Ang Labing Makaiikag nga mga Hitabo sa Miaging Tuig

ANG mga taho gikan sa tanang bahin sa kalibotan nagpamatuod nga puliki kaayo ang mga Saksi ni Jehova sa pagsangyaw sa maayong balita sa Gingharian “sa tibuok gipuy-ang yuta ingon nga pagpamatuod ngadto sa tanang kanasoran.” (Mat. 24:14) Tungod sa ilang pagkamalahutayon, panaghiusa, ug mahigugmaong paghago, ‘napalanog ang pulong ni Jehova, ug mikaylap sa tanang dapit ang ilang pagtuo sa Diyos.’​—1 Tes. 1:8.

MAKAPALIG-ON UG MAKALINGAW NGA PAMILYAHANONG PAGSIMBA

Niadtong Enero 1, 2009, dihay dakong kausaban sa eskedyul sa senemanang mga tigom sa mga Saksi ni Jehova. Ang Pagtuon sa Libro sa Kongregasyon gitawag na ug Pagtuon sa Kongregasyon sa Bibliya ug kini pagahimoon duyog sa  Teokratikanhong Tunghaan sa Ministeryo ug sa Tigom sa Pag-alagad. Gidasig ang tanan nga gamiton alang sa Pamilyahanong Pagsimba ang gabii nga gigahin kaniadto sa Pagtuon sa Libro sa Kongregasyon.

Unsay sanong sa mga alagad ni Jehova sa maong mahigugmaong kausaban? Daghan ang samag pagbati sa usa ka bana kinsa misulat: “Daghan kaayong salamat. Dili ikabatbat sa mga pulong ang benepisyo nga napahimuslan namong magtiayon sa Pamilyahanong Pagsimba sa gabii. Kini nakapalalom sa among gugma kang Jehova ug, sa samang higayon, kaming magtiayon nahimong mas suod. Maayo ug maalamon gayod kini nga kahikayan gikan sa atong langitnong Amahan!”

Unsay gihimo sa ubang pamilya aron makabenepisyo pag-ayo niining maong bag-ong kahikayan? Usa ka inahan misulat: “May panahon nga among hisgotan ang panid 31 sa Pagmata!, ug usahay manan-aw mig video sa organisasyon. Ang mga bata dili lamang makapanukiduki, apan sila makakat-on ug malingaw usab panahon sa Pamilyahanong Pagsimba. Usa ka bulan nga abante, iasayn sila sa pagtuki sa usa ka karakter sa Bibliya ug ila kining isaysay pagkasunod bulan. Himoon usab namo kana sa akong bana. Maayo kaayo ang pagkasaysay sa among diyes-anyos nga batang lalaki sa iyang unang asaynment bahin kang Noe! Gisultihan pa gani mi niya kon unsaon pagpadapat ang impormasyon karon. Unya gipagawas niya ang usa ka gamayng mod elo sa arka ni Noe nga iyang gibuhat. Pagkasunod semana, ang among anak babaye may bahin mahitungod sa mga panaw ni apostol Pablo ingong misyonaryo. Pagkahuman sa iyang bahin kami namakpak, ug unya siya misuknag mga pangutana kanamo sa bahin nga gitawag niyag Nahinumdom Ka Ba? Maayo kaayo kadto!” Ang maong pamilya nag-isip sa kahikayan sa Pamilyahanong Pagsimba ingong tinuod nga panalangin gikan kang Jehova. “Pait kaayo ang among kahimtang sa miaging tuig,” matod sa inahan, “ug kini nga kahikayan mao gayod ang among gikinahanglan aron makalahutay.”

 Ang laing sister misulat: “Buot kong magpasalamat sa maong tagana nga nakapukaw kanako sa espirituwal! Sa dihang ang among mga anak nanagko ug namiya na sa balay, kami sa akong bana wala nay regular nga pagtuon sa Bibliya ingong pamilya. Apan karon kini regular na. Ang among pagtuon sagad mokabat ug duha ka oras nga daw dili ra namo mamatikdan!”

Samtang mas nagkaduol ang dakong kasakitan, hinaot ang panahon nga imong gigahin alang sa Pamilyahanong Pagsimba makapalalom sa imong pagsabot sa Pulong sa Diyos ug makapalig-on sa imong espirituwalidad aron makasukol sa Yawa. Pahimusli gayod kining maong bililhong panahon sa pagpakigsuod sa Diyos aron siya makigsuod kanimo.​—Sant. 4:​7, 8.

DUGANG NGA PANINGKAMOT SA PAGTANYAG UG MGA PAGTUON SA BIBLIYA

Sugod sa Enero 2009, giawhag ang mga kongregasyon nga mogahin ug usa ka Sabado o Dominggo kada bulan sa pagtanyag ug mga pagtuon sa Bibliya. Ang resulta? Daghang magmamantala ang nasorpresa kay ang pagtanyag ug pagtuon sayon ra man diay kay sa gidahom. Sila nalipay usab pag-ayo kay nagkadaiyang tawo ang midawat ug pagtuon pinaagi sa librong Unsay Tinuod nga Gitudlo sa Bibliya? Ang nagapanawng mga magtatan-aw nagtaho nga ang mga kongregasyon madasigon bahin sa maong bag-ong kahikayan, ug maayo kaayo kinig resulta bisag bag-o pa lang kining nagsugod. Pananglitan, sa unang lima ka bulan, kapig 8,000 ka bag-ong pagtuon sa Bibliya ang nasugdan sa Italya.

Ang mga magmamantala nga wala pa sukad makadumalag mga pagtuon aduna nay mga balikduaw ug mga pagtuon sa Bibliya karon. Si Carolina, nga taga-Peru, miingon: “Sa wala pa ang maong kahikayan ako walay gitun-an sa Bibliya, apan ang sugyot nga mogahin ug usa ka adlaw sa usa ka bulan alang niini nakapalihok kanako sa pagpaningkamot nga makabaton ug pagtuon sa Bibliya. Tungod  niini, napakita nako sa mga tagbalay nga ang pagtuon sa Bibliya sayon ra ug dili makahurot ug panahon. Nabatonan nako ang maayong mga resulta tungod sa tabang ni Jehova, ug pinaagi sa pagpadapat sa mga sugyot nga gihatag kanamo, ako nagdumala na karon ug duha ka pagtuon sa Bibliya.”

