Kon Nganong Angay Nimong Likayan ang Espiritismo

KON gitudloan ka nga ang ubang mga dagway sa espiritismo maoy mga paagi sa pagkontak sa maayong mga espiritu, basin makurat ka sa pagkahibalo sa giingon sa Bibliya bahin sa espiritismo. Pananglitan, kini nag-ingon: “Ayaw kamo pagdangop sa mga espiritista, ug ayaw pagkonsulta sa mga tigpanagna sa mga hitabo, sa ingon mahimong mahugaw tungod kanila.”​—Levitico 19:​31; 20:​6, 27.

Ang Bibliya, sa pagkatinuod, nagbatbat sa tawong nagbuhat sa espiritismo ingong “dulumtanan kang Jehova.” (Deuteronomio 18:​11, 12) Ngano man? Ang pagsusi sa giingon sa Bibliya bahin sa usa ka dakong bahin sa espiritismo​—ang giingong pagpakigsulti sa mga patay—​maoy motubag nianang pangutanaha.

Buhi ba ang mga Patay?

Sukwahi sa gihunahuna sa daghang tawo, ang Pulong sa Diyos, ang Bibliya, nagtudlo nga dili posible nga ang mga tawo makapakigsulti sa namatay nga mga minahal. Nganong dili? Buweno, kon dunay makapakigsulti sa mga patay, ang patay buhi gayod diay. Duna gayoy usa ka bahin kanila nga magpabiling buhi pagkamatay. Giangkon sa uban nga ang kalag magpabiling buhi inigkamatay sa lawas. Tinuod ba kana?

Ang asoy sa Bibliya bahin sa paglalang sa tawo nag-ingon: “Giumol ni Jehova nga Diyos ang  tawo gikan sa abog sa yuta ug gihuypan niya ang mga buho sa iyang ilong sa gininhawa sa kinabuhi, ug ang tawo nahimong buhing kalag.” (Genesis 2:7) Wala ba kini magbutyag nga ang tawo mismo maoy usa ka kalag ug nga siya walay dili-mamatay nga kalag nga magpabiling buhi human mamatay ang lawas? Sa pagkatinuod, ang Kasulatan nag-ingon: “Ang kalag nga makasala​—kini mismo mamatay.” (Ezequiel 18:4) “Ang mga buhi nasayod nga sila mangamatay; apan bahin sa mga patay, sila walay nahibaloan nga bisan unsa . . . Walay buluhaton ni lalang ni kahibalo ni kaalam sa Sheol,” ang komon nga lubnganan sa mga tawo.​—Ecclesiastes 9:​5, 10.

Busa sumala sa Bibliya, ang kalag dili butang nga magpabiling buhi pagkamatay sa lawas ug nga human niana ang mga tawong buhi makapakigsulti kaniya. Aniay duha ka pananglitan sa tinahod nga mga eskolar sa Bibliya nga nakahinapos nga ang kalag mamatay. Ang Canadianong teologo nga si Clark H. Pinnock miingon: “Kining ideyaha [nga dili-mamatay ang tawhanong kalag] nakaimpluwensiya sa teolohiya sulod sa dugay na kaayong panahon apan dili kini biblikanhon. Ang Bibliya wala magtudlo sa kinaiyanhong imortalidad sa kalag.” Sa susama, ang Britanikong eskolar nga si John R. W. Stott nag-ingon: “Ang imortalidad​—ug busa pagkadi-malaglag​—sa kalag maoy ideya nga Grego ug dili biblikanhon.”

Bisan pa niana, ang mga tawo makadawat ug mga mensahe ug makadungog ug mga tingog nga daw naggikan sa mga patay. Nan, kinsa diay ang nagasulti?

Pagpakigsulti Kang Kinsa?

Ang Bibliya nag-asoy nga ang di-makitang espiritung persona migamit ug serpente, sama nga ang ventriloquist mogamit ug monyeka, aron makigsulti sa unang babaye, si Eva, ug mitultol kaniya sa pagrebelde batok sa Diyos. (Genesis 3:​1-5) Ang Bibliya nagtawag niining espiritung persona, o manulonda, “ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta.” (Pinadayag 12:9) Kana siya, si Satanas, milampos sa paghaylo sa ubang mga manulonda nga morebelde. (Judas 6) Kining daotang mga manulonda gitawag ug mga demonyo ug maoy mga kaaway sa Diyos.

