Si propetang Moises miingon nga kon motuman ta sa mga sugo sa Diyos, panalanginan ta Niya. (Deuteronomio 10:13; 11:27) Motuman ta sa Diyos dili tungod kay nahadlok ta nga iya tang silotan. Ang nindot nga mga hiyas sa Diyos magpalihok nato nga magmasinugtanon kaniya kay gimahal nato siya ug dili nato gustong pasakitan siya. “Kini ang kahulogan sa paghigugma sa Diyos, nga atong tumanon ang iyang mga sugo.”​—1 Juan 5:3.

Pero sa unsang paagi ang pagkamasinugtanon ngadto sa Diyos moresultag mga panalangin? Niay duha ka paagi.

“Ako, si Jehova, ang imong Diyos, ang Usa nga nagtudlo kanimo aron makabaton kag kaayohan, . . . nga naggiya kanimo sa dalan nga angay nimong laktan.”​—ISAIAS 48:17.

Si Jehova nakaila nato ug naghatag sa giya nga atong gikinahanglan. Kon gusto tang magpagiya sa paghimog maalamong desisyon, kinahanglan natong sayron diha sa Balaang Kasulatan kon unsay gusto sa Diyos nga atong buhaton ug sundon kini.

“Malipayon kadtong namati sa pulong sa Diyos ug nagsunod niini!”​—LUCAS 11:28.

Minilyong tawo karon ang tinuod nga nagmalipayon kay ilang gisunod ang Pulong sa Diyos. Tagda pananglitan ang usa ka lalaki nga taga-Spain. Dali kaayo siyang masuko ug dili maayog pagtratar sa uban​—lakip sa iyang asawa. Usa ka adlaw, iyang gibasa ang mga sinulat ni propetang Moises bahin sa buotang kinaiya ni Jose, nga anak ni Jacob. Bisag gibaligya si Jose ingong ulipon ug gipriso bisag walay sala, nagpabilin siyang kalmado, makigdaiton, ug mapinasayloon. (Genesis, kapitulo 37-45) Ang maong lalaki miingon: “Dihang akong gipamalandong ang ehemplo ni Jose, napalihok ko nga ugmaron ang kalumo, pagkabuotan, ug pagpugong sa kaugalingon. Busa malipayon na ang akong kinabuhi karon.”

Ang Balaang Kasulatan naghatag ug dugang giya kon unsaon nato pagtratar ang uban. Hisgotan kinig dugang sa sunod nga artikulo.