Si Satya, usa ka payunir nga sister sa Britanya, nagpanuko sa pagtanyag ug pagtuon sa Bibliya sa unang pagduaw. Apan sa adlaw nga gigahin alang niini, determinado gayod siyang mosulay sa maong paagi sa dili pa mopauli sa balay. Nalipay siya sa dihang may babaye nga midawat dayon sa iyang tanyag. Sayon ra diay kaayo kadto kay sa gidahom ni Satya!

Si Luca, usa ka batan-ong brader sa Palermo, Sicily, tigbilinan sa atong mga magasin sa usa ka biyuda nga nahadlok magpasulod kang bisan kinsa sa iyang balay. Usa ka Sabado sa hapon, sa adlaw sa pagtanyag ug pagtuon sa Bibliya, giduol ni Luca ang biyuda uban ang librong Gitudlo sa Bibliya nga gibuksan nang daan, ug iyang gibasa ang usa ka bahin niini. Ang babaye nainteres sa libro ug dugaydugayng nakigsulti kang Luca. Miingon si Luca nga anaa sa libro ang mga tubag sa iyang mga pangutana​—lakip ang pangutana nga iya pa bang makita pag-usab ang iyang bana. Gipakli ni Luca ang libro sa panid 72, nga nagpatin-aw kon kinsay banhawon. Ang babaye natandog sa maong paglaom ug midawat ug pagtuon sa Bibliya. Siya regular nang ginatun-an karon ug dili na mahadlok magpadayon ug mga Saksi.

“Sukad nga kini gisugdan,” nagtaho ang usa ka magtatan-aw sa sirkito sa Peru, “ang maong kahikayan nakatabang sa daghang kongregasyon sa pagpauswag sa gidaghanon sa ilang mga pagtuon sa Bibliya. Usa ka kongregasyon sa Chiclayo mitahog 25 ka bag-ong pagtuon sa usa ka bulan, ug sa Chepén, 24 ka bag-ong pagtuon ang nasugdan.”

Nagmalamposon usab ang batan-ong mga magmamantala sa pagtanyag ug mga pagtuon sa Bibliya. Ang 11-anyos  nga si Giovanna sa São Paulo, Brazil, miasoy: “Usa niana ka Sabado sa hapon ako namalaybalay uban sa akong inahan, nga nagtanyag ug mga pagtuon sa Bibliya ginamit ang librong Gitudlo sa Bibliya. Sa unang balay, akong gisukna ang tagbalay, nga usa ka iladong negosyante, kon nagtuo ba siya nga ang Bibliya inspirado sa Diyos. Miingon siya nga oo. Unya akong gipakita kaniya ang 2 Timoteo 3:16. Siya miingon nga siya natandog sa pagkakitag batang babaye nga nagsugilon kaniya ug nindot nga mga butang, ug gidawat niya ang libro.

“Sa dihang akong gibalikduaw ang maong tawo, gikuyog ko ang akong apohang lalaki kay siya nakaila man kaniya. Iya kaming gipadayon, ug ako siyang gipapilig ulohan nga labing nakapaikag kaniya diha sa kaundan sa librong Gitudlo sa Bibliya. Gipili niya ang kapitulo 11, ‘Nganong Gitugotan sa Diyos ang Pag-antos?’ Human mabasa ang unang duha ka parapo, siya ug ang iyang asawa misuknag daghang pangutana. Nalipay kaayo sila sa pagkaplag sa tanang tubag diha sa Bibliya, ug sila miuyon nga regular nga magtuon. Dako kaayo ang akong kalipay nga nakasugod ug pagtuon sa unang balay nga among gisangyawan!”

Hinuon, dili tanan ang modawat ug pagtuon sa Bibliya, ug dili tanan nga mosugod ang magpadayon. Apan, isip mga isigkamagbubuhat sa Diyos, kita mopadayon sa pagtanyag ug mga pagtuon sa Bibliya sa labing daghang tawo kutob sa mahimo, kay nahibalo nga si Jehova maoy nagakabig sa mga tawong karnerohon ngadto sa iyang organisasyon sa dili pa laglagon ang sistema sa mga butang ni Satanas.​—Juan 6:44; 1 Cor. 3:9.

ANG TEKNOLOHIYA “MAGPADALI NIINI”

Ang katawhan ni Jehova nalipay sa pagkatuman sa kulbahinam nga tagna: “Ang diyutay mahimong usa ka libo, ug ang gamay usa ka gamhanang nasod. Ako, si Jehova, magpadali niini sa kaugalingong panahon niini.” (Isa.  60:22) Segurado nga padayong gigamit ni Jehova ang teknolohiya aron madali ang espirituwal nga pag-uswag niining kulbahinam nga panahon. Busa, ang Nagamandong Lawas nag-awtorisar sa paghimog administration software system nga magamit sa tanang sangang buhatan sa tibuok kalibotan.

Ang grupo nga naghimo niana, nga sa sinugdan nagsukad sa sanga sa South Africa, mibalhin ngadto sa Tibuok-Kalibotang Hedkuwarter sa Brooklyn, New York, diin sila padayong nag-ugmad ug nagmentinar sa maong software. Mga 20 ka sangang buhatan ang nagsilbing regional support center nga moayuda sa duol nga mga sangang buhatan aron makapahimulos niining maong mapuslanong programa sa kompiyuter.

Unsay mga benepisyo niini? Kay sama rang software ang gigamit sa tanang sangang buhatan, sila makapaambitay ug impormasyon. Pananglitan, mahimong masayran sa tanang tig-imprenta nga sangang buhatan sa tibuok  kalibotan kon unsay estak nga literatura sa ubang mga sanga. Kon ang usa ka sangang buhatan adunay sobrang estak sa usa ka basahon, ang laing sangang buhatan makahangyo niana imbes mag-imprentag bag-ong suplay. Kini, ug ang uban pang bahin sa programa nga makakalkulo sa umaabot nga gikinahanglang literatura nga gibase sa nangaging mga order, nakatabang aron mamenosan ang sobrang estak sa literatura sa ubang sangang buhatan.