Gipakita sa Bibliya nga ang mga demonyo adunay gahom sa pag-impluwensiya sa mga tawo. (Lucas 8:​26-34) Nan, dili ikatingala nga ang Balaod sa Diyos nag-ingon: “Walay makaplagan diha kanimo nga bisan kinsa . . . nga mokonsultag espiritista o tigpanagna sa mga hitabo o bisan kinsa nga magpakisayod sa mga patay. Kay bisan kinsa nga nagbuhat niining mga butanga dulumtanan kang Jehova.” (Deuteronomio 18:​10-12) Unsa ang mga kapeligrohan sa pagsalikway niining balaora?

Ang tinuod-kinabuhing kasinatian ni Haring Saul sa karaang Israel nagtubag nianang pangutanaha.  Tungod kay nahadlok sa iyang mga kaaway, si Haring Saul nangitag espiritista. Iyang gihangyo siya sa pagkontak sa patay nga manalagnang si Samuel. Sa pagkadungog nga gihubit sa espiritista ang usa ka tigulang nga lalaki, si Saul nagtuo nga ang nagpakita mao si Samuel. Ug unsang mensahe ang nadawat ni Saul? Ang Israel itugyan ngadto sa mga kamot sa mga kaaway, ug si Saul ug ang iyang mga anak lalaki mahiuban kang “Samuel,” nga nagpasabot nga sila mamatay. (1 Samuel 28:​4-19) Unsay reaksiyon sa Diyos sa desisyon ni Saul sa pagkonsulta sa espiritista? Ang Kasulatan nagsugilon kanato: “Si Saul namatay tungod sa iyang pagkadili-matinumanon . . . ug usab tungod sa pagpangutana sa usa ka espiritista aron sa pagpakisayod.” (1 Cronicas 10:13) Pagkadakong kapildihan!

Susama karon, kadtong nalangkit sa espiritismo nagpameligro pag-ayo sa ilang kaugalingon. Ang Bibliya nagpasidaan nga “kadtong mga nagabuhat sa espiritismo” mag-antos sa “ikaduhang [o, walay kataposang] kamatayon.” (Pinadayag 21:​8; 22:15) Nan, tin-aw nga ang maalamon ug nagaluwas-kinabuhing dalan nga sundon mao ang paglikay sa espiritismo sa tanang dagway niini.

Kon sa Unsang Paagi Suklan ang Daotang mga Espiritu

Unsa na man kon nalangkit ka na sa espiritismo? Nan makaayo kanimo nga maghimo dayon ug mga lakang sa pagpanalipod sa imong kaugalingon ug sa imong pamilya nga dili madaot sa daotang mga espiritu. Unsang mga lakanga? Sa pag-ilustrar: Unsaon man pagpanalipod sa usa ka tawo ang iyang balay ug pamilya batok sa peste? Human kini paphaon gikan sa iyang balay, iyang hinloan ang iyang balay sa mga butang nga makadani sa peste. Iyang sampongan ang mga liki ug palig-onon ang mga bungbong aron masanta ang pagsulod sa peste, ug kon magpadayon ang hampak sa peste, mahimong magpakitabang siya sa lokal nga mga awtoridad sa pagsumpo niana.

Ang susamang paagi makatabang kanimo nga masuklan ang daotang mga espiritu ug makalingkawas kanila. Tagda ang panig-ingnan sa unang-siglong mga Kristohanon sa Efeso nga nagbuhat ug espiritismo sa wala pa mahimong mga Kristohanon. Human sila makadesisyon nga molingkawas sa espiritismo, mihimo silag tulo ka lakang sa pagpanalipod sa ilang kaugalingon batok sa samag-peste nga mga pag-atake sa daotang mga espiritu. Unsay ilang gibuhat?

