Sa Hunyo 19, 1949, usa ka grupo sa gidestiyerong mga taga-Dominican Republic ang mibalik aron palagpoton ang diktador nga si Rafael Trujillo. Pero wala sila molampos.  Ang pipila kanila gipatay ug ang uban gipriso. Gawas niana, gipapriso sab ni Trujillo kadtong midumili sa pagsundalo ug kadtong giisip nga mga kaaway sa gobyerno. Pipila sa unang mga Saksi nga napriso kay midumili sa pagsundalo mao sila León, Enrique, ug Rafael Glass, apil ang kaubang mga empleyado ni León nga mga Saksi sab.

“[Ako ug ang akong kaubang mga empleyado] gidakop ug gisukitsukit sa secret service sa militar,” matod ni León. “Human hulgaa, gibuhian mi. Pero pila lang ka adlaw, gipatawag na sab mi aron pugson  nga magsundalo. Mibalibad mi maong ila ming gipriso. Sa prisohan, among naabtan ang upat pa ka Saksi, duha nila maoy akong igsoon. Human mi buhii, gipriso na pod mig balik. Tulo ka beses ning nahitabo, nga milat-ang lag usa ka adlaw o kapin pa. Sa ikatulong higayon, gipriso mig lima ka tuig. Kon sumahon, mga pito ka tuig ming napriso.”

Lisod kaayo ang kinabuhi sa mga igsoon diha sa prisohan. Adlaw ug gabii silang yagayagaan sa ubang piniriso ug mga guwardiya. Ang komander sa Fort Ozama, diin sila napriso, miingon: “Kamong mga Saksi ni Jehova, ingna ra unya kog nahimo na mong saksi sa Yawa, aron buhian ta mo.” Pero ang mga magsusupak wala gyod makabungkag sa integridad sa mga igsoon. Si León mipatin-aw: ‘Si Jehova kanunayng naghatag namog kusog aron makalahutay ug amo gyong nakita bisan sa gagmayng paagi nga Siya nag-uban namo. Bisag gipanglatigo mi, gipamunalan, ug gipamusposag armas, amo nang naantos kay si Jehova naghatag namog kusog aron makalahutay.’

Gipangusgan sa mga kaaway ang pagpanglutos sa mga Saksi sa daghang bahin sa nasod. Bisan pa niana, sa Mayo 1950, diha nay 238 ka magmamantala sa Dominican Republic, gawas sa mga misyonaryo. Ang 21 niini maoy mga payunir.

Nianang panahona, usa ka secret service agent ang misulat sa Presidential Secretary: “Gipadayon gihapon sa  mga membro sa relihiyosong sekta nga Saksi ni Jehova ang ilang buluhaton sa tibuok siyudad [Ciudad Trujillo].” Siya midugang: “Sa ako nang giingon, kinahanglang bantayan ang mga Saksi ni Jehova kay ang ilang pagsangyaw ug uban pang kalihokan nagdaot sa hunahuna sa mga tawo.”

Ang Secretary of the Interior and Police nga si J. Antonio Hungría nagsugo kang Brader Brandt sa pagsumiter ug sulat nga magsaysay sa baroganan sa mga Saksi bahin sa pagsundalo, pagsaludar sa bandera, ug pagbayad ug buhis. Gigamit ni Brader Brandt ang impormasyon sa librong “Pasagdi Ang Diyos Maminatud-on” sa iyang sulat. Apan sa Hunyo 21, 1950, nagpagawas gihapog mando si Secretary Hungría nga nagdili sa buluhaton sa mga Saksi ni Jehova sa Dominican Republic. Gipatawag si Brader Brandt sa opisina ni Hungría aron personal niyang madungog ang mando. Nangutana si Brader Brandt kon  kinahanglan bang mohawa sa nasod ang mga misyonaryo. Gipasaligan siya ni Hungría nga puwede ra silang magpabilin basta mosunod sila sa balaod ug dili na makig-estorya sa uban bahin sa ilang relihiyon. *