Kana nga programa nakatabang sa mga Bethelite aron mapadali ang pagproseso sa mga order sa literatura ug mga magasin, pagtipig sa tinuig nga mga taho sa kanataran, paghikay sa mga kombensiyon ug asembliya, ug pag-asayn sa mga nagapanawng magtatan-aw ug espesyal payunir. Ang software mapuslanon usab sa pagpamalit, pagkuwenta, ug pag-imbentaryo, busa wala na kaayo ta magsalig sa mahalong komersiyal nga software.

PAGPASIDLAK SA ESPIRITUWAL NGA KAHAYAG DIHA SA INTERNET

Sama nga ang literal nga kahayag molapos sa ngitngit nga mga suok, ang katawhan sa Diyos usab ‘nagpalamdag sa ilang kahayag’ sa tanang bahin sa yuta. (Mat. 5:16) Ang usa ka mapuslanong kasangkapan nga naglamdag sa kinahilitang mga dapit mao ang atong opisyal nga Web site nga www.watchtower.org. Kini adunay mga artikulo sa mga magasin, tract, ug brosyur diha sa mga 383 ka pinulongan, ingon man ang kompletong New World Translation of the Holy Scriptures diha sa 11 ka pinulongan. Tanantanan, ang Web site adunay kapig 700 ka artikulo. Ang home page, nga ginabag-o kada semana, adunay bag-ong mga artikulo bahin sa popular nga mga topiko. Unsay mga kaayohan nga mabatonan na diha sa Internet ang mga publikasyon nga naimprenta sa daghang pinulongan?

Nadiskobrehan ni Pat nga taga-Florida, U.S.A., nga ang Web site mao ang kinadaliang paagi sa pagbatog literatura diha sa langyawng mga pinulongan. Siya misulat: “Human sa among pagpanagtag sa tract nga Would You Like to Know the Truth? ako nag-imprenta niana diha sa mga pinulongan  sa pipila ka tawong midawat sa Iningles nga kopya apan nagsultig laing pinulongan.” Unsay resulta?

Nag-imprenta si Pat ug tract sa pinulongang Thai alang sa usa ka babaye nga tag-iyag gamayng tindahan. Siya nalipay ug dili makatuo nga nakakaplag dayon si Pat ug basahong Thai. Ang maong babaye ug ang ubang kustomer sa tindahan buot mahibalo sa atong Web site aron ila kanang mabuksan. Si Pat gidapit sa usa sa mga kustomer sa iyang balay aron ipadayon ang ilang panaghisgot. Sama kang Pat, nakita sa daghan nga mapuslanon ang pag-imprenta ug pipila ka panid diha sa lainlaing mga pinulongan gikan sa Web site aron ikahatag sa interesadong mga tawo nga laig nasyonalidad.

Sa miaging tuig, kapig 24 ka milyong tawo gikan sa tanang kontinente ang nagbukas sa atong Web site. Sukad sa 2007, kana miuswag ug 33 porsiyento. Daghang tawo gikan sa tibuok kalibotan, lakip sa hilit nga kaislahan, naghangyo nga duawon sila sa personal o dumalahag pagtuon sa Bibliya sa balay. Sukad sa 2007 miuswag ug mga 55 porsiyento ang gidaghanon sa gipadalang mga kupon diha  sa Internet. Oo, ang espirituwal nga kahayag nagalamdag diha sa kinahilitang mga bahin sa yuta alang sa kadayegan ug kahimayaan sa atong Amahan sa kalangitan.​—Mat. 5:16.

Gawas pa sa www.watchtower.org nga Web site, ang www.ps8318.com gidisenyo aron ang pipila ka pangunang publikasyon ikabutang sa digital nga porma. Unsa ka mapuslanon ang maong Web site?

Si Trisha, nga taga-Missouri, U.S.A., nagpahayag sa pagbati sa daghan sa dihang siya miingon, “Naghinamhinam ko sa pag-abot sa Huwebes.” Ngano? Kay ang Huwebes sagad mao man ang adlaw nga maka-download siyag mga rekording sa bag-ong mga isyu sa magasing Watchtower ug Awake! gikan sa www.ps8318.com. Si Trisha maoy usa sa libolibo sa atong kaigsoonan sa tibuok kalibotan nga tigbukas niining Web site nga tugob sa espirituwal. Sila nag-download ug audio nga mga magasin, Bibliya, drama, libro, brosyur, ug mga tract diha sa 27 ka pinulongan. Ang mga publikasyon sa American Sign Language mabatonan usab diha sa duha ka popular nga video format.

Kinsay naggamit niining maong Web site aron i-download ang atong mga publikasyon? Sa panguna, ang atong mga igsoon. Apan naggamit usab niini ang ubang mga tawo sa kapig 200 ka nasod, lakip sa pipila ka kayutaan diin gidili ang atong buluhaton. Adunay regular nga tigbukas sa atong Web site gikan sa Papua New Guinea, St. Helena, ug bisan sa Antartika. Sa unsang paagi ang atong mga igsoon makabenepisyo sa ma-download nga mga audio? Sa French Polynesia, pananglitan, kasagarang maulahi ang pag-abot sa suplay sa atong pinatik nga mga magasin. Sanglit ang mga magmamantala bisan sa kinahilitang mga isla makagamit mag Internet, sila makapamati sa kinabag-ohang mga isyu sa adlaw nga kini gibutang sa Web site.

Si Deborah, nga taga-Illinois, U.S.A., adunay seryosong mga suliran sa panglawas nga tungod niana usahay dili  siya makatambong sa mga tigom ug malisdan sa paghinumdom sa iyang nabasa. Siya karon maka-download ug makapamati na sa mga publikasyon. Siya miingon: “Makahinumdom na ko sa mga materyal, ug makasaysay na ko sa akong nadungog nga may pagsalig.”