Ang Unang Lakang

Ang Bibliya nagsaysay: “Ubay-ubay niadtong mga nanaggamit ug mga kalaki sa salamangka mitapok sa ilang mga basahon ug misunog niini atubangan sa tanan.” (Buhat 19:19) Pinaagi sa pagsunog sa ilang mga basahon sa panagna, kadtong bag-ong mga Kristohanon nagpakitag panig-ingnan alang sa tanang nagtinguha nga suklan ang daotang mga espiritu karon. Wad-a ang tanang butang nga nalangkit sa espiritismo. Naglakip kini sa tanang libro, magasin, komiks, video, poster, materyal gikan sa elektronikong mga tinubdan, ug mga rekording sa musika nga adunay espiritistikanhong mga kahulogan, maingon man sa mga anting-anting o ubang mga butang nga isul-ob agig “panagang.”​—Deuteronomio 7:​25, 26; 1 Corinto 10:21.

 Usa ka lalaki sa Amerika del Sur nga nagumon sa espiritismo sulod sa daghang dekada natandog gayod niining Kasulatanhong tambag. “Usa ka adlaw,” siya nahinumdom, “akong gitigom ang tanan nakong espiritistikanhong mga butang atubangan sa akong balay, gikuha ang atsa, ug gipangbugha kini.” Dayon iyang gisunog ang tanan hangtod nga wala nay nabilin. Human niana maayo ang iyang pag-uswag sa espirituwal ug wala madugay nahimong masibotong ministro sa usa sa mga kongregasyon sa mga Saksi ni Jehova.

Apan, kanang unang lakang dili pa igo. Nganong dili? Buweno, bisan pipila ka tuig human masunog niadtong mga Kristohanon sa Efeso ang ilang mga basahon sa salamangka, si apostol Pablo misulat: “Kita adunay pakigdumog . . . batok sa tuman-kadaotang mga puwersa nga espirituhanon.” (Efeso 6:12) Ang mga demonyo wala molunga. Naningkamot gihapon sila nga makapamentaha. Unsa pay kinahanglang buhaton sa maong mga Kristohanon?

Ang Ikaduhang Lakang

Giawhag ni Pablo ang unang-siglong mga taga-Efeso: “Isul-ob ang kompletong armadora gikan sa Diyos aron kamo makabarog nga malig-on batok sa mga malipatlipatong mga buhat sa Yawa.” (Efeso 6:​11, potnot) Kanang tambaga epektibo gihapon karon. Sama gayod sa tawong naningkamot nga dili makasulod ang peste sa iyang balay, ang Kristohanon kinahanglang magpalig-on sa iyang samag-paril nga mga depensa aron magpabiling dili-maabot sa daotang mga espiritu. Unsay nalangkit niining ikaduhang lakang?

“Labaw sa tanang butang,” si Pablo nagpasiugda, “dad-a ang dakong taming sa pagtuo, nga pinaagi niini kamo makahimo sa pagpalong sa tanang nagadilaab nga mga udyong sa tuman-kadaotang usa.” (Efeso 6:16) Kini nga taming gikinahanglan gayod. Kon mas lig-on ang imong pagtuo, mas kusog ang imong pagsukol sa mga puwersa sa daotang mga espiritu.​—Mateo 17:20.

Nan, sa unsang paagi imong mapalig-on ang imong mapanalipdanong mga depensa? Pinaagi sa pagpadayon sa imong pagtuon sa Bibliya. Sa unsang paagi ang pagtuon sa Bibliya nalangkit sa pagtuo? Buweno, sama nga ang kalig-on sa paril nag-agad ug dako sa kalig-on sa pundasyon niini, busa ang kalig-on sa pagtuo sa usa ka tawo nag-agad pag-ayo sa kalig-on sa pundasyon niini. Unsa kanang pundasyona?

Ang tukmang kahibalo sa Pulong sa Diyos. Si apostol Pablo misaysay: “Ang pagtuo mosunod sa butang nadungog. Sa baylo ang butang nadungog maoy pinaagi sa pulong mahitungod kang Kristo.” (Roma 10:17) Ikaw giawhag nga mohangyo ug libreng pagtuon sa Bibliya gikan sa usa sa mga Saksi ni Jehova, sa oras ug dapit nga kombenyente kanimo. Ang maong pagtuon magpalig-on sa imong pagtuo. (Roma 1:​11, 12; Colosas 2:​6, 7) Ang resulta? Sa dili madugay ang imong pagtuo mahimong kuta nga magsilbing  taming batok sa impluwensiya sa daotang mga espiritu.​—Salmo 91:​4; 1 Juan 5:5.

