Pagsangyaw ug Pagpanudlo sa Tibuok Yuta

APRIKA

KAYUTAAN 57

POPULASYON 878,000,158

MGA MAGMAMANTALA 1,171,674

MGA PAGTUON SA BIBLIYA 2,382,709

Benin

Si Claude ug ang iyang asawa nga si Marie-Claire maoy madasigong mga misyonaryo sulod sa 27 ka tuig. Niadtong Pebrero, si Marie-Claire nadakin-as ug nabali ang iyang tiil. Duha ka semana human niadto, samtang may gibuhat si Claude sa misyonaryong puy-anan, siya natumba ug nabali ang iyang tiil. Ang ilang tiil gisemento, si Marie-Claire sa iyang tuo ug si Claude sa iyang wala. Si Claude nagpasiaw, “Gusto man god namong magkapareho mi kanunay!”

Si Claude makalihoklihok ra bisag gisemento ang iyang tiil, apan si Marie-Claire natanggong sa balay sulod sa pipila ka semana. Bisan tuod iyang gihikay nga madumala ang 4 sa iyang 12 ka pagtuon sa Bibliya sa misyonaryong puy-anan, gimingaw siya sa ubang bahin sa ministeryo. Busa nakadesisyon siya nga magbutag lamesa nga punog publikasyon atubangan sa misyonaryong  puy-anan aron makasangyaw sa mga lumalabay. Pagka Marso, nakagugol siyag 83 ka oras bisag naglingkod lang tupad sa iyang lamesa. Gipanalanginan ba ni Jehova ang iyang paningkamot? Niadtong bulana siya nakapahimutang ug 14 ka libro, 452 ka brosyur, 290 ka magasin, ug kapig 500 ka tract.

Etiopia

Si Arega, nga nagpuyo sa hilit nga baryo, nakadesisyon nga haklapag papel ang bungbong sa iyang balay. Bisan tuod mantalaan ang kasagarang panghaklap sa mga tawo, gusto niyang mogamit ug dekolor nga papel. Nakakita siyag tawo sa merkado nga nagtanyag sa brosyur nga Tagamtama ang Kinabuhi sa Yuta sa Walay Kataposan! Si Arega mikuhag usa ka kopya ug iya kining gibungkag ug gihaklap sa bungbong bisag wala pa niya kana mabasa. Paglabay sa duha ka tuig, nabasa niya sa “gihaklap nga papel” ang mga pulong: “Si Jesus Anak sa Diyos.” Kadto lahi sa misteryosong Trinidad nga gitudlo kaniya. Kay nainteres, si Arega mibaktas ug siyam ka oras ngadto sa kinadul-ang lungsod aron pangitaon ang mga tawo nga nag-ingon nga ang Diyos adunay Anak. Apan wala niya sila makita mao nga mipauli siya nga nahigawad. Misulay na usab siya sa ulahi, ug niining higayona siya gitultolan sa mga tawo ngadto sa balay sa brader nga nakuhaan niya sa brosyur. Ang determinasyon ni Arega dugang nasulayan kay nagpaabot pa siyag daghang oras una nakauli ang brader. Ang ilang panaghisgot miresulta ug pagtuon sa Bibliya. Sa misunod nga mga bulan, si Arega nagbalikbalik sa lungsod aron makabatog kahibalo bahin sa Diyos. Sa dihang gisulti niya sa uban diha sa ilang baryo ang iyang nakat-onan, daghan ang misupak ug milikay kaniya. Apan wala siya mohunong, ug nainteres ang pipila. Sa nakaabot nag 13 ang mga interesado, duha ka espesyal payunir ang giasayn sa maong dapit. Sa wala madugay sila nakadumalag kapig 40 ka pagtuon sa Bibliya, ug halos ingon usab niana ang gidaghanon sa mga tigtambongan sa mga tigom. Adunay walo ka lokal nga magmamantala nga aktibo karon sa maong dapit. Alang sa atong bag-ong igsoon nga si Arega, ang mga hulagway diha sa iyang bungbong bililhon kaayo ug dili lang kay basta usa ka nindot nga dekorasyon.

 Ghana

Kay daghan na kaayo ang naggamit ug cellphone sa tibuok Aprika, gikaingon nga nagakahitabo ang “dakong kausaban sa komunikasyon.” Aron modaghan ang kustomer, daghang kompaniya ang nagtanyag ug libreng pagtawag sa tinong mga oras sa gabii. Gipahimuslan kini sa usa ka sister nga si Grace. Siya nalisdan sa pagtuon uban kang Monica, iyang estudyante sa Bibliya, kay kanunayng puliki si Monica sa ubang mga butang. Gipaningkamotan gayod ni Grace nga mapadayon ang pagtuon, ug iya pa ganing gihikay nga moadto sa balay ni Monica sa alas singko sa buntag. Apan nausab ang eskedyul ni Monica, ug dili na siya puwede nianang orasa. Unya nakahunahuna si Grace nga pahimuslan ang libreng pagtawag sa cellphone sa magabii. Misugot si Monica, ug nagsabot sila nga magtuon pinaagi sa cellphone sa alas kuwatro sa kaadlawon. Naguol sila kay daghan man diay kaayo ang mogamit ug cellphone nianang orasa mao nga halos dili sila magkakontakay. Busa nagsabot silang momata ug mas sayo aron himoon ang pagtuon sa alas tres sa kaadlawon, bisan pag kadto lisod alang nilang duha kay parehas silang mga inahan nga nanarbaho. Matod ni Grace: “Nag-ampo ko kang Jehova nga makabatog  kusog ug determinasyon nga mapadayon ang pagtuon aron dili mapalong ang interes sa akong estudyante. Gi-set nako ang alarm sa cellphone ug naningkamot sa pagbangon nianang orasa. Bisag kapoy kaayo, wala ako magpadaog niana.” Nalipay gayod siya sa iyang gihimong mga sakripisyo, ilabina nga iyang nakita nga si Monica nabawtismohan sa 2008 “Giniyahan sa Espiritu sa Diyos” nga Distritong Kombensiyon! Karon gigamit gihapon ni Grace ang libreng pagtawag sa magabii aron dumalahag pagtuon ang usa ka babaye nga tigtambongan na sa mga tigom.

