Ang Unang Tikang—Pag-ergo Atubangan sa Korte Suprema

ANG PETSA NGA GITAKDA alang sa pag-ergo atubangan ni Chief Justice William Rehnquist ug sa walo ka kaubang mga huwes sa Korte Suprema maoy Pebrero 26, 2002. Ang kawsa sa mga Saksi ni Jehova gihawasan sa grupo sa upat ka abogado.

Gisugdan sa pangulong abogado sa mga Saksi ang iyang argumento pinaagi sa makadanig-pagtagad nga introduksiyon: “Alas 11:00 sa buntag sa Sabado sa Balangay sa Stratton. [Unya gituktok niyag tulo ka beses ang kuptanan sa espiker.] ‘Maayong buntag. Tungod sa bag-o pang mga hitabo, gipaningkamotan ko gayod ang pag-anhi sa inyong balay aron makigsulti kanimo bahin sa gihisgotan ni Propeta Isaias nga mas maayong butang. Kana mao ang maayong balita nga gihisgotan ni Kristo Jesus, ang maayong balita bahin sa Gingharian sa Diyos.’”

Nagpadayon siya: “Kriminal nga buhat ang pagpamalaybalay sa Balangay sa Stratton ug ang paghatod sa maong mensahe gawas kon ang usa mokuha unag permiso sa pagbuhat niana gikan sa mga awtoridad sa balangay.”

‘Nangayo ba Kamog Kuwarta?’

Si Justice Stephen G. Breyer nagpatunghag pipila ka pintok nga mga pangutana alang sa mga Saksi. Nangutana siya: “Tinuod ba nga ang imong mga kliyente wala mangayog kuwarta, bisan usa ka sentabos, ug wala sila mamaligyag mga Bibliya, ug wala sila mamaligyag bisan unsa, nga ang ila lang isulti mao, ‘Gusto kong makigsulti kanimo bahin sa relihiyon’?”

Mitubag ang abogado sa mga Saksi: “Your Honor, nasayran sa kadaghanan nga diha sa Balangay sa Stratton, ang mga Saksi ni Jehova wala mangayog kuwarta. Sa ubang mga teritoryo nasayran usab sa kadaghanan nga mohisgot sila usahay ug boluntaryong donasyon. . . . Wala kami magtinguha sa pagpanukot alang sa pondong salapi. Ang among tinguha mao lang ang pagpakigsulti sa mga tawo bahin sa Bibliya.”

Gikinahanglan ang Permiso sa Gobyerno?

Si Justice Antonin Scalia masinabtanong nangutana: “Dili ba imong opinyon nga dili kinahanglang ikaw moadto sa alkalde ug mangayog permiso aron sa pagpakigsulti sa usa ka silingan bahin sa makapaikag nga butang?” Ang abogado sa mga Saksi mitubag: “Wala kami magtuo nga kining maong Korte angay mag-aprobar sa usa ka lagda sa Gobyerno nga mag-obligar sa usa ka lungsoranon sa pagkuhag lisensiya aron makigsulti sa laing lungsoranon diha sa balay sa maong lungsoranon.”

Kausaban sa mga Argumento, Kausaban sa Tinamdan

Turno na karon sa Balangay nga ipresentar ang kaso niini. Ang pangulong abogado nagpatin-aw sa ordinansa sa Stratton, nga miingon: “Ang gobyerno sa Stratton nagagamit  lang sa gahom niini sa dihang iyang gitinguha nga panalipdan ang pribasiya sa mga molupyo niini, sa dihang iyang gitinguha ang pagsanta sa krimen. Ang ordinansa bahin sa dili pagpangambas o pagpanukot diha sa pribadong propiedad nag-obligar lang nga magparehistro una ug magdalag permiso diha sa pagduaw sa kabalayan.”

Mideretso dayon si Justice Scalia sa hinungdanong punto sa dihang siya nangutana: “Duna ba kamoy nasayran nga laing kaso namo [Korte Suprema] nga naglangkit sa usa ka ordinansa nga may ingong intensiyon, nga naglangkit sa pagpanukot, nga wala mangayog kuwarta, nga wala mamaligyag mga butang, apan nga naglangkit pananglit sa, ‘Buot kong makigsulti bahin kang Jesu-Kristo,’ o ‘Buot kong makigsulti bahin sa kalikopan?’ May kaso ba kaming ingon niana?”

Mipadayon si Justice Scalia: “Wala akoy nasayran nga ingong mga kaso, sulod sa duha ka siglo.” Niana si Chief Justice Rehnquist misagbat nga matistison: “Wala ka pa mabuhig ingon ka dugay.” Nagpahinabo kadtog pangatawa sulod sa korte. Si Justice Scalia miduso sa iyang argumento: “Ang intensiyon niining butanga bag-o alang kanako.”

Labing Maayong Ideya?

Si Justice Anthony M. Kennedy misuknag usa ka pintok nga pangutana: “Sa imong hunahuna labing maayo ba nga ideya nga ako mangayog permiso sa Gobyerno sa dili pa