Unsaon Nimo ‘Pagpasidungog sa Imong Amahan ug Inahan’?

I-PLAY

Tubag sa Bibliya

Ang sugo nga “pasidunggi ang imong amahan ug ang imong inahan” daghang beses nga mabasa diha sa Bibliya. (Exodo 20:12; Deuteronomio 5:16; Mateo 15:4; Efeso 6:2, 3) Mahimo kini sa upat ka pangunang paagi.

Apresyaha sila. Mapasidunggan nimo imong papa ug mama dihang imo silang pasalamatan sa tanan nilang gihimo para nimo. Mapakita nimo ang imong apresasyon pinaagi sa pagsunod sa ilang mga sugo. (Proverbio 7:1, 2; 23:26) Ang Bibliya nag-ingon nga ang mga ginikanan maoy “katahom” alang sa mga anak. Sa ato pa, garbo sa mga anak ang ilang mga ginikanan.—Proverbio 17:6.
Magpasakop sa ilang awtoridad. Samtang bata ka pa, mapasidunggan nimo ang imong mama ug papa dihang ilhon nimo nga sila gihatagag awtoridad sa Diyos. Ang Colosas 3:20 nagsugo sa mga anak: “Magmasinugtanon sa inyong mga ginikanan sa tanang butang, kay kini makapahimuot pag-ayo sa Ginoo.” Bisan gani si Jesus, niadtong bata pa, kinabubut-ong nagpasakop sa iyang ginikanan.—Lucas 2:51.
Tahora sila. (Levitico 19:3; Hebreohanon 12:9) Kini sagad maglangkit sa imong isulti ug sa imong paagi sa pagsulti. Tinuod, ang mga ginikanan mogawi usahay sa paagi nga malisdan ka sa pagpakitag pagtahod kanila. Pero angay gihapon nimong pasidunggan ang imong mga ginikanan pinaagi sa matinahorong mga pulong ug buhat. (Proverbio 30:17) Ang Bibliya nagtudlo nga seryosong sala kon imong sultihag sakit ang imong mama o papa.—Mateo 15:4.
Ayaw silag pasagdi. Dihang matigulang na ang imong mama ug papa, sila magkinahanglan tingalig praktikal nga tabang. Mapasidunggan nimo sila pinaagi sa pag-atiman sa ilang mga panginahanglan. (1 Timoteo 5:4, 8) Pananglitan, sa hapit nang mamatay si Jesus, giseguro niya nga dunay makaatiman sa iyang mama.—Juan 19:25-27.

Sayop nga mga pagsabot bahin sa pagpasidungog sa mga ginikanan

Sayop nga pagsabot: Aron mapasidunggan nimo ang imong mama ug papa, pasagdi silang maoy magdesisyon sa imong kaminyoon.

Ang tinuod: Ang Bibliya nag-ingon nga responsibilidad sa magtiayon ang pagdesisyon alang sa ilang kaminyoon, dili ang mga ginikanan o paryente. Ang Genesis 2:24 nag-ingon: “Ang lalaki mobiya sa iyang amahan ug sa iyang inahan ug siya kinahanglang moipon sa iyang asawa.” (Mateo 19:4, 5) Siyempre, ang mga magtiayon makapangayog tambag sa ilang mga ginikanan o mga ugangan. (Proverbio 23:22) Pero dunay katungod ang magtiayon sa pagdesisyon kon sundon ba nila o dili ang gusto sa ilang mga ginikanan o paryente maylabot sa ilang kaminyoon.—Mateo 19:6.

Sayop nga pagsabot: Ang imong papa ug mama ang kanunayng masunod.

Ang tinuod: Bisag gihatagan sa Diyos ang mga ginikanan ug awtoridad diha sa pamilya, ang tanang awtoridad sa tawo dunay mga limitasyon. Kini nga mga awtoridad dili angayng mosupak sa awtoridad sa Diyos. Pananglitan, dihang ang hataas nga hukmanan mihatag ug mando sa mga tinun-an ni Jesus nga supakon ang Diyos, ang mga tinun-an mitubag: “Kinahanglang among sugton ang Diyos ingong magmamando inay ang mga tawo.” (Buhat 5:27-29) Sa susama, ang mga anak mosunod sa ilang mga ginikanan nga “nahiusa sa Ginoo,” nga nagpasabot sa tanan nilang sugo nga wala mosupak sa mga balaod sa Diyos.—Efeso 6:1.

Sayop nga pagsabot: Aron mapasidunggan nimo imong mama ug papa, kinahanglan nimong sundon ang ilang relihiyosong mga pagtulon-an.

Ang tinuod: Ang Bibliya nagdasig nga atong susihon kon tinuod ba o dili ang mga butang nga gitudlo sa ato. (Buhat 17:11; 1 Juan 4:1) Kon himoon kini sa usa ka tawo, posible nga sa dili madugay pilion niya ang pagtulon-an nga lahi sa gitudlo sa iyang ginikanan. Gihisgotan sa Bibliya ang daghang matinumanong alagad sa Diyos nga wala mosunod sa relihiyon sa ilang ginikanan, sama ni Abraham, Ruth, ug apostol Pablo.—Josue 24:2, 14, 15; Ruth 1:15, 16; Galacia 1:14-16, 22-24.

Sayop nga pagsabot: Aron mapasidunggan nimo imong mama ug papa, kinahanglang moapil ka sa ilang naandang mga rituwal sa pagsimbag katigulangan.

Ang tinuod: Ang Bibliya nag-ingon: “Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.” (Lucas 4:8) Dili malipay ang Diyos sa tawong nagasimba sa mga katigulangan. Ang Bibliya sab nag-ingon nga ang mga patay “walay nahibaloan nga bisan unsa.” Sa ato pa, wala sila mahibalo sa gihimong pagsimba o pasidungog para nila. Dili sab sila makatabang o makahimog kadaot sa mga buhi.—Ecclesiastes 9:5, 10; Isaias 8:19.