Ang mga researcher nag-ingon nga gamiton sa mga iro ang panimaho niini aron mahibaloan ang edad ug emosyon sa ubang iro ug kon kini ba laki o baye. Gani, ang mga iro puwedeng mabansay nga mangitag mga bomba ug ilegal nga droga. Gamiton sa mga tawo ang ilang mata aron mahibaloan ang nagakahitabo sa ilang palibot, pero ilong ang gamiton sa mga iro.

 Hunahunaa: Ang panimaho sa iro libolibo ka beses nga mas maayo kay sa atoa. Sumala sa U.S. National Institute of Standards and Technology, ma-detect sa iro ang bisan gamay kaayong substansiya. “Parehas ni sa pagkutaw ug 1/4 sa kutsarita nga asukar diha sa swimming pool sa Olympics ug unya mahibaloan gihapon ang lami niini.”

 Nganong mas maayo ang panimaho sa iro kay sa atoa?

•   Ang ilong sa iro basabasa maong dali ra kining makapanimaho.

•   Ang ilong sa iro dunay duha ka agianan sa hangin—usa para sa pagginhawa ug ang lain para sa pagsimhot. Inigsimhot sa iro, ang hangin mopaingon sa parte sa nasal cavity nga dunay mga scent receptor.

•   Ang parte sa ilong sa iro nga gamiton niini sa pagpanimaho may sukod nga 130 sentimetro kuwadrado (20 sq in.) o kapin pa, samtang ang sa tawo may sukod lang nga 5 sentimetro kuwadrado (0.8 sq in.).

•   Ang mga scent receptor cell sa iro moabot pa ganig 50 ka pilo nga mas daghan kay sa atoa.

 Tungod niini, mailhan sa iro ang lainlaing bahin sa komplikadong baho nga mapanimahoan niini. Pananglitan, mapanimahoan nato ang sabaw, pero mailhan sa iro ang matag sangkap sa sabaw, sumala sa pipila ka eksperto.

 Ang mga researcher sa Pine Street Foundation, nga usa ka cancer research institute, nag-ingon nga ang kombinasyon sa utok ug ilong sa iro mao ang “usa sa labing talagsaong mga sistema sa pagpanimaho niining planetaha.” Ang mga siyentista naghimog elektronikong mga himan nga maka-detect ug mga bomba, kontrabando, ug sakit, sama sa kanser.

 Unsay imong hunahuna? Ang panimaho sa iro mitungha ba pinaagig ebolusyon? O kini ba gidisenyo?