Oo. Samtang naa sa yuta, gituman ni Jesus ang daghang tagna bahin sa “Mesiyas nga Pangulo,” ang usa nga mahimong “Manluluwas sa kalibotan.” (Daniel 9:25; 1 Juan 4:14) Ug bisan human sa iyang kamatayon, padayong gituman ni Jesus ang mga tagna bahin sa Mesiyas.​—Salmo 110:1; Buhat 2:34-36.

•  Unsay kahulogan sa “Mesiyas”?

•  Posible ba nga dili lang sa usa ka tawo matuman ang mga tagna bahin sa Mesiyas?

•  Sa umaabot pa ba motungha ang Mesiyas?

•  Pila ka tagna bahin sa Mesiyas ang naa sa Bibliya?

•  Pipila ka tagna bahin sa Mesiyas nga natuman kang Jesus

 Ang Hebreohanong termino nga Ma·shiʹach (Mesiyas) ug ang katumbas niini sa Gregong pinulongan nga Khri·stos (Kristo) parehong nagkahulogan nga “Usa nga Dinihogan.” Busa ang “Jesu-Kristo” nagkahulogang “Jesus ang Usa nga Dinihogan,” o “Jesus ang Mesiyas.”

 Sa kapanahonan sa Bibliya, kon ang usa ka tawo itudlo sa usa ka espesyal nga posisyon sa awtoridad, sagad dihogan siya pinaagi sa pagbubo ug lana sa iyang ulo. (Levitico 8:12; 1 Samuel 16:13) Si Jesus mao ang gitudlo sa Diyos nga mahimong Mesiyas​—posisyon nga may dako kaayong awtoridad. (Buhat 2:36) Pero imbes dihogan si Jesus pinaagig lana, ang Diyos nagdihog kaniya pinaagi sa balaang espiritu.​—Mateo 3:16.

 Dili. Sama nga ang fingerprint nagpaila lang sa usa ka tawo, ang katumanan sa mga tagna sa Bibliya nagpunting lang sa usa ka Mesiyas, o Kristo. Pero ang Bibliya nagpasidaan nga “motungha ang mini nga mga Kristo ug mini nga mga manalagna ug maghatag ug dagkong mga ilhanan ug mga katingalahan aron sa pagpahisalaag, kon mahimo, bisan sa mga pinili.”​—Mateo 24:24.

 Dili. Ang Bibliya nagtagna nga ang Mesiyas maoy kaliwat ni Haring David sa Israel. (Salmo 89:3, 4) Pero nawala na ang mga rekord sa kaliwat sa mga Hudiyo sukad kang David, lagmit nadaot kini dihang gisakop sa mga Romano ang Jerusalem niadtong 70 C.E. a Sukad nianang panahona, kadtong mangangkon nga siya kaliwat sa harianong pamilya ni David dili na makapamatuod niana. Sa kasukwahi, bisag naglungtad pa sa panahon ni Jesus ang maong mga rekord sa kaliwat, ang mga kaaway ni Jesus dili gihapon makapanghimakak nga siya kaliwat ni David.​—Mateo 22:41-46.

 Imposibleng matino ang eksaktong gidaghanon sa mga tagna bahin sa Mesiyas. Pananglitan, mahimong lainlain ang paagi sa pag-ihap sa mga tagna bisan sa mga teksto nga klarong nagtumong sa Mesiyas. Ang Isaias 53:2-7 naghisgot ug pipila ka detalye bahin sa gitagna nga Mesiyas. Kini nga mga bersikulo iphon tingali sa uban ingong usa ka tagna samtang ang uban mag-ihap sa matag detalye ingong laing tagna.