“Kay ang espiritu nga gihatag sa Diyos kanato wala maghimo kanato nga talawan, kondili kini naghatag kanatog gahom ug gugma ug maayong panghunahuna.”—2 Timoteo 1:7, Bag-ong Kalibotang Hubad.

 “Kay ang Diyos wala maghatag kanatog espiritu sa kahadlok, kondili sa gahom ug sa gugma ug sa maayong panghunahuna.”—2 Timoteo 1:7, New King James Version.

 Ang Diyos makatabang aron ang usa ka tawo makabatog kaisog sa paghimo sa kon unsay husto. Dili gusto sa Diyos nga ang usa madaog sa ‘katalaw’—kahadlok nga makapugong sa usa sa paghimo sa mga butang nga makapalipay Kaniya.

 Konsideraha ang tulo ka hinatag sa Diyos nga mga hiyas nga gihisgotan niini nga teksto, nga motabang sa usa nga dili mahadlok o motalaw.

 “Gahom.” Ang mga Kristohanon nakaalagad nga maisogon sa Diyos bisan pa sa daghang kaaway ug lisod nga mga situwasyon. Wala sila magpadaog sa kahadlok. (2 Corinto 11:23-27) Unsay nakatabang nila? Si apostol Pablo miingon: “Naa koy kusog sa pag-atubang sa tanang butang tungod kaniya nga naghatag nakog gahom.” (Filipos 4:13) Ang Diyos makahatag sa iyang mga magsisimba ug “gahom nga labaw sa kasarangan” sa pagdaog sa bisan unsang kalisdanan.—2 Corinto 4:7.

 “Gugma.” Ang dakong gugma para sa Diyos makatabang sa usa ka Kristohanon nga maisogong mobarog sa kon unsay husto. Sa susama, ang gugma para sa isigkatawo mopalihok sa usa ka Kristohanon nga unahon ang panginahanglan sa uban imbes sa iyang kaugalingon, bisan pa sa pagsupak o kapeligrohan.—Juan 13:34; 15:13.

 “Maayong panghunahuna.” Sa Bibliya, ang maayong panghunahuna nagtumong sa katakos sa usa ka Kristohanon sa paghimog maalamong mga desisyon nga gibase sa Bibliya. Ang tawo nga may maayong panghunahuna makapabiling makataronganon ug may maayong panghukom bisan pa sa mga kalisdanan. Makahimo siyag mga desisyon nga gibase sa panghunahuna sa Diyos, kay nahibalo siya nga ang iyang relasyon sa Diyos mas importante kay sa opinyon sa uban.

 Ang basahon sa Ikaduhang Timoteo gisulat ni apostol Pablo para sa iyang minahal nga higala ug isigkamagbubuhat nga si Timoteo. Niini nga sulat, mahigugmaong gidasig ni Pablo ang batabata nga si Timoteo nga magpadayon sa pagkugi sa ministeryo. (2 Timoteo 1:1, 2) Si Timoteo lagmit maulawon, nga mahimong makapugong niya sa paghimo sa tanan niyang maarangan para sa Kristohanong kongregasyon. (1 Timoteo 4:12) Pero gipahinumdoman ni Pablo si Timoteo nga nakadawat siyag gasa—usa ka espesyal nga asaynment sa pag-alagad sa kongregasyon. Gidasig niya si Timoteo sa paggamit sa iyang awtoridad ingong tigdumala sa kongregasyon, sa pagsangyaw sa maayong balita, ug sa paglahutay sa kalisdanan nga iyang naatubang tungod sa iyang pagtuo.—2 Timoteo 1:​6-8.

 Bisan pag kining mga pulonga gisulat para kang Timoteo, kini nagpasalig sa tanan nga gustong moalagad sa Diyos karon nga Siya mohatag sa tabang nga ilang gikinahanglan aron mahimo kana, bisan pa sa mga kalisdanan.