Mozambique

Niadtong Agosto 2008, may dyaket nga nahulog gikan sa milabayng sakyanan nga nahitugpa duol sa payag nga ginamag yuta nga iya sa kabos, biyuda nga sister. Gipunit kini sa sister ug iyang nakita sa mga bulsa niini ang mga papeles, tulo ka gagmayng bag nga may mahalong alahas, ug kuwartang duolag usa ka libo ka dolyar. Siya nangitag paagi nga may tagabaryo nga motawag sa mga numerong nalista sa papeles aron itaho ang nahulog nga dyaket. Pagkagabii, upat ka lalaking nagkotse ang miabot sa baryo. Atubangan sa mga awtoridad sa baryo, giuli sa atong sister ang dyaket ngadto sa tag-iya uban sa tanang sulod niini. Ang tag-iya mihilak ug miingon nga kon dili pa Saksi ni Jehova ang nakapunit niini, basin dili na mahibalik kaniya ang iyang mga butang. Ang atong matinud-anong sister, bisag kabos, nakahatag ug pamatuod sa komunidad ug dakong kadayeganan sa ngalan sa iyang Diyos, si Jehova.

 MGA NASOD SA AMERIKA

KAYUTAAN 55

POPULASYON 910,761,124

MGA MAGMAMANTALA 3,575,123

MGA PAGTUON SA BIBLIYA 3,778,321

Barbados

Nakaplagan sa daghang ginikanan nga mapuslanon gayod ang pagpamemoryag mga teksto sa ilang mga anak. Ang usa ka pamilya sa Grenada nalipay sa pagkahibalo nga ang ilang sayis-anyos nga batang lalaki migamit ug teksto sa Bibliya sa pagpamatuod nga si Jehova mao ang kinalabwan sa tanan. Misulat ang amahan sa bata: “Usa ka hapon sa dihang gikuha sa akong asawa nga si Laura ang among anak nga si Stefan sa eskuylahan, gitawag siya sa maestra ni Stefan ug giingnan: ‘Abi nimo nakadayeg gyod ko sa inyong anak. Bisan tuod dili ta parehog tinuohan, nakadayeg ko niya kay maayo kaayo siyang mopatin-aw sa inyong tinuohan.’

“Pag-abot nila sa balay, gipangutana dayon sa akong asawa si Stefan kon unsay nahitabo sa eskuylahan nga ang maestra nakadayeg man kaniya. Dayon giasoy ni Stefan nga sa usa ka buntag diha sa klase, ang maestra miingon nga ‘si Jesus ang Diyos.’

“Miisag kamot si Stefan, ug sa dihang gitawag siya sa maestra, siya miingon: ‘Dili, Mam. Si Jesus dili mao ang Diyos. Ang Bibliya nag-ingon nga si Jesus Anak ni Jehova, busa dili mahimong siya si Jehova.’

“Ang maestra mitubag: ‘Mao ra na si Jesus ug si Jehova.’

“Dayon si Stefan miingon: ‘Apan ang Bibliya nag-ingon  nga si Jehova lamang ang Labing Hataas, dili si Jesus. Si Jehova lamang ang Labing Hataas.’ Siya nagkutlo sa Salmo 83:18, usa ka teksto nga among gipasabot ug gipamemorya kaniya. Bisag naninuod na ang maestra, wala gihapon siyay bawot sa sayis-anyos nga bata nga may tukmang kahibalo sa Kasulatan.”

Ecuador

Misakay ug bus ang pipila ka igsoon sa ilang pagpamauli gikan sa pagsangyaw sa banika nga ang katawhan nagsultig pinulongang Quichua. Kay may video player man ang bus, nananghid silang ipasalida ang Quichua nga video bahin kang Noe ug David alang sa tanang pasahero nga nagsultig Quichua. Nahingangha gayod sila nga nakakita ug video sa ilang pinulongan! Atentibo kaayo sila mao nga sa dihang mohunong ang bus aron magpasakay ug pasahero, ila kining padaliog lingkod aron wala silay masayloan. Pagkatapos sa salida, daghan ang  miorder sa video. Ang pipila ka pasahero may mga pangutana ug buot makabatog literatura; gihatag sa uban ang ilang ngalan ug adres aron may makaduaw kanila diha sa siyudad, ug ang tanan nakadawat ug imbitasyon alang sa Memoryal sa pinulongang Quichua. Lagmit usa kadto sa mga hinungdan nga daghan kaayo ang mitambong sa Memoryal sa maong dapit.