Dihay magtiayon sa usa ka gamayng lungsod sa Texas, U.S.A., nagdumalag pagtuon sa Bibliya uban sa usa ka taga-Siberia, ug sila nalipay nga maka-download ug audio nga mga magasin alang kaniya sa pinulongang Ruso. Usa ka brader nga taga-California, U.S.A., ang ganahang mamati sa atong mga magasin ginamit ang digital player ug earphone samtang mag-jogging sayo sa buntag.

Kada semana, ang usa ka magtiayon sa usa ka gamayng lungsod sa amihanang New Zealand tig-download ug materyal alang sa mga tigom​—tun-anang artikulo sa Watchtower, mga kapitulo gikan sa mga librong “Keep Yourselves in God’s Love” ug Learning From the Great Teacher, ug ang giasayn nga pagbasa sa Bibliya alang sa semana. Ilang pamation ang materyal sa tibuok semana. Ang bana mikomento, “Among namatikdan nga kami kanunay nang mag-estorya bahin sa espirituwal nga mga butang imbes sa mga problema sa trabaho.” Daghang pamilya sa tibuok kalibotan ang adunay susamang rutina.

Kada semana, ang mga kapitulo alang sa naasayn nga pagbasa sa Bibliya i-download ug libolibo ka beses​—ilabina kada Martes. Daghan kaayo ang mag-download sa tun-anang artikulo sa Watchtower matag Sabado ug Dominggo. Dugang pa, ang mga ansiyano direktang makaimprenta ug mga porma sa organisasyon ug mga laraw sa pakigpulong gikan sa Web site. Sa katibuk-an, ang maong mga tagana makatabang sa organisasyon aron makadaginot ug oras, salapi, ug kahago.

‘MOSANGPOT KINI INGONG USA KA PAGPAMATUOD’

Bisag ang mga Saksi ni Jehova naningkamot sa “pagkinabuhi nga mahusay ug malinawon uban ang bug-os nga  diyosnong pagkamahinalaron,” dili sila masorpresa sa dihang sila lutoson. (1 Tim. 2:​1, 2) Nagpasidaan si Jesu-Kristo sa iyang mga tinun-an nga sila pagadumtan, sa dihang siya miingon: “Pagadakpon kamo sa mga tawo ug pagalutoson kamo, nga igatugyan kamo ngadto sa mga sinagoga ug sa mga bilanggoan, ug pagataralon kamo atubangan sa mga hari ug sa mga gobernador tungod sa akong ngalan.” Apan, gipakita ni Jesus nga ang maong paglutos mosumbalik ngadto sa mga kaaway sa putling pagsimba. Siya mitagna: “Mosangpot kini alang kaninyo ingong usa ka pagpamatuod.”​—Luc. 21:​12, 13, 17.

Ingong katumanan sa tagna ni Jesus, ang mga Saksi ni Jehova nagsagubang ug inhustisya sa daghang dapit. Ang kadaogan sa mga kaso sa korte diha sa daghang nasod nakatabang sa pagpanalipod sa ilang legal nga kagawasan, apil sa katungod sa pagsangyaw sa balaybalay ug pagtigom alang sa pagsimba. Bisag nagpabilin pa ang pipila ka suliran, naangkon nato ang dagkong mga kadaogan sa korte karong tuiga nga nagpamatuod nga ang atong mga kalihokan maoy relihiyoso.

Austria

Human sa 30 ka tuig nga pagpakigbisog sa atong mga igsoon, niadtong Mayo 2009 ang Federal Ministry of Education, Art, and Culture sa Austria bug-os nga nag-ila sa mga Saksi ni Jehova isip usa ka relihiyosong pundok. Pagkakaron, ang mga Saksi maoy ika-14 nga relihiyosong kapunongan nga giila sa Austria. Human sa paborableng desisyon sa European Court of Human Rights niadtong Hulyo 2008, ang Korte nagpakanaog ug tulo pa ka desisyon pabor sa atong mga igsoon sa Austria, ug tungod niana ang mga Saksi ni Jehova bug-os nang giila ingong relihiyosong kapunongan.

South Africa

Sa 2005, ang usa ka kaso batok sa South African Department of Labour gipasaka ngadto sa Labour Court of South Africa ingong pagsuportar sa Watch Tower Bible and Tract Society of South Africa ug sa mga membro  sa Worldwide Order of Special Full-Time Servants of Jehovah’s Witnesses nga nag-alagad sa Bethel sa South Africa. Kining kasoha gipasaka aron ang korte modesisyon nga ang mga Bethelite dili klasipikahong mga empleyado ubos sa mga balaod maylabot sa mga mamumuo sa South Africa. Sa Marso 2009, ang Labour Court midesisyon pabor niana ug gipamatud-an nga relihiyoso ang mga kalihokan diha sa Bethel.

Uganda

Sa 2007, ang Uganda Revenue Authority (URA) miingon nga ang mga membro sa Worldwide Order of Special Full-Time Servants of Jehovah’s Witnesses nga nag-alagad sa Bethel sa Uganda maoy mga empleyado sumala sa Income Tax Act sa Uganda. Ang International Bible Students Association (IBSA) nagpasaka ug resolusyon bahin niini ngadto sa High Court sa Uganda sa Kampala batok sa URA. Sa Hunyo 2009, ang High Court midesisyon pabor sa IBSA kay ilang nasuta nga ang mga Bethelite sa Uganda dili mga empleyado. Ang korte miingon nga ang mga Bethelite “pareho rag alawans bisag unsay ilang trabaho,” ug mihinapos nga sila maoy membro sa usa ka relihiyosong orden nga gipakaon, gihatagag puy-anan ug gamayng alawans alang sa personal nga mga panginahanglan samtang naghimo sa ilang relihiyosong kalihokan sa Uganda.

