Gikan sa Among mga Magbabasa

Gikulata nga mga Babaye Dili ko ikabatbat sa mga pulong ang akong pagpasalamat sa seryeng “Tabang Alang sa Gikulata nga mga Babaye.” (Nobyembre 8, 2001) Biktima ako sa pagpamintas sa panimalay, ug bisan sa dihang nakahimo ako sa pagtaho kon unsay nagkahitabo kanako, kombinsido gihapon ako nga walay makasabot sa kasakit, kagul-anan, ug dulot nga kasubo nga dili ko mahupay sa bisan unsang paagi. Kadtong mga artikuloha nagbatbat nga eksakto sa akong gibati.

N. L., Italya

Sa ako gayong pag-abli sa putos ug pagtan-aw sa hapin, mitubod ang mga luha sa akong mga mata. Gibalik ko dayon pagpilo ang magasin, kay mibati nga kadto mahitungod sa usa ka bahin sa akong kagahapon nga buot kong magpakaaron-ingnong wala gayod mahitabo. Miampo ako alang sa kusog sa pagpunit pag-usab sa magasin. Pagkamapasalamaton ko gayod nga ako kanang gihimo! Kini nga serye mitabang kanako sa pag-amgo nga ako wala mag-inusara sa akong pag-antos. Ang pagbasa lang sa mga pulong “ang pagsukmag sa kapikas sa usa maoy usa ka dakong sala sa mga mata sa Diyos” nahisamag pagbubog makapahupayng lana sa usa ka samad. Salamat tungod sa maong makapahupay nga mga artikulo nga naghisgot sa mga kahimtang sa tinuod nga kinabuhi.

D.G.M., Tinipong Bansa

Ako may samang kasinatian sa mga babayeng gihisgotan sa maong mga artikulo. Sultihan ko ang akong kaugalingon nga ang alkoholikong ilimnon ug ang palibot nga gidak-an sa akong bana mao ang mga hinungdan. Bisan kon kanang mga hinungdana makapatin-aw sa mga panghitabo sa kabangisan, ako nahupayan sa dihang nasabtan ko nga dili ipakamatarong ang kabangisan. Uban sa bug-os kong kasingkasing, gusto ko nga ang akong bana mobasa sa Bibliya ug makahibalo sa gugma ni Jehova.

S. I., Hapon

Kini nga serye may espesyal nga epekto kanako, sanglit ako maoy dinagmalan nga asawa. Gibati ko nga ako si Roxana. Dako ug tabang ang pagkahibalo nga adunay ubang mga tawo nga nasayod kon unsay pagbati sa dinagmalan nga asawa. Nasayran ko gikan niining mga artikuloha nga dili ako ang mabasol sa tinamdan sa akong bana. Kini nakatabang usab kanako sa pag-amgo nga ako hinungdanon sa Diyos, bisan pag giisip sa akong bana nga ako walay bili ug walay kapuslanan. Salamat sa pagpatik sa maong makatabang nga impormasyon. Kini labaw pa kay sa bahandi!

B. L., Pilipinas

Nakahimo kamo sa pagsulat bahin sa tanang kasakit ug kapakyasan nga wala nako ikapahayag. Kini nga serye nakatabang kanako sa pag-ila nga si Jehova nakasabot sa mental ug emosyonal nga kasakitan nga ipahinabo sa maong problema. Palihog sa pagpadayon sa pagsulat ug mga artikulo nga sama niini, kay kining problemaha kinahanglang hisgotan ug masabtan sa uban. Nakapaneguro ako nga daghan ang makabaton sa samang paghupay nga akong nabatonan gikan niining mga artikuloha.

K. E., Australia

Gimatuto ako sa usa ka masuk-anon nga amahan, ug ako kanunayng masuko sa akong bana. Usahay​—dili, makadaghan—​ako gayod siyang suntokon. Ang akong bana mas kusgan kay kanako, busa ako naghunahuna nga wala gayod ako makapasakit kaniya. Sa dihang nabasa ko ang giingon sa artikulo​—nga ang pagdagmal sa kapikas maoy dakong sala sa mga mata sa Diyos​—ako nakurat pag-ayo. Ang akong bana maoy maaghop nga alagad ni Jehova. Buot kong mangayog pasaylo kaniya uban sa bug-os kong kasingkasing. Mapasalamaton ako kang Jehova alang sa maong disiplina.

T. I., Hapon

Kining magasina nakapatubod sa mga luha sa akong mga mata. Kadto nahisamag ako nagbasa sa akong personal nga kasinatian. Apan sa dili pa dugay ang akong bana nagsukitsukit bahin sa Bibliya. Siya nakatambong na sa pipila ka tigom sa Kingdom Hall, ug siya nagatuon karon sa Bibliya. Makauyon ako sa gisulti ni Lourdes nga anaa sa panid 11: “Usahay abi nakog nagdamgo lamang ako!”

E. R., Tinipong Bansa