May nagsulti na ba nimo ug sekreto?— * Ang Bibliya naghisgot ug usa ka espesyal nga sekreto nga gitawag ug “sagradong tinago.” Sagrado o balaan kini kay gikan kini sa Diyos. Ug tinago o sekreto kini kay ang mga tawo wala mahibalo niini. Bisan ang mga anghel gustong mahibalo ug dugang bahin niini. Gusto ka bang mahibalo kon unsa kini nga sekreto?—

Dugay na kanhi, gibuhat sa Diyos ang unang lalaki ug babaye, si Adan ug Eva. Gihatagan sila sa Diyos ug nindot nga puy-anan nga gitawag ug garden sa Eden. Kon si Adan ug Eva nagmasinugtanon pa sa Diyos, sila ug ang ilang mga anak naghimo unta sa tibuok yuta nga paraiso sama sa maong garden. Ug sila nagpuyo unta sa Paraiso hangtod sa hangtod. Apan nahinumdom ka ba kon unsay gihimo ni Adan ug Eva?—

Si Adan ug Eva misupak sa Diyos, ug mao nay hinungdan nga wala kita magpuyo karon sa paraiso. Apan ang Diyos nag-ingon nga iyang panindoton ang tibuok yuta, ug ang tanan mabuhi sa walay kataposan ug magmalipayon. Unsaon niya kana paghimo? Sulod sa dugayng panahon, ang mga tawo wala mahibalo. Kini usa ka sekreto.

Pag-anhi ni Jesus sa yuta, naghatag siya ug dugang impormasyon bahin niini nga sekreto. Siya miingon nga bahin kini sa Gingharian sa Diyos. Iyang giingnan ang mga tawo nga iampo nga moabot kana nga Gingharian. Himoon niana ang yuta nga usa ka nindot nga paraiso.

Gusto ka bang mahibalo niini nga sekreto?— Hinumdomi nga kadto lang nagmasinugtanon kang Jehova ang makapuyo sa Paraiso. Ang Bibliya dunay daghang estorya bahin sa mga lalaki ug babaye nga nagmasinugtanon kang Jehova. Gusto ka bang makaila kanila?— Atong hisgotan ang pipila kanila ug kon sa unsang paagi nato sila masundog.