Armenia

Padayong gipanakop ug gipamriso sa mga awtoridad ang atong mga brader nga naa na sa hustong edad, kay sila wala magsundalo tungod sa ilang konsensiya. Niadtong Agosto 2009, 74 ka brader na ang napriso. Kay ang tanang korte sa nasod nagdesisyon man batok sa mga brader, upat ka separadong aplikasyon ang gipayl ngadto sa European Court of Human Rights alang sa ilang kagawasan. Ang gobyerno padayon usab nga nagpahamtang ug hinobrang Value Added Tax sa relihiyosong literatura nga madawat sa atong mga igsoon gikan sa ubang nasod. Tangtangon man o dili kining hinobrang buluhisan, makasalig kitang dili magutman sa espirituwal ang atong mga igsoon.​—Isa. 65:13.

 Azerbaiyjan

Ang atong mga igsoon dinhi inanayng nawad-an sa ilang kagawasan sa pagsimba. Lisod alang kanila ang sa pagbatog literatura ug paghikay ug mga tigom. Ang mga Saksi giilang legal sa Baku, ang kaulohang siyudad, apan sa ubang siyudad sila wala marehistro mao nga ang mga polis kanunayng moronda sa mga tigom diha sa pribadong mga balay, ug unya sila itener sulod sa daghang oras diha sa mga estasyon sa kapolisan. Kini nahitabo bisag walay balaod nga nag-ingong ang mga magsisimba angayng magparehistro aron makatigom diha sa pribadong mga balay. Sa Abril 9, 2009, ang atong mga igsoon nagparehistro sa gobyerno sa Azerbaijan. Hinaot makatabang kini sa atong mga igsoon didto.

Ehipto

Sulod sa miaging tulo ka tuig, ang mga igsoon gikan sa Ehipto maingon man sa Belgium, Italya, ug Estados Unidos nakigmiting sa mga awtoridad sa Ehipto aron malegal ang atong buluhaton. Tungod niana ang mga awtoridad nagtugot sa atong mga igsoon sa pagsimbang malinawon diha sa pribadong mga balay sa grupo nga tag-30. Bisan pa niana, ang pipila ka ahensiya sa gobyerno nagpadayon sa pagmaltratar sa atong mga igsoon. Ang State Security nagpadayon sa pagpaniktik sa atong mga igsoon ug usahay magsukitsukit ug magbahad sa mga membro sa kongregasyon. Gawas pa sa pagpakigtagbo sa mga awtoridad, ang atong mga igsoon aduna pay gihimong mga paningkamot aron malegal ang atong buluhaton.

Eritrea

Sa kawalay-pagtahod sa tawhanong mga katungod, gidakop sa mga awtoridad ang 23 ka membro sa usa ka kongregasyon niadtong Hunyo 28, 2009, apil ang tigulang nga mga igsoong babaye ug tulo ka bata nga nagpangedarog dos ngadto sa kuwatro anyos. Bisag gibuy-an ang tigulang nga mga igsoong babaye, gibilin ang mga bata sa prisohan uban sa ilang mga inahan; ang ilang mga amahan dugay nang napriso. Busa pamilya-pamilya na ang napriso. Aduna nay 64 ka igsoon nga napriso, nga naglakip sa  tulo ka brader nga gipriso sukad pa sa 1994 tungod sa ilang neyutral nga baroganan bahin sa pagsundalo nga wala gani pahibaloa kon unsang mga balaora ang ilang nalapas.

India

Sulod sa miaging pipila ka tuig, ang mga Saksi ni Jehova sa India giatake sa bangis nga mga tawo samtang nagsangyaw sa kanataran. Sila usab gidagmalan sa binaba ug pisikal nga paagi, gibaharan nga bilanggoon, ug gisunog ang ilang literatura. Kasagaran, human kulataha, ang atong mga igsoon dakpon, prisohon ug pasakaan ug kriminal nga kaso. Sulsolan sa bangis nga mga tawo ang mga awtoridad pinaagi sa pag-akusar nga ang atong mga igsoon naglapas sa lokal nga mga balaod.

Pananglitan, niadtong Disyembre 2008, ang tulo ka Saksi ni Jehova (inahan, iyang anak babaye, ug diyes-anyos nga apong babaye) sa Kundapura, Karnataka, nagbalikduaw sa usa ka babayeng interesado sa Bibliya sa Koni Village. Wala madugay, lima o unom ka lalaki ang puwersadong nagdala sa tulo ka Saksi ngadto sa estasyon sa kapolisan. Midugok ang magubtanong mga tawo, ug giakusahan sa mga polis ang mga sister ug trespassing, pagpasiugdag pagkontrahay, ug pagpanginsulto sa laing relihiyon. Sa kadugayan sila gipapauli ra. Sa maong mga kahimtang, ang atong mga igsoon gitabangan na sa legal nga paagi.

Moldova

Ang atong mga igsoon sa Transnistria, ang rehiyong giila nga sakop pa sa Moldova, padayong nagmadasigon alang sa intereses sa Gingharian bisan pag mga 12 ka tuig na silang gihulga nga ibando o puohon. Bisan pa sa daghang kalisdanan, sila gipanalanginan ni Jehova ug nagmalamposon sa pagdepensa sa intereses sa Gingharian diha sa mga korte. Aniay tulo ka pananglitan: Usa ka paring Ortodokso nga nagpasipala ug nagdagmal sa atong duha ka sister nga nagsangyaw sa baryo sa Ordăşei ang nahukmang sad-an ug gipamulta, ang korte sa siyudad sa  Tiraspol midesisyon pabor sa atong mga igsoon nga naningkamot sa pagparehistro sa atong pundok didto, ug ang usa ka desisyon gipakanaog batok sa Rîbniţa City Tax Inspectorate tungod sa ilegal nga pagpangayog buhis sa pagkaon sa mga boluntaryong nagtukod ug usa ka Kingdom Hall.

