na be nga “nye’e ésaé nkañete be nga bo.” Éyoñe bobejañe be nga bulane mame ngô’é, bezimbi be nga ya’ane be a mone vioé biyaé a bekalate bap mo.