Unsa ang ikatulong lakang nga kinahanglang himoon niadtong mga Kristohanon sa Efeso?

Ang Ikatulong Lakang

Naghimog mga lakang kadtong bag-ong mga magtutuo sa karaang Efeso aron masuklan ang daotang mga espiritu, apan kadtong maong mga Kristohanon nagpuyo gihapon diha sa siyudad nga naghitak sa demonismo. Nagkinahanglan silag dugang panalipod. Busa sa dihang si apostol Pablo misulat sa mga isigkamagtutuo, iyang gisultihan sila kon unsay buhaton: “Uban ang tanang matang sa pag-ampo ug pangamuyo . . . padayon kamo sa pag-ampo sa tanang higayon diha sa espiritu. Ug niana nga katuyoan padayong magtukaw uban ang bug-os nga pagkamakanunayon ug uban ang pagpangamuyo alang sa tanang mga balaan.”​—Efeso 6:18.

Sa pagkatinuod, ang mainiton ug makanunayong pag-ampo alang sa panalipod ni Jehova maoy usa ka positibong lakang nga gikinahanglan aron mapanalipdan batok sa daotang mga espiritu, kaniadto ug ingon man usab karon. Ug makapahupay ang pagkahibalo nga si Jehova motubag sa imong kinasingkasing nga mga pangamuyo pinaagi sa paghatag kanimo sa iyang panalipod, nga naglakip sa pagpaluyo sa iyang mga manulonda. (Salmo 34:​7; 91:​2, 3, 11, 14; 145:19) Busa, hinungdanon kaayo nga molahutay sa pag-ampo ngadto sa Diyos, “Luwasa kami gikan sa tuman-kadaotang usa.”​—Mateo 6:​13; 1 Juan 5:​18, 19.

Si Antônio, kanhi usa ka espiritista sa Brazil, nakaamgo sa bili sa pag-ampo. Human niya dawata ang pagtuon sa Bibliya ug nahibaloan ang ngalan sa Diyos, si Jehova, misugod siya sa pag-ampo nga mainiton kang Jehova nga Diyos alang sa tabang aron makalingkawas sa espiritismo. Sa paghinumdom, siya miingon: “Ang pag-ampo kang Jehova nahimong usa ka dangpanan alang nako ug sa daghan pang uban nga naulipon sa daotang mga espiritu sa nangagi.”​—Proverbio 18:10.

Molampos Ka

Hinungdanon nga human makaila kang Jehova, ikaw mosalig kaniya sa bug-os, magpasakop sa iyang awtoridad, ug mosunod sa iyang mga sugo. Kon buhaton nimo kini, inigsangpit nimo kaniya alang sa tabang, nga naggamit sa iyang personal nga ngalan, ikaw iyang panalipdan. Nadawat ni Antônio ang maong panalipod. Karon siya maoy usa ka Kristohanong ansiyano diha sa usa sa mga kongregasyon sa mga Saksi ni Jehova sa São Paulo ug mapasalamaton nga nakakaplag sa kamatuoran nga naghatag kaniyag kagawasan.​—Juan 8:32.

Sama kang Antônio ug sa libolibo pang uban nga kanhi mga espiritista nga nag-alagad na karon kang Jehova nga Diyos, ikaw magmalamposon sa paglingkawas gikan sa espiritismo. Busa, wad-a ang mga butang nga nalangkit sa espiritismo, lig-ona ang imong pagtuo pinaagi sa pagtuon sa Bibliya, ug pag-ampo alang sa panalipod ni Jehova. Himoa kining maong mga lakang​—ang imong kinabuhi nag-agad niini!

[Blurb sa panid 5]

Sumala sa Bibliya, ang buhi dili makapakigsulti sa patay

[Hulagway sa panid 6]

1. Wad-a ang tanang butang nga nalangkit sa espiritismo

[Hulagway sa panid 7]

2. Padayon sa pagtuon sa Bibliya

[Hulagway sa panid 8]

3. Pag-ampo nga mainiton ug makanunayon