Kazakhstan

Ang General Prosecutor’s Office sa Kazakhstan mihimog mga protesta, apan ang korte midesisyon pabor sa atong mga igsoon. Una pa niana, ang mga korte sa Kyzylorda, Shymkent, ug Saryagash nagmando nga ipahunong ang atong relihiyosong kalihokan sulod sa unom ka bulan. Apan niadtong Nobyembre 2008 dihay gipakanaog nga desisyon nga nagpasig-uli sa atong relihiyosong kagawasan sa Kyzylorda Region, sa Shymkent, ug sa enterong habagatang rehiyon sa Kazakhstan. Dugang pa, niadtong Disyembre 2008, human sa pito ka tuig nga pagdumili sa lokal nga gobyerno, ang korte sa siyudad sa Atyraū midesisyon nga ang mga Saksi ni Jehova may katungod nga marehistro sa maong siyudad.

Rusya

Sa miaging tuig sa pag-alagad, ang atong Administrative Center didto gibalikbalik pag-imbestigar sa piskal ug sa uban pang mga awtoridad sa Estado aron nga sa dili makataronganong paagi pahunongon ang atong relihiyosong kalihokan. Ang atong mga igsoon gihasi ug sila giimbestigar sa makadaghan bisag walay pasikaranan. Sa usa ka hitabo, ang usa ka mabdos nga sister nakuhaan tungod sa ilegal nga pagronda sa mga polis sa ilang panagkatigom. Gidakop ang usa ka 15-anyos nga lalaki nga presente usab sa maong tigom. Gigamit sa nag-imbestigar nga mga awtoridad ang Balaod bahin sa Pagsumpo sa Kalihokang Ekstremista ingong basehan sa pagbungkag sa ubay-ubayng kongregasyon ug pagdili sa atong mga literatura. Tungod sa maong way-pasikaranang mga pasangil nga kita mga ekstremista, ang ubang opisyal nag-abuso sa relihiyosong kagawasan, nga naglakip sa way-basehanang  pagpanakop, mga deportasyon, ug dili pagpasulod sa upat ka langyawng mga hawas sa mga Saksi ni Jehova nga nagtabang sa pagdepensa batok niining bakak nga mga akusasyon. Usa sa maong mga brader gipriso sa Moscow sulod sa 23 ka oras.

Ang mga membro sa Federal Security Service nanghilabot sa daghang kontrata bahin sa pag-abang ug mga pasilidad alang sa mga tigom ug kombensiyon, maoy hinungdan nga gikanselar ang mga kasabotan sa pag-abang. Gibabagan usab sa mga awtoridad ang pagtukod ug bag-ong mga Kingdom Hall. Lakip sa mga krimen nga gihimo batok sa mga Saksi mao ang pagpaantos sa mga polis kanila samtang sila gitener tungod sa tinumotumong mga akusasyon.

South Korea

Niadtong Mayo 7, 2008, ang gobyerno sa South Korea nag-anunsiyo nga ang mga dili magsundalo tungod  sa ilang konsensiya mahimong makapili ug alternatibong serbisyong sibilyan. Apan ila kining gibakwi pagka Hunyo 16, 2008. Kadto nag-ingon nga “ang isyu bahin sa pagtutol sa pagsundalo tungod sa konsensiya kinahanglan pang tun-an pag-ayo ug aprobahan sa kadaghanan.” Sa pagkakaron, wala pa hisgoti sa Korean National Assembly ang bisan unsang balaod bahin sa alternatibong serbisyo. Ang mga igsoon nagpaabot sa mga desisyon gikan sa Human Rights Committee of the United Nations, nga mihatag nag paborableng desisyon sa duha ka aplikasyon. Niadtong Enero 2009, ang Korean Presidential Commission on Suspicious Deaths in the Military miadmitir nga ang gobyerno sa Korea maoy responsable sa ngilngig nga kamatayon sa lima ka Saksi ni Jehova nga gipugos pagpasundalo gikan sa katuigang 1970 hangtod sa mga 1985. Kini ang unang dakong desisyon nga nag-ila sa tulubagon sa Estado sa mga kamatayon nga resulta sa kamapintason sa kasundalohan.

Tajikistan

Niadtong 2007, ang Religious Association of Jehovah’s Witnesses sa Tajikistan gibando, ug ang atong literatura gikan sa Alemanya gikompiskar sa mga opisyales sa aduwana. Ang mga igsoon miapelar ngadto sa korte sa kasundalohan, ug niadtong Septiyembre 2008, ang apelasyon wala aprobahi. Human niana, sila miapilar ngadto sa Military Collegium sa Korte Suprema, apan gibasura usab niini ang apelasyon. Gipaluyohan niini nga mga desisyon ang pagdili ug pagkompiskar sa atong literatura. Adunay gihimong mga paningkamot karon aron matabangan ang atong mga igsoon didto.

Turkey

Ang mga brader didto nakasinatig mga suliran bahin sa pagsundalo. Usa ka brader ang napriso sulod sa duha ka tuig tungod sa iyang lig-ong baroganan. Daghang brader nga naa na sa hustong edad nga magsundalo ang padayong gibaharan nga pamultahon ug prisohon ug tangtangon sa trabaho. Niadtong Marso 2009, ang mga igsoon  gipahibalo nga ang Human Rights Committee of the United Nations nagsugod na sa pag-imbestigar sa duha ka reklamo nga gipayl sa mga Saksi.

Dugang pa, niadtong Mayo 2009, ang European Court of Human Rights midesidir nga usahon ang tulo ka aplikasyon aron masugdan ang pag-imbestigar kon nalapas ba ang tawhanong mga katungod sa unom nato ka igsoon​—nga upat kanila napriso na. Ang mga alagad ni Jehova mapasalamaton sa interes nga gipakita niining duha ka hudisyal nga grupo ug naglaom nga mahusay na ang maong suliran.

