“Ang matag maayong gasa ug matag hingpit nga regalo naggikan sa itaas, kay kini gikan sa Amahan sa langitnong mga kahayag.” (Santiago 1:17) Siyempre, kana nga teksto nagtumong sa pagkamahinatagon sa atong langitnong Amahan, si Jehova nga Diyos. Pero sa tanang regalo nga gihatag sa Diyos para sa tawo, dunay usa nga kinalabwan sa tanan. Unsa kana? Ang popular nga mga pulong ni Jesus sa Juan 3:16 nag-ingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”

Ang kinalabwang regalo nga atong nadawat gikan sa Diyos mao ang iyang bugtong Anak, kay pinaagi kaniya kita mapahigawas sa pagkaulipon sa sala, pagkatigulang, ug kamatayon. (Salmo 51:5; Juan 8:34) Bisag unsaon natog paningkamot, wala gyod tay mahimo aron makagawas gikan niana. Apan tungod sa iyang dakong gugma, ang Diyos naghatag kon unsay gikinahanglan aron makabaton kitag kagawasan. Pinaagi sa paghatag sa iyang bugtong Anak, si Jesu-Kristo, ingong lukat, gihatagan kita ni Jehova nga Diyos ug kahigayonan nga mabuhi sa walay kataposan. Pero unsa gayod ang lukat? Nganong gikinahanglan kini? Ug sa unsang paagi kita makabenepisyo niini?

Ang lukat mao ang bili nga ibayad aron matubos ang butang nga nawala o mapahigawas gikan sa pagkaulipon. Ang Bibliya nag-ingon nga ang atong unang ginikanan, si Adan ug Eva, gilalang nga walay kasal-anan, nga may paglaom nga mabuhi nga malipayon dinhi sa yuta sa walay kataposan uban sa ilang mga anak. (Genesis 1:26-28) Ikasubo, nawala nila kadtong tanan tungod sa ilang pagsupak sa Diyos, busa sila nahimong mga makasasala. Unsay resulta? Ang Bibliya nagtubag: “Ingon nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Imbes ipanunod ngadto sa iyang mga anak ang hingpit nga kinabuhi, gipapanunod hinuon ni Adan ang sala ug kamatayon.

Kon bahin sa lukat, ang bayad kinahanglang katumbas sa nawala. Dihang gilapas ni Adan ang sugo sa Diyos, siya nakasala ug ingong resulta, nawala niya ang hingpit nga tawhanong kinabuhi. Ang Bibliya nag-ingon nga kanay hinungdan kon nganong ang mga anak ni Adan naulipon sa sala ug kamatayon. Busa kinahanglang hingpit sab nga kinabuhi ang ihalad​—ang kinabuhi ni Jesus—​aron mahigawas kita gikan sa pagkaulipon sa sala ug kamatayon. (Roma 5:19; Efeso 1:7) Kay mahigugmaong gibayran sa Diyos ang lukat, ang tawo dunay kahigayonan nga makatagamtam nianang giwala ni Adan ug Eva​—kinabuhing walay kataposan sa paraisong yuta.​—Pinadayag 21:3-5.

Tungod niini, ang gasa sa Diyos nga lukat mao ang kinalabwang regalo sa tanan, kay kini makahatag ug kinabuhing walay kataposan. Aron masabtan kon nganong usa kini ka “hingpit nga regalo,” atong tan-awon kon sa unsang talagsaong paagi makahatag ug kaayohan kini nga regalo, sumala sa gihisgotan sa nag-unang artikulo.

Makatagbaw sa atong pangandoy. Normal lang nga gusto tang mabuhi sa walay kataposan. (Ecclesiastes 3:11) Imposibleng makab-ot nato kana sa atong kaugalingong paningkamot, busa ang lukat lang ang makatagana niana. Ang Bibliya nag-ingon: “Ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.”​—Roma 6:23.

Makatagana sa atong panginahanglan. Ang tawo dili makatagana sa lukat. Ang Bibliya nag-ingon  nga ang bayad sa lukat alang sa atong kinabuhi mahal kaayo nga dili nato kini arang maabot. (Salmo 49:8) Busa nagkinahanglan kita sa tabang sa Diyos aron makagawas gikan sa pagkaulipon sa sala ug kamatayon. Pero ang Diyos nagtagana kon unsa gyoy gikinahanglan​—ang “lukat nga gibayad ni Kristo Jesus.”​—Roma 3:23, 24.

Gihatag sa hustong panahon. Ang Bibliya nag-ingon: “Samtang kita mga makasasala pa, si Kristo namatay alang kanato.” (Roma 5:8) Kay kini gihatag “samtang kita mga makasasala pa,” ang lukat nagsilbing pamatuod sa dakong gugma sa Diyos bisan pag makasasala kita. Ug daghan tag nindot nga palaaboton, bisan tuod antoson pa nato karon ang mga resulta sa sala.

Nagpakitag halangdong motibo ug pagsakripisyo. Ang Bibliya nagpakita kon nganong gihatag sa Diyos ang iyang Anak ingong lukat: “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato.”​—1 Juan 4:9, 10.

Unsaon nimo pagpakita nga imong gipabilhan ang kinalabwang gasa sa tanan? Hinumdomi ang giingon ni Jesus sa Juan 3:16 nga kadto lamang “magpasundayag ug pagtuo” kaniya ang maluwas. Sumala sa Bibliya, ang pagtuo mao “ang masaligan nga pagpaabot sa mga butang nga gilaoman.” (Hebreohanon 11:1) Busa nagkinahanglan kag tukmang kahibalo. Amo kang gidasig sa pagtuon bahin kang Jehova nga Diyos, ang Maghahatag niining “hingpit nga regalo,” ug sa pagkat-on kon unsay angay nimong himoon aron makabaton kag kinabuhing walay kataposan nga nahimong posible pinaagi sa halad lukat ni Jesus.

Kining tanan imong makat-onan pinaagi sa pagsusi sa mga impormasyon nga gibase sa Bibliya diha sa www.ps8318.com/ceb. Ang mga Saksi ni Jehova malipay sa pagtabang nimo. Samtang magtuon ka bahin niining kinalabwang regalo ug makabenepisyo niini, seguradong makaingon ka: “Salamat sa Diyos pinaagi kang Jesu-Kristo nga atong Ginoo!”​—Roma 7:25.