Mexico

Samtang namalaybalay, ang payunir nga si Gabino nanuktok sa usa ka pultahan. Walay mitubag. Siya nanuktok pag-usab hangtod sa ikatulong higayon. Pagkataudtaod, siya mituktok sa ikaupat nga higayon. Giablihan siya sa usa ka lalaki nga naghilak. Gipasulod dayon niya si Gabino apan wala siya magtingog tungod sa grabeng kaguol. Gipaambit ni Gabino kaniya sa makapahupay nga paagi ang maayong balita, ug ang lalaki mikalma. “Nakakita ka ba nianang silyaha?” nangutana ang lalaki. “Sa nanuktok ka sa ikatulong higayon, nagtungtong na ko niana. Nakakita ka ba nianang pisi nga nagbitay? Sa ikaupat nimong panuktok, nabaligtos na nako kana sa akong liog. Apan ako kanang gipuwas aron buksan ang pultahan. Salamat nga padayon kang nanuktok kay kon wala pa, nagbitay na ko karon.” Miingon siya nga naguol siya kaayo tungod sa mga problema maylabot sa iyang asawa. Gitanyagan siya ni Gabino ug pagtuon sa Bibliya. Ang maong payunir kasagarang manuktok sa pultahan kas-a o  makaduha lang. Apan ang iyang padayong pagpanuktok niadtong tungora, nga tingali gigiyahan sa manulonda, nakahatag ug dakong kaayohan.

Chile

Panahon sa kampanya sa pagpanagtag ug imbitasyon alang sa Memoryal sa kamatayon ni Kristo, usa ka gamayng bata ang miduol sa usa ka sister ug nangutana, “Pila diay imong edad?” Ang sister, nga natingala sa pangutana, mitubag, “Ikaw, pilay imong edad?” Miingon ang batang babaye nga siya sayis anyos ug nga gihatagan siyag sulat sa iyang inahan aron ipahatag ngadto sa usa sa mga Saksi ni Jehova. Gisugo siya sa iyang inahan nga mangitag Saksi nga dili bata apan dili sab tigulang. Busa giingnan sa sister ang bata nga siya 25 anyos. Gihatag sa bata kaniya ang sulat. Kini mabasa: “Sa inyong pagduaw sa akong balay, wala koy ganang moabli sa pultahan. Ako nag-antos ug grabeng depresyon ug nangayog tabang sa Diyos. Buot unta nakong mamati sa inyong mensahe ug mobasa sa Bibliya, apan nalisdan ko pag-ayo niana. Gusto nakong magtuon sa Bibliya uban sa usa ka tawo nga makatabang nako sa pagsagubang sa dili-malamposong kaminyoon. Kon makatabang ka kanako, palihog duawa ko karong hapon kay matulog sa ko niining buntaga. Salamat.”

Niadtong hapona ang sister miduaw sa maong babaye ug gidapit siya sa pagtambong sa Memoryal ug sa espesyal nga pakigpulong, nga nakahupay gayod kaniya.  Sukad niadto, siya tigtambongan na sa mga tigom ug nagmauswagon gayod sa iyang pagtuon sa Bibliya ginamit ang librong Unsay Tinuod nga Gitudlo sa Bibliya? Ug komosta man ang iyang sayis-anyos nga batang babaye? Kini ug ang 12-anyos nga igsoong babaye niini nagtuon na usab sa Bibliya.

Puerto Rico

Usa ka sister misulat: “Samtang nagtanyag ko ug mga magasin sa dalan, akong nakita ang usa ka babaye nga nagpahangin sa mga ligid sa iyang kotse. Ako siyang giduol, apan wala pa gani ko makasulti, nangayo na siyag Bantayanang Torre ug Pagmata! ug miingon nga gusto siyang mobasa niini. Ako siyang gitanyagan ug pagtuon sa Bibliya sa balay, apan siya mibalibad kay siya nagpuyo sa ikaduhang andana sa balay sa iyang inahan kinsa supak kaayo sa atong buluhaton. Dihang gipangayo nako ang iyang adres, ngalan ra sa kalye ang iyang gihatag. Usa ka adlaw, giadto nako ang maong kalye ug akong gipangita ang balay nga iyang gipuy-an apan wala nako kana makita. Dayon, usa ka adlaw niana, mibalik ako sa maong kalye ug nangutana sa mga silingan kon may nailhan ba silang Nancy, nga adunay duha ka anak. Nalipay ko nga sa kataposan nakuha ko ra gyod ang iyang adres. Apan, wala nako siya maabti sa balay, busa nagbilin kog mga magasin ug mubong sulat alang kaniya. Sa dihang nag-abot ra gyod mi, siya mihilak ug miingon nga gusto siyang moadto sa Kingdom Hall. Siya mitambong ug mahigugmaong giabiabi sa mga igsoon. Giingnan ko niya nga wala gayod siya mahibalo sa nangagi kong mga pagduaw kay gigisi man sa iyang inahan ang akong mga sulat ug mga magasin sa dili pa siya makapauli sa balay. Gisugdan namo ang pagtuon sa Bibliya sa balay sa iyang igsoong babaye, ug sa wala madugay si Nancy regular nang nagtambongan sa mga tigom. Nagpaenrol na siya sa Teokratikanhong Tunghaan sa Ministeryo, ug makapalipay nga siya ug ang iyang duha ka anak nagakomento na panahon sa mga tigom.”