Uzbekistan

Ang mga alagad ni Jehova sa Uzbekistan padayong nag-antos, ug nagkagrabe ang paglutos sa gobyerno kanila. Ang usa ka amahan nga may duha ka anak gipagawas sa prisohan niadtong Mayo 14, 2009, human sa iyang duha ka tuig nga sentensiya tungod sa pagtudlog relihiyon. Pagkaugma, siya gipalayas ngadto sa iyang nasod, ang Tajikistan. Tulo ka laing igsoon ang naa pa sa prisohan tungod kono sa pag-organisar ug “ilegal nga relihiyosong kalihokan.” Ang ilang mga abogado nangandam ug mga apelasyon ngadto sa Korte Suprema sa Uzbekistan. Ang lokal nga mga igsoon ug ang usa ka grupo sa langyawng mga igsoon sa makadaghan nakigtagbo sa Uzbekistan State Committee of Religious Affairs ug sa mga hawas niini aron mahusay ang maong mga butang.

ANG EUROPEAN COURT OF HUMAN RIGHTS

Ang mga Saksi ni Jehova sa Armenia, Austria, Azerbaijan, Cyprus, Georgia, Pransiya, Rusya, Serbia, ug Turkey sa katibuk-an may 22 ka aplikasyon nga anaa pa sa European Court of Human Rights (ECHR) sa Strasbourg, Pransiya. Ang mga aplikasyon naghisgot ug mga paglapas sa tawhanong mga katungod alang sa tanang lungsoranon sa mga nasod ilalom sa hurisdiksiyon sa European Convention on Human Rights. Siyam sa mga aplikasyon maoy kabahin sa katungod sa dili pagsundalo, ang pito  may kalabotan sa paglutos ug diskriminasyon tungod sa relihiyon, ang upat naglangkit sa pagkanselar sa rehistro o pagdili sa legal nga korporasyon nga gigamit sa mga Saksi ni Jehova sa pag-organisar sa buluhaton, ug ang duha maoy bahin sa pagbabag sa gobyerno sa katungod nga magtigom alang sa pagsimba.

Niadtong Hunyo 17, 2008, ang ECHR nagtagad sa aplikasyon nga gipasaka sa Association Les Témoins de Jéhovah (ATJ) batok sa gobyerno sa Pransiya. Ang aplikasyon maoy bahin sa mapihigong pagsingil ug 60 porsiyentong buhis alang sa tanang amot nga nadawat sa ATJ gikan sa 1993 hangtod sa 1996. Gipatungha sa Korte ang dugang nga mga pangutana bahin sa posibleng paglapas sa Artikulo 9 sa European Convention nga naghisgot bahin sa kagawasan sa relihiyon. Ang mga Saksi ni Jehova sa Pransiya ug sa ubang nasod nga sakop sa Council of Europe naghulat karon kon dawaton ba sa Korte ang maong kaso.

Bisag naningkamot si Satanas sa pagbalda sa matuod nga pagsimba pinaagi sa ‘pagmugnag kasamok pinaagig mando,’ ang mga alagad ni Jehova nagpabiling “malig-on sa pagtuo, kay nahibalo nga ang samang mga butang maylabot sa mga pag-antos nagakahitabo diha sa tibuok kapunongan sa [ilang] mga igsoon dinhi sa kalibotan.” Hinaot ang tanang matuod nga mga magsisimba padayong mobarog nga malig-on batok kang Satanas ug magtugyan sa tanan nilang kabalaka ngadto sa Diyos sa tanang dili-takos nga kalulot, kay nahibalo nga siya nahangawa kanila ug magpalig-on ug magpakusgan kanila.​—Sal. 94:20; 1 Ped. 5:7-11.

‘TAKOS SA PAGPANUDLO SA UBAN’

Sukad pa sa pagsugod sa Kristohanong kongregasyon, ang pagbansay maoy bahin na niini. Si apostol Pablo nag-ingon kang Timoteo: “Kining mga butanga ipiyal sa matinumanong mga tawo, nga, sa baylo, makabaton ug igong katakos sa pagpanudlo sa uban.” (2 Tim. 2:2) Karon usab, ang  organisasyon ni Jehova adunay daghang programa sa pagbansay. Sukad sa 2008, pananglitan, 6,528 ka ansiyano gikan sa mga teritoryo sa sanga sa United States​—apil ang Alaska, Bermuda, ug Turks and Caicos Islands​—nakatambong sa 70 ka klase sa Tunghaan Alang sa mga Ansiyano sa Kongregasyon sa Watchtower Educational Center sa Patterson, New York.

Ang tibuok semanang klase naghisgot sa lainlaing bahin sa kinabuhi sa mga ansiyano, nga nagtabang kanila sa pagpanguna sa pagsangyaw ug sa pagkahimong mas epektibong mga magtutudlo sa kongregasyon. (2 Tim. 4:5; 1 Ped. 5:​2, 3) Ang kurso nagdasig usab kanila nga mentinahon ang espirituwalidad nila ug sa ilang pamilya, ug nagbansay kanila sa ‘paggamit sa pulong sa kamatuoran sa hustong paagi’ sa pagtabang sa uban. (2 Tim. 2:15) Aniay pipila ka pagpahayag sa pasalamat gikan sa mga ansiyanong nakatambong sa tunghaan.

“Ang kamapaubsanon sa mga instruktor maoy sulondan kon unsaon pagtagad ang mga igsoon sa kongregasyon. Nagpasalamat gayod ko sa Nagamandong Lawas. Kini maoy usa sa labing talagsaong pribilehiyo sa edukasyon nga akong nadawat sukad sa akong pagka-Saksi.”

“Ang atong Diyos nga si Jehova nahibalo kon unsay atong gikinahanglan ug kon kanus-a kana itagana. Ang akong pagtuo ug pagsalig kang Jehova mas napalig-on. Kini nga kasinatian nakatabang kanako nga masabtan ang nahimo ni Jehova pinaagi sa makitang bahin sa iyang organisasyon ug makita usab kon giunsa niya pag-atiman ang tanan sa iyang katawhan.”

“Kini maoy talagsaon kaayong kasinatian. Daghan kog nakat-onan sa tunghaan, ug akong naamgohan nga daghan pa diay kog angayng mahibaloan. Nakita ko nga hinungdanon gayod ang personal nga pagtuon ug ang pagpadapat sa tanan kong natun-an.”

