Mga 70 ka tuig na ang mga Saksi ni Jehova sa Dominican Republic. Sulod niining panahona, sila nakabaton ug maayong reputasyon. Ang mga tawo sagad moduol sa mga nagsangyaw aron mangayog literatura, ug komon sab nga madunggan ang mga komento sama sa: “Ganahan ko niining relihiyona” o “Nagsunod gyod mo sa Bibliya.”

Tagda pananglitan ang nahitabo sa gitukod nga Kingdom Hall sa lote nga gidonar sa igsoon. Dihang giparehistro sa igsoon ang lote, iyang nadiskobrehan nga kini narehistro na sa laing tawo, ug kining tawhana nag-akusar sa igsoon nga nangilog ug yuta. Busa gisang-at sa igsoon ang kaso ngadto sa korte. Lisod ang maong kaso kay ang tawo duna poy mga dokumento nga nagpamatuod nga siyay tag-iya sa yuta.

Sa usa ka higayon, gipangutana sa huwes ang abogado sa igsoon kon kinsay iyang gihawasan. Dihang gipatin-aw sa abogado nga iyang gihawasan ang usa ka grupo sa mga Saksi ni Jehova, ang huwes miingon: “Kon mao, dili na kinahanglang kuwestiyonon pa kon kinsay husto. Nakaila ko sa mga Saksi ni Jehova, ug nahibalo kong matinud-anon sila. Dili gyod sila mangilad aron ilogon ang butang nga dili ilaha.”

Dihang gipresentar ang ebidensiya sa korte, napamatud-an nga peke ang mga dokumento niadtong tawhana, busa ang huwes midesisyon pabor sa mga Saksi ni Jehova. “Kadaghan na ning nahitabo,” matod sa Saksi nga abogado. “Kon mahisgotan gani ang mga Saksi ni Jehova diha sa mga korte sa tibuok nasod, makita gyod nimo ang dakong pagtahod sa mga tawo kanila.”

Panahon ray mag-igo kon unsa pa ka daghang matarong nga mga tawo ang makakat-on sa kamatuoran ug mahimong mga magsisimba sa matuod nga Diyos. Sa kasamtangan, ang mga Saksi naningkamot nga masangyawan ang maong mga tawo. Pananglitan, sa 2013 ang mga Saksi ni Jehova sa Dominican Republic migugol ug kapin sa 11 ka milyong oras sa pagsangyaw, ug sila nakadumalag 71,922 ka Bible study. Makapadasig sab nga makita nga 9,776 ang nakigbahin sa pipila ka matang sa payunir nga pag-alagad. Sa Agosto nianang tuiga, 35,331 ka magmamantala ang madasigong nakigbahin sa ministeryo. Dugang pa, dako ang posibilidad sa pag-uswag kay 127,716 ang mitambong sa Memoryal.

Dako na kaayo ang pag-uswag sa pagsangyaw ug paghimog tinun-an sa Dominican Republic sukad niadtong Dominggo sa Abril 1945, dihang miabot sila Lennart ug Virginia Johnson ug misugod pagsangyaw sa maayong balita sa Gingharian. Gipabilhan sa mga Saksi ni Jehova ang ilang espirituwal nga panulondon. Sila mapasalamaton sa sakripisyo sa nag-unang mga henerasyon sa matuod nga mga magsisimba. Apan labaw sa tanan, ilang gipabilhan ang ilang pribilehiyo karon sa “paghatag ug bug-os nga pagpamatuod mahitungod sa gingharian sa Diyos.” (Buh. 28:23) Sila naghinamhinam sa adlaw dihang ang tanang tawo niining islaha uban sa ilang mga igsoon sa tibuok kalibotan moduyog sa pag-awit: “Si Jehova nahimong hari! Maglipay unta ang yuta. Magmaya unta ang daghang kapuloan.”—Salmo 97:1.