 ASIA UG ANG TUNGANG SIDLAKAN

KAYUTAAN 47

POPULASYON 4,073,556,172

MGA MAGMAMANTALA 635,896

MGA PAGTUON SA BIBLIYA 579,554

South Korea

Usa ka lalaki nga nagpuyo duol sa Kingdom Hall ang nakakitag mubong sulat diha sa iyang kotse nga giparking atubangan sa iyang balay. Ang sulat nag-ingon: “Nagarasan nako ang imong kotse samtang nagparking ko. Teleponohi lang ko aron ako nang ipaayo.” Kay nakapaniid sa panggawi sa mga Saksi nga nagtambong sa Kingdom Hall duol sa ila, ang tawo miingon sa iyang kaugalingon, ‘Tingali Saksi ni Jehova ang maong matinud-anong tawo.’

Ang sister nga ginganlag Su-yeon maoy nagbilin sa sulat, ug sa dihang giteleponohan siya sa lalaki, siya nangayog pasaylo ug mitanyag pag-usab nga ipaayo ang kotse. Natingala ang sister sa dihang ang lalaki nangutana, “Saksi ni Jehova ka ba?” Ang lalaki miingon nga siya na lay magpaayo sa kotse ug nga dili lang mabalaka bahin niana! Siya miingon pa nga gusto siyang makigkita kaniya kay may gusto siyang ipangutana bahin sa mga Saksi. Si Su-yeon, uban sa iyang amahan ug laing brader, nakigkita sa maong lalaki. “Nakapaniid ako sa mga Saksi,” miingon ang lalaki, “kay nagpuyo ko duol sa Kingdom Hall. Maayo kamo nga mga tawo. Wala lang ko makasabot kon nganong daghan ang nagdumot kaninyo.” Gitubag sa amahan ni Su-yeon ang iyang mga pangutana ginamit ang Bibliya ug ang librong Unsay Tinuod nga Gitudlo sa Bibliya? Siya karon regular na nga nagtuon sa Bibliya uban sa amahan ni Su-yeon ug nagmauswagon sa espirituwal.

 Kanasoran diin ang buluhaton gipig-otan o gidili

Natandog gayod ang usa ka koronel sa armi sa maayong epekto sa kamatuoran diha sa iyang asawa nga usa ka Saksi ni Jehova. Tungod niana, siya misugot nga magtuon sa Bibliya. Sa nahibaloan kadto sa iyang komander, nga usa ka heneral, siya gipatawag. Giingnan siya sa heneral nga kon dili siya mohunong sa pagpakigkita sa mga Saksi ni Jehova, iasayn siya sa kinahilitang bahin sa nasod. Ang koronel maisogong mitubag nga ang iyang asawa dugay nang nagtuon sa Bibliya ug siya walay nakitang kapeligrohan niana. Busa dili siya mohunong sa pagtuon sa Bibliya. Wala madugay, ang koronel nakahukom nga moundang sa pagka-armi. Pagkakaron, siya bawtismado nang Saksi, nga nag-alagad ingong regular payunir ug ministeryal. Makapaikag nga ang asawa sa heneral nagtuon usab sa Bibliya. Ang heneral wala usab makapugong sa iyang asawa, kinsa usa na sab ka regular payunir karon.

Sa laing nasod, nasugdan sa usa ka sister ang pagtuon sa Bibliya uban sa babaye nga grabeng gisupak sa iyang bana. Sanglit ang pagtuon dili man puwedeng himoon sa balay sa babaye, ilang gihikay nga magtuon sa usa ka gamayng parke. Samtang sila nagtuon, dihay tigulang nga lalaki nga nagsuroy sa parke ang naglibotlibot kanila, nga naniid sa ilang gibuhat ug namati sa ilang panaghisgot. Usa ka adlaw niana, kini miduol kanila ug misuknag pipila ka pangutana bahin sa Bibliya. Kana gihapon ang gibuhat sa tigulang sa sunod nilang pagtuon. Ang babaye nga gitun-an sa Bibliya napikal ug miingon, “Usa ka oras ra ning akong pagtuon sa Bibliya, apan imo kining gihurot tungod sa imong pagsigeg pangutana.” Human niadto, gihikay sa sister nga may brader nga magtuon sa maong tigulang, kinsa daling miuswag sa espirituwal ug nagtambongan na sa mga tigom. Kada Dominggo, makita siya sa iyang duha ka silingang babaye nga mogawas sa balay, nga maayog besti ug nagdalag bag. Gusto silang mahibalo kon asa siya tig-adtoan ug ilang  nasayran nga siya misugod sa pag-anib sa usa ka “bag-ong relihiyon.” Ang duha ka babaye midesisyon nga magsusi mao nga ilang gisundan ang tigulang nga lalaki sa Kingdom Hall. Dihay mga sister nga nakigsulti kanila ug nangutana kon gusto ba nilang magtuon sa Bibliya. Ang usa kanila midawat niana. Kining tulo ka indibiduwal—ang babaye nga nagtuon sa parke, ang lalaki nga nasangyawan diha sa parke, ug ang usa sa duha ka babaye nga misunod kaniya—nagmauswagon pag-ayo sa espirituwal ug nabawtismohan di pa dugay.

