Ang mga Kristohanon nagtuo nga si Jesus namatay para sa mga sala sa katawhan. (1 Pedro 3:18) Pero aron maluwas, dili igo ang basta pagtuo lang kang Jesus ingong Manluluwas. Ang mga demonyo nahibalo nga si Jesus “ang Anak sa Diyos,” pero sila malaglag, dili maluwas.​—Lucas 4:41; Judas 6.

•  Unsay kinahanglan nakong buhaton aron maluwas?

•  Makatabang ba ang “Pag-ampo sa Makasasala”?

•  Diin gikan ang “Pag-ampo sa Makasasala”?

•   Kinahanglang motuo ka nga si Jesus naghalad sa iyang kinabuhi para sa atong mga sala. (Buhat 16:30, 31; 1 Juan 2:2) Apil niini ang pagtuo nga si Jesus tinuod nga persona ug nga husto ang tanang gisulti sa Bibliya bahin kaniya.

•   Sayra kon unsa gyoy gitudlo sa Bibliya. (2 Timoteo 3:15) Ang Bibliya nag-ingon nga gisultihan ni apostol Pablo ug Silas ang guwardiya sa bilanggoan: “Tuo sa Ginoong Jesus, ug maluwas ka.” Human niana, gisugdan nila pagtudlo kaniya ang “pulong ni Jehova.” a (Buhat 16:31, 32) Gipakita niini nga ang guwardiya sa bilanggoan dili makabaton ug tinuod nga pagtuo kang Jesus gawas kon nasabtan niya ang importanteng mga pagtulon-an sa Pulong sa Diyos. Gikinahanglan niya ang tukmang kahibalo nga gibase sa Kasulatan.​—1 Timoteo 2:3, 4.

•   Maghinulsol. (Buhat 3:19) Kinahanglan sab kang maghinulsol, o mobatig grabeng kaguol, tungod sa imong sayop nga panghunahuna ug binuhatan kaniadto. Ang imong paghinulsol makita sa uban dihang mohunong na ka sa paghimo sa mga butang nga gidumtan sa Diyos ug mohimo na sa “mga buhat nga nagpakitag paghinulsol.”​—Buhat 26:20.

•   Magpabawtismo. (Mateo 28:19) Si Jesus miingon nga kadtong mahimo niyang mga tinun-an magpabawtismo. Ang guwardiya sa bilanggoan nga gihisgotan ganina gibawtismohan. (Buhat 16:33) Sa susama, human tudloi ni apostol Pedro ang daghang tawo sa kamatuoran bahin kang Jesus, “kadtong malipayong midawat sa iyang pulong nabawtismohan.”​—Buhat 2:40, 41.

•   Sunda ang mga sugo ni Jesus. (Hebreohanon 5:9) Kadtong ‘nagtuman sa tanang’ gisugo ni Jesus nagpakita pinaagi sa ilang paagi sa pagkinabuhi nga sila iyang mga sumusunod. (Mateo 28:20) Sila nahimong “mga magtutuman sa pulong ug dili tigpaminaw lang.”​—Santiago 1:22.

•   Lahutay hangtod sa kataposan. (Marcos 13:13) Ang mga tinun-an ni Jesus ‘kinahanglang molahutay’ aron maluwas. (Hebreohanon 10:36) Pananglitan, si apostol Pablo mituman gyod sa tanang gisugo ni Jesus, ug nagpabilin siyang maunongon sa Diyos. Padayon niya kining gihimo sugod sa iyang pagkahimong Kristohanon hangtod sa iyang kamatayon.​—1 Corinto 9:27.

 Sa pipila ka relihiyon, ang mga tawo molitok ug mga pag-ampo sama sa “Pag-ampo sa Makasasala” ug “Pag-ampo sa Kaluwasan.” Kasagaran, kadtong nag-ampo moangkon sa ilang pagkamakasasala ug mopahayag ug pagtuo nga si Jesus namatay para sa ilang mga sala. Dapiton sab nila si Jesus sa pagpuyo sa ilang kasingkasing ug kinabuhi. Pero ang Bibliya wala maghisgot o magrekomendar sa “Pag-ampo sa Makasasala.”

 Ang pipila ka tawo naghunahuna nga human nila litoka ang “Pag-ampo sa Makasasala,” luwas na sila hangtod sa hangtod. Pero ang usa dili maluwas tungod lang kay nag-ampo siya. Kay dili hingpit, padayon tang makahimog sayop. (1 Juan 1:8) Tungod niana, gitudloan ni Jesus ang iyang mga sumusunod nga mag-ampo kanunay para sa kapasayloan sa mga sala. (Lucas 11:2, 4) Dugang pa, ang pipila ka Kristohanon nga puwede untang mabuhi sa walay kataposan nawad-an niana nga paglaom kay mihunong sila sa pag-alagad sa Diyos.​—Hebreohanon 6:4-6; 2 Pedro 2:20, 21.

 Ang mga historyano wala magkauyon bahin sa sinugdanan sa “Pag-ampo sa Makasasala.” Ang pipila nag-ingon nga kini nga tradisyon nagsugod panahon sa Protestanteng Repormasyon. Ang uban nagtuo nga ang mga tawo nagsugod paglitok sa “Pag-ampo sa Makasasala” dihang nahimong popular ang bag-ong relihiyosong mga ideya sa katuigan sa 1700 ug 1800. Bisan unsa pa man, ang paghimo niana wala ibase sa Bibliya. Gani, supak kini sa gitudlo sa Bibliya.