Gusto sa ubang nagtrabaho nga mga ginikanan nga ibutang ang ilang anak sa day-care center. Pasilidad ni nga morag klasrom. Makaayo ba ni sa imong anak?

•  Mga pangutana nga angay nimong hunahunaon

•  Ang imong mahimo

 Kon inyong ibutang sa day care ang inyong anak, naa ba ni di maayong epekto sa inyong relasyon niya? Posible. Sa unang mga tuig sa bata, paspas ang pag-develop sa iyang utok nga naay epekto sa iyang relasyon sa uban. Nianang panahona, paningkamoti nga pirme nimong kauban ang imong anak.​—Deuteronomio 6:6, 7.

•    Kon plano ninyong ibutang sa day care ang inyong anak, paningkamoti nga dili mawala ang inyong kasuod.

 Kon inyong ibutang sa day care ang inyong anak, mamenosan ba ang inyong impluwensiya niya? Posible. “Kon pirmeng magkauban ang mga bata, mas dako silag impluwensiya sa usag usa,” nag-ingon ang librong Hold On to Your Kids.

•    Kon plano ninyong ibutang sa day care ang inyong anak, hunahunaa kon unsaon nga kamo gihapon ang naay dakong impluwensiya sa inyong anak.

 Kon ibutang ninyo sa day care ang inyong anak, makatabang ba ni dihang moeskuwela na siya? Mao nay hunahuna sa uban. Ang uban moingon pod nga ang day care wala kaayoy mahimo sa pag-develop sa abilidad sa bata sa pagkat-on. Bisan asa pa ana ang sakto, ang child psychologist nga si Penelope Leach misulat: “Ayaw paghunahuna nga ang ‘edukasyon’ mao ang pinakaimportante sa kinabuhi ug nga mas maayo kon mas sayo mosugod ug eskuwela ang bata. Kon kanay imong gihunahuna, imong gibalewala ang ‘gitudlo’ nimo sa imong anak sukad sa iyang pagkatawo.”

•   Kon nagplano mong ibutang sa day care ang inyong anak, hunahunaa kon makaayo ba gyod ni o kinahanglan ba ni.

 Posible ba nga usa ninyong magtiayon ang dili magtrabaho aron mag-atiman sa inyong anak? Naay mga magtiayon nga silang duha ang nagtrabaho aron mas mohayahay ang ilang kinabuhi. Mas maayo ba ni?

•   Kon nagplano mo nga ibutang sa day care ang inyong anak, hunahunaa kon puwede bang menosan ang inyong gasto aron ang usa ninyo makaatiman sa inyong anak.

 Sa dili pa mo modesisyon nga ibutang sa day care ang inyong anak, hunahunaa pag-ayo ang maayo ug di maayong epekto niini. Komosta man kon makahunahuna mo nga maayo gyong ibutang sa day care ang inyong anak?

 Ang Bibliya nag-ingon nga “ang maalamon mamalandong sa matag lakang.” (Proverbio 14:15) Base ana nga prinsipyo, hunahunaa pag-ayo kon unsa nga day care ang inyong pilion.

 Sayra ang inyong mga opsiyon

•   Ang ubang ginikanan mopilig child-care home. Balay ni nga naay usa o pipila ka caregiver ug pipila ka bata.

•   Ang uban pod nga ginikanan mopili nga ipaatiman ang ilang anak sa paryente, stay-in nga caregiver, o yaya.

 Ang tanang opsiyon naay maayo ug dili maayong resulta. Puwede mong makig-estorya sa mga ginikanan nga nakasulay na nga ibutang ang ilang anak sa day care. Ang Bibliya nag-ingon: “Maalamon ang mangayog tambag.”​—Proverbio 13:10.

 Komosta man kon mopili mo nga ibutang sa day-care center ang inyong anak? Niana nga kahimtang . . .

 Sayra ang bahin sa pasilidad

•   Lisensiyado ba ni? Nagsunod ba ni sa balaod sa gobyerno? Unsay reputasyon niini?

•   Limpiyo ba ni ug luwas?

•   Unsay ilang ginapahimo sa mga bata? a

 Sayra ang bahin sa mga caregiver

•   Unsang pagbansay ang ilang nadawat? Apil ani ang early childhood education, first aid, ug CPR.

•   Makahimo ba mog background check kon naay criminal record kadtong moatiman sa inyong anak?

•   Pirme bang mapulihan ang ilang mga caregiver? Kon mao, magsigeg adyas ang inyong anak.

•   Unsa ka daghang bata ang giatiman sa usa ka caregiver? Kon daghan ang bata, dili kaayo maatiman ang inyong anak. Siyempre, ang atensiyon nga gikinahanglan sa bata magdepende kon unsay iyang edad ug kon unsay iyang mahimo.

•   Ang mga caregiver ba andam makig-estorya kon naay kinahanglang estoryahan?