Ang Bag-ong Dagway sa British Museum

TINAMPO SA MAGSUSULAT SA PAGMATA! SA BRITANYA

Ang British Museum sa London ginaduaw sa halos unom ka milyong bisita kada tuig. Mga usa ka tuig kanhi, gipadak-an kini ug 40 porsiyento aron mapasulod kining maong panon sa mga tawo. Sa unsang paagi kini naposible?

Ang British Museum ug ang librarya niini gibuksan ngadto sa publiko niadtong 1759. Ang presenteng tinukod nga nahimutangan niini nakompleto sa 1852. Apan sa 1997, ang librarya, nga nailhan ingong ang British Library, gibalhin ngadto sa bag-ong mga propiedad diha sa duol, diin gibalhin usab didto ang 12 ka milyong pinatik nga mga libro ug tinagpulo ka libong manuskrito ug mga timbre. Tungod niini nga pagbalhin nakapasangkad ang British Museum pinaagi sa pagbukas sa sentrong sawang​—nga wala pasudli sa publiko sa halos 150 ka tuig!

Ang sentro sa kalihokan sa bakante na karon nga sawang, nga gitawag ug Great Court, mao ang linginon ug atop nga Reading Room. Sukad sa pagsugod niini sa 1857, kining maong Reading Room nahimong labing maayong dapit alang sa mga tigdukiduki gikan sa tibuok kalibotan. Sila Mohandas Gandhi, Charles Darwin, ug Karl Marx maoy pipila lamang sa iladong mga tawo nga nanukiduki diha sa hilom nga pribasiya niining tinamod nga librarya. Kining lawaka nabuksan ngadto sa publiko sa una gayod nga higayon. Mao kini ang nahimutangan karon sa koleksiyon mismo sa museyo nga 25,000 ka libro.

Gipasig-uli ang linginong atop niining makasaysayanhong lawak. Ang Great Court, apil ang Reading Room, dunay maanindot nga kisame nga may gibug-atong 800 ka tonelada. Kini maoy usa ka bayanang puthaw nga gipuno ug 3,312 ka bildong trianggulo, ang gidak-on sa kada usa gipasibo pag-ayo pinaagig kompiyuter.

Diha sa Reading Room nahimutang ang mga kompiyuter sa British Museum aron makadukiduki bahin sa linibo ka bililhong mga bahandi niini. Gitawag sa The Times sa London ang gibag-o nga mga pasilidad nga usa ka obra maestra. Ang mga bisita maikagong miuyon!

[Picture Credit Lines sa panid 31]

Center top and bottom: Copyright The British Museum; all others: Copyright Nigel Young/The British Museum