Cambodia

Si Louy, nga usa ka payunir sa Cambodia, kanunayng magbisikleta paingon sa baryo nga ang mga balay kawayan ug tag-as ug haligi. Nagdumala siya didtog mga pagtuon sa Bibliya. Tulo ka adlaw una pa ang Memoryal, sa dihang didto siya sa baryo nga nagsaysay sa katuyoan sa Memoryal ngadto sa usa niya ka estudyante sa Bibliya, daghang bata ang nag-alirong kaniya ug nagsuknag mga pangutana. Si Louy nanghatag ug 57 ka imbitasyon sa Memoryal. Pagkaugma miadto na usab siya sa baryo aron sa pagdumalag laing pagtuon, ug ang estudyante miingon nga gustong motambong ang iyang mga paryente ug mga higala. Busa gibinlan ni Louy ang iyang estudyante ug 20 pa ka imbitasyon aron ipanagtag. Apan siya nabalaka kon unsaon niya sila pagtabang sa pagtambong sa Memoryal. Human makaampo, nakigsulti siya sa amahan sa usa sa iyang mga estudyante sa Bibliya, nga maoy koordinetor sa baryo. Gipasaligan niya si Louy nga kon makakuha siya ug bisag usa ra ka tuk-tuk (nga susamag traysikol), ang tanan makatambong tungod kay sila manindog o magsabakay. Nalipay kaayo si Louy nga 18 ka tawo sa maong baryo ang nakatambong.

India

Gipahimuslan sa usa ka brader nga drayber ug auto-rickshaw (morag traysikad) ang kahigayonan sa pagsangyaw ngadto sa usa ka pasahero nga usa diay ka magsusulat.  Ang babayeng magsusulat nakadayeg sa iyang kaisog, sanglit ang ubang mga Saksi sa maong lugar giatake man sa mga magsusupak samtang nagsangyaw sa maayong balita. Gipatik sa magsusulat ang ilang estorya diha sa usa ka nasodnong mantalaan. Siya misulat: “Ako siyang gisulayan pinaagi sa pag-ingong: ‘Wala ka ba makadungog sa balita karon nga gidagmalan ang inyong mga kauban ug giatake ang inyong mga simbahan sa lainlaing bahin sa nasod?’ Siya mitubag, ‘Oo, nabasahan ko kana sa mantalaan karon.’ ‘Busa unsay inyong buhaton kon ang [mga magsusupak] magpadayon sa pagsamok kaninyo?’ Siya milingolingo, nga miingon: ‘Wa nay kaso. Magpabilin gihapon mi sa among pagtuo [sa kamatuoran].’”

 Bahin sa tract nga gihatag sa Saksi kaniya, siya misulat: “Pag-abot nako sa balay, akong gikuha ang gamayng basahon. Kini adunay nindot apan daw dili katuohan nga mga talan-awon—lunhawng kabalilihan, lanaw, namulak nga kakahoyan, mga tawong nag-anig mga lugas ug namupog prutas, ug mga bukid nga ang tuktok naputos ug yelo.’ ‘Kinabuhi sa malinawong bag-ong kalibotan,’ maoy giingon niini. Kini naghisgot bahin sa Diyos. Kasagaran, walay mosupak kon hatagag usa ka pulyeto nga nag-anunsiyo sa tindahag sinina o kaha estilo sa kinabuhi. Apan kon maghisgot ka bahin sa malinawong bag-ong kalibotan, ang mga tawo masuko kanimo.”

Pilipinas

Sa usa ka bahin sa Zamboanga, adunay habog kaayong bukid nga ang tumoy niana makita gikan sa gilay-ong 200 kilometros. Ang mga Saksing nagpuyo duol sa bukid kasagarang magkomedyahay samtang magsangyaw sa kanataran nga moingon, “Unsa kahay atong himoon kon adunay interesadong nagpuyo sa tumoy nianang bukira?” Usa ka adlaw samtang sila nagsangyaw sa tiilan sa bukid, dihay tawo nga miduol kanila ug miingon nga siya nangitag mga Saksi ni Jehova ug gustong magtuon sa Bibliya uban kanila. Nangutana ang mga igsoon kon diin siya nagpuyo. Sa gitudlo niya ang tumoy sa bukid, ang mga igsoon nakuratan ug wala makatingog. Ang tawo miingon nga ang iyang balay wala didto sa tuktok, kondili atua pa sa luyo, ug aron makaabot didto kinahanglan silang moagi sa tumoy sa bukid. Sa naulian na sila sa kakurat, ang mga igsoon miuyon nga moadto didto. Nasugdan ang pagtuon sa Bibliya uban kaniya, ug siya tigtambongan na karon sa senemanang mga tigom sa Kingdom Hall, bisan pag kini layo kaayo gikan sa iyang balay. Kining tawhana nahilakip na karon sa katawhan gikan sa tanang kanasoran nga nagaganayan ngadto sa “bukid sa balay ni Jehova.”—Isa. 2:2.