“Ang tunghaan mas nagsangkap kanako sa pag-atiman  sa akong pamilya ug sa kongregasyon, nga magbaton sa panghunahuna ni Kristo. (1 Cor. 2:16) Kini nakatabang kanako sa pagsusi sa akong kaugalingon.”

“Dili nako ibaylo kining usa ka semana kauban sa mga instruktor ni Jehova sa edukasyon sa unibersidad.”

“Kini nga kasinatian makapalipay ug mapuslanon gayod! Nalig-on ako nga magpadayon sa pag-alagad kang Jehova, mahimong masakripisyohon ug makapadasig sa atong mga igsoon. (Isa. 32:2) Salamat Jehova!”

“Pinaagi niini nga tunghaan among gibati ang gugma ni Jehova. Sama kamig giagak ni Jehova ingong among magbalantay.”

“Nagpasalamat ako kang Jehova nga iya akong gitudloan nga mahimong epektibo sa akong katungdanan alang sa iyang himaya ug kadayegan.”

Sa nahaigong panahon ipahibalo sa Nagamandong Lawas ang mga kahikayan aron ang mga ansiyano sa ubang mga dapit makabenepisyo niining tukma sa panahong instruksiyon.

PAGPAHINUNGOD SA MGA SANGANG BUHATAN NAKAHATAG UG KALIPAY

Niadtong Enero 24, 2009, si Samuel Herd nga membro sa Nagamandong Lawas mao ang bisitang mamumulong sa dihang gipahinungod ang bag-ong sangang buhatan sa Tanzania, sa Sidlakang Aprika. Kawhaag-lima ka tuig kanhi, ang sangang buhatan maoy usa lang ka bilding nga ginama sa tisa nga may tulo ka kuwarto nga gitawag sa mga Saksi sa Tanzania nga House Number 46, Magomeni Quarters. Daghan sa 779 ka malipayong mga bisita gikan sa 22 ka nasod ang nakahilak samtang gipalandong nila ang pag-uswag sa buluhaton sukad wagtanga ang pagdili sa buluhaton didto niadtong 1987. “Si Jehova lamang ang  makapahinabo niana niining nasora,” matod sa usa ka karaang Saksi. Sa pagkakaron ang buluhatong pagsangyaw nagmalamboon, ug kapig 14,000 ka magmamantala ang nagmaya, nagpasalamat, ug nag-awit ug mga pagdayeg kang Jehova.​—Sal. 92:​1, 4.

Sa Sabado, Mayo 2, 2009, sa sangang buhatan sa Netherlands, mga 600 ka delegado gikan sa 31 ka nasod ang mitambong sa pakigpulong sa pagpahinungod nga gihatag sa membro sa Nagamandong Lawas nga si Theodore Jaracz. May residensiya nga gisumpay sa bilding nga natukod niadtong 1983, ug ang mga lunang gigamit kanhi sa pag-imprentag mga magasin gihimong mga opisina ug video studio alang sa Regional Audio Video Center (RAVC). Ang RAVC nagtabang sa paggamag mga CD ug DVD diha sa 24 ka pinulongan, nga kadaghanan niana gigamit sa Uropa. Dugang pa, ang RAVC nagtabang sa paggamag video diha sa mga 20 ka lainlaing senyas nga pinulongan. Kini naglakip sa  pagdumala sa paggamag CD sa Uropa, Aprika, ug Oceania, ug DVD sa tibuok kalibotan. Ang sangang buhatan sa Netherlands mopalit ug magpadala usab ug mga butang nga gikinahanglan sa mga sangang buhatan sa ubang bahin sa kalibotan, ug ang giremodel nga mga pasilidad haom kaayo alang sa maong mga kalihokan.

‘MAGPABILIN KAMO SA GUGMA SA DIYOS’

Daghan gayod kitag hinungdan sa pagmaya. Pagkabulahan nato nga nagkinabuhi niining kulbahinam nga panahon! Tinuod, ingon sa gitagna, “ang kataposang mga adlaw” maoy “makuyaw nga mga panahong lisod sagubangon.” (2 Tim. 3:1) Apan kay duol na kaayo ang kaluwasan, hinungdanon gayod nga kita magmadeterminado sa pagsunod sa kusganong awhag ni Judas: “Kamo, mga hinigugma, pinaagi sa pagpalig-on sa inyong kaugalingon diha sa inyong labing balaan nga pagtuo, ug sa pag-ampo uban sa balaang espiritu, magpabilin kamo diha sa gugma sa Diyos, samtang nagapaabot kamo sa kaluoy sa atong Ginoong Jesu-Kristo nga nagapanglantaw sa kinabuhing walay kataposan.”​—Jud. 20, 21.

[Graph sa panid 13]

(Alang sa aktuwal nga pagkahan-ay, tan-awa ang publikasyon)

ADLAW-ADLAW NGA TIGBUKAS SA www.watchtower.org

70,000

50,000

30,000

10,000

1999 2001 2003 2005 2007 2009

[Mapa sa panid 21]

(Alang sa aktuwal nga pagkahan-ay, tan-awa ang publikasyon)

Mga Lugar nga May mga Kaso sa Korte di pa Dugay

AUSTRIA

EHIPTO

ERITREA

UGANDA

SOUTH AFRICA

MOLDOVA

ARMENIA

TURKEY

AZERBAIJAN

RUSYA

KAZAKHSTAN

UZBEKISTAN

TAJIKISTAN

INDIA

SOUTH KOREA

[Hulagway sa panid 11]

Bisan ang bata pang mga magmamantala nagatanyag ug mga pagtuon sa Bibliya

 [Mga hulagway sa panid 27]

Ang Tunghaan Alang sa mga Ansiyano sa Kongregasyon nakatabang kanila sa pagtuman sa ilang mga responsabilidad

[Mga hulagway sa panid 28]

Si Brader Jaracz naghatag sa pakigpulong sa pagpahinungod sa sangang buhatan sa Netherlands

[Mga hulagway sa panid 29]

Si Brader Herd naghatag sa pakigpulong sa pagpahinungod sa sangang buhatan sa Tanzania