 UROPA

KAYUTAAN 47

POPULASYON 736,988,468

MGA MAGMAMANTALA 1,563,910

MGA PAGTUON SA BIBLIYA 819,067

Pinlandia

Duha ka igsoon ang namalaybalay nga nagtanyag ug pagtuon sa Bibliya ginamit ang tract nga Gusto Ka Bang Mahibalo sa Kamatuoran? May lalaking mibukas sa pultahan ug mipasulod kanila sa balay bisag wala pa sila makasulti sa ilang tuyo. “Daghan kog pangutana,” matod niya. “Nganong karon man gyod mo nanganhi?”

“Dinhi ang teritoryo sa among kongregasyon karon,” mitubag ang mga igsoon.

Ang lalaki miingon: “Nag-ampo ko nga duawon sa mga Saksi ni Jehova. Tig-jogging ko niining mga orasa, apan wala ko mag-jogging karon. Ug tayming gyod ang inyong pag-anhi!” Nagtuo ang lalaki nga gitubag ang iyang mga pag-ampo. Sa iyang trabahoan, ang mga Saksi ni Jehova ginadaot sa mga tawo. Kay gustong mahibalo kon tinuod ba ang maong pagpangdaot, miadto siyag librarya aron mangitag impormasyon. Iyang nakita ang librong Mga Saksi ni Jehova—Mga Magmamantala sa Gingharian sa Diyos, gibasa kana, ug iyang nasayrang dili tinuod ang mga akusasyon batok kanato. Busa gusto kaayo siyang makahibalag ug mga Saksi ni Jehova. Nasugdan ang pagtuon sa Bibliya, ug misugod dayon siyag tambong sa atong mga tigom. Gisangyawan niya ang iyang kanhing asawa ug anak nilang babaye, ug misugod usab sila sa pagtuon.

 Britanya

Si Kirsty, nga usa ka regular payunir, nagtuon ug pinulongang Pranses ug Lingala aron makasangyaw sa mga taga-Congo nga nagpuyo sa ilang teritoryo. Usa niana ka adlaw, nakakita siyag babaye nga taga-Congo nga naglisod pagsakay sa bus tungod kay daghan siyag dala. Ginamit ang pinulongang Lingala, si Kirsty mitanyag sa pagtabang sa babaye ug iyang gibitbit ang mga plastic bag nga dala niini pasakay sa bus. “Nganong makamao man kag Lingala nga puti man ka?” nangutana ang babaye. Si Kirsty miingon nga siya nagtambongan sa kongregasyon nga nagsultig Lingala ug gitudloan siya sa mga Saksi didto sa maong pinulongan aron makasangyaw sa mga tawo bahin sa Bibliya. Gustong tanyagan ni Kirsty ug pagtuon sa Bibliya ang babaye, mao nga nagpabilin siya  sa bus hangtod nakaabot ang babaye sa iyang destinasyon. Unya gibitbit ni Kirsty ang mga plastic bag sa babaye hangtod sa iyang apartment sa ikatulong andana. Giabiabi si Kirsty sa bana sa maong babaye ug sa ilang upat ka anak, ug iyang gipakita sa pamilya kon unsaon pagtuon ang Bibliya ginamit ang librong Unsay Tinuod nga Gitudlo sa Bibliya? Ang babaye ug ang iyang duha ka magulang nga anak nagtuon na karon sa Bibliya. Silang tulo naningkamot sa pagpahimuot kang Jehova.

Georgia

Duha ka batan-ong brader nga mga payunir ang midesisyon sa pagbalhin ngadto sa usa ka bukirong dapit sa nasod nga diyutay rag Saksi. Sila misangyaw sa mga baryo, ug daghan kaayo ang interesado. Nakapanagtag silag ginatos ka literatura ug nakasugod ug daghang pagtuon sa Bibliya. Sa dihang sila misangyaw sa kabukiran, diyutay ra ang ilang balon ug wala sila masayod kon asa matulog. Apan kanunayng natagan-an ang ilang mga panginahanglan kay ginapakaon ug ginapatulog sila sa mga taga-baryo. Usahay, bisan ang mga dili interesado nagdapit kanila nga matulog ug mokaon diha sa ilang balay. Sa ulahi, kining duha ka brader nahimong mga espesyal payunir sa maong teritoryo. Kay daghan na man kaayo ang ilang gidumalahag pagtuon sa Bibliya, ila kining gilimitahan aron ila silang maatiman. Daghan ang moduol kanila sa dalan ug mohangyog pagtuon sa Bibliya, ug bisan pag sila naglimite sa gidaghanon sa ilang matun-an, ang matag usa kanila miaberids gihapon ug kapig 20 ka pagtuon sa Bibliya kada bulan.

Hungaria

Ang usa ka sister regular nga ginahatdan ug binotelyang gatas sulod sa plastic bag nga gibitay sa iyang koral. Usa ka adlaw, sa dihang iyang giuli ang basiyo niini, gisulod niya sa plastic bag ang tract nga Gusto Ka Bang Mahibalo sa Kamatuoran? Natingala siya kay sa sunod nga paghatod sa preskong gatas, ang babayeng tighatod niana nagbutang ug gamayng papel nga may pipila ka  pangutana bahin sa tract ug naghangyog Bibliya. Giduaw dayon sa sister ang maong babaye diha sa gatasanan nga iyang gipuy-an ug gisugdan ang pagtuon sa Bibliya ginamit ang librong Unsay Tinuod nga Gitudlo sa Bibliya? Sa nangagi, ang babaye nangitag tubag sa iyang mga pangutana sa lainlaing simbahan, apan wala matagbaw ang iyang espirituwal nga kagutom. Hinunoa misamot pa ang iyang kalibog. Sa dihang ang usa sa iyang mga anak nga babaye nagpakita usab ug dakong interes, gihatagan siya sa sister ug librong Pagkakat-on Gikan sa Dakong Magtutudlo. Ang inahan miingon nga ang maong bata sagad makamata sa gabii tungod sa urom. Apan, human makabasag pipila ka kapitulo sa libro, ang bata dili na kaayo mahadlok ug karon maayo na ang iyang pagkatulog. Nagpadayon ang pagtuon sa Bibliya, ug ang inahan tigtambongan sa mga tigom ma-Dominggo kauban sa iyang duha ka anak nga babaye.

Italya

Si Cristina ug Manel, nga mga payunir, nanagtag sa tract nga Gusto Ka Bang Mahibalo sa Kamatuoran? sa usa  ka baryo sa sentrong bahin sa Italya. Sa usa ka uma nakadungog silag kabanha gikan sa nataran sa likod. Sa pagkakita sa tagbalay sa mga Saksi, siya misinggit: “Dali! Tabangi ko ninyo!” Sa dihang miduol ang mga Saksi aron makatabang, ilang nakita nga iyang gipugngan ang dako ug suko nga baboy aron dili makagawas sa tangkal. Ang pultahan naguba, ug siya nabalaka nga ang baboy modagan paingon sa duol nga kakahoyan. Siya nag-inusara ra ug munas ginhawang naningkamot nga dili gayod mabuksan ang pultahan. “Pugngi ninyo ni aron dili mabuksan kay mangita kog ibabag niini!” misinggit ang babaye kang Cristina. Dihadihang mitubag si Cristina nga mahadlok siyag baboy. Unya ang babaye mitunol kang Manel ug kalabasa ug kutsilyo ug miingon kaniya: “Ayawg kabalaka. Itsahi lang kanunay ug hiwa sa kalabasa ang baboy aron magkalingaw kinig kaon samtang mangita kog bag-ong trangka.”

Unya ang babaye mibiya, ug milabay ang pipila ka minuto. Giapura ni Cristina si Manel sa pag-itsa ug pagkaon sa baboy, apan nalisdan si Manel paghiwa sa gahing panit sa kalabasa. Sa kataposan ang babaye mibalik ug iyang giayo ang pultahan. Human makaginhawag lalom, siya mipatugbaw: “Gipadala gyod mo sa Labing Makagagahom!”

“Tinuod kana, Madam!” mitubag sila samtang gikuha ang tract ug gipakita kaniya.

Ang babaye dihadihang miingon: “Hinungdanon kaayo kini, mao nga manglingkod ta aron magkaestoryahay tag maayo.” Busa mikuha siyag mga silya, ug samtang nanglingkod sila diha sa nataran, daghag pangutana ang babaye ug siya namati pag-ayo ug nagmapasalamaton. Sa ulahi, nasugdan ang pagtuon sa Bibliya. Miingon si Cristina ug Manel nga nakabaton sila niining maong kasinatian tungod sa usa ka baboy nga gustong mogawas sa tangkal sa eksaktong panahon nga sila miabot.

 OCEANIA

KAYUTAAN 30

POPULASYON 38,338,482

MGA MAGMAMANTALA 99,816

MGA PAGTUON SA BIBLIYA 59,619

Australia

Si Fred, usa ka Saksi sa mingaw nga lungsod duol sa baybayon, nagbilig tulo nato ka DVD sa usa ka lalaki. Sa ulahi, nakadawat si Fred ug sulat gikan sa maong lalaki, nga nag-ingon: “Nahupayan gayod ako sa pagtan-aw sa mga DVD. Gibati ko ang kalinaw, kalipay, ug pahiyom sa mga tawo nga akong gitan-aw. Karon ko lang kini batia pag-usab human sa daghang katuigan. Karon nagtuo na ko nga adunay mas maayong kinabuhi sa unahan. Sa nangagi, kasagarang dili maayo ang akong pagtagad sa mga Saksing moduaw kanako. Palihog pasayloa ko ninyo. Kamo mahigalaon kaayo sa inyong pagduaw kanako ug nagtinguha lamang nga isangyaw ang maayong balita. Kinsay nasayod, basin sa usa ka adlaw ikaw molingi ug imo kong makita nga naglingkod sa imong luyo sa Kingdom Hall.”

New Zealand

Duha ka sister ang miduaw sa usa ka family-trust nga organisasyon nga gidumala sa gobyerno ug mihangyo nga makigkita sa babayeng direktor. Sila nangandam ug mga basahon nga may mga ulohang makapainteres sa direktor sa iyang trabaho maylabot sa mga pamilya. Kini naglakip sa mga librong Ang Sekreto sa Kalipay sa Pamilya ug Mga Pangutanang Gisukna sa mga Batan-on—Mga Tubag nga Mosaler, uban sa Agosto 2007 nga isyu sa Pagmata! nga may ulohang “Pito ka Paagi Aron Mahimong Mas Maayong Ginikanan” ug sa Oktubre 2007 nga isyu nga may ulohang “Panalipdi ang Imong mga Anak!”

 Sa ilang pagduaw, gisaysay sa mga sister nga boluntaryo ang atong buluhaton ug interesado kaayo kita sa pagtabang sa mga pamilya, ilabina sa espirituwal nga paagi. Ilang gipakita ang mga basahon. Ang direktor namati, midawat sa literatura, ug miingon nga gusto niyang ipaambit ang impormasyon ngadto sa tanang 35 ka empleyado. Siya miingon usab nga ang mga artikulo sa Pagmata! makatabang sa tanang 503 ka pamilya nga naa sa iyang rekord. Ang duha ka sister nakakolektag 557 ka kopya sa magasing Pagmata! Paglabay sa duha ka semana, giteleponohan sila sa pagpahibalo nga ang tanang magasin nahatag na sa mga pamilya.

Fiji

Ang usa ka batan-ong lalaki nga ginganlag Viliame maayo kaayong modula ug rugby ug nangandoy sa pagdula alang sa iyang nasod. Ang iyang manghod nga si Leone nangandoy usab nga mahimong magdudula ug rugby, apan human niya dawata ang pagtuon sa Bibliya uban sa usa ka espesyal payunir, iyang naamgohan nga dili siya mahimong moalagad sa duha ka agalon. Misugod siya sa pagtambong sa mga tigom ug miundang sa pagdulag rugby. Gipalitan siya sa iyang inahan, nga usa ka Saksi, ug sinina nga pangtigom, apan sa dihang sila  nagkalalis ni Viliame, gikuha ug gigisi niini ang mga iyang sinina. Naguol si Leone apan wala siya mobalos. Sa ulahi, gibaligya ni Leone sa tiyanggihan ang iyang abot nga sandiya, ug gikan sa halin niini siya mipalit ug mga sininang pangtigom ingon man usa ka Bibliya, mga bolpen, ug mga haylayter nga magamit alang sa mga tigom. Gipalitan usab niya si Viliame nianang mga butanga. Kay nahinumdom sa iyang gibuhat nga dili maayo, si Viliame natandog gayod sa pagkabuotan sa iyang manghod. Iyang gisul-ob ang bag-ong sinina ug gisorpresa ang iyang manghod pinaagi sa pagtambong sa tigom. Midawat usab si Viliame ug usa ka pagtuon sa Bibliya, ug ang duha ka magsoon miuswag sa espirituwal. Sa dihang hapit na silang mabawtismohan, nakadawat si Viliame ug tanyag sa pagdulag rugby sa Uropa uban ang dakong suweldo. Ang maong tanyag gipangandoy gayod sa daghang batan-ong lalaki, kay nagpasabot man kana sa seguradong kinitaan ug kadungganan. Apan niadtong tungora ang iyang mga tumong sa kinabuhi nausab na, ug iyang gipili nga ipahinungod ang iyang kinabuhi kang Jehova. Si Viliame ug Leone nag-oksilyare payunir sulod sa unang unom ka bulan human sa ilang bawtismo. Kay nakita sa ilang amahang si Waisea ang ilang maayong panig-ingnan, siya midawat usab ug pagtuon sa Bibliya. Si Waisea mihimog dagkong kausaban ug nabawtismohan dungan sa duha niya ka anak nga babaye sa usa ka espesyal nga asembliya.

[Mga hulagway sa panid 45]

Ang pagdisiplina sa kaugalingon ug ang modernong teknolohiya nakatabang sa usa ka sister sa pagdumalag pagtuon sa Bibliya

[Hulagway sa panid 46]

Ang iyang pagkamatinud-anon nakahatag ug dakong pamatuod

[Hulagway sa panid 48]

Ang pamilyahanong pagsimba nakatabang kang Stefan aron makasangyaw sa eskuylahan

[Hulagway sa panid 49]

Ang iyang padayong pagpanuktok nakaluwas ug kinabuhi

[Hulagway sa panid 50]

Siya nakakitag Saksi nga dili bata o tigulang

[Hulagway sa panid 55]

Usa ra ka “tuk-tuk” ang iyang gikuha

[Hulagway sa panid 58]

Ang pagkakat-on ug langyawng pinulongan miresulta sa usa ka pagtuon sa Bibliya

[Hulagway sa panid 60]

Adunay daghang matang sa di-pormal nga pagsangyaw

[Hulagway sa panid 63]

Pag-andam sa mga basahon

[Hulagway sa panid 64]

Ilang gisakripisyo ang dakog-kita nga karera sa pagkamagdudulag rugby aron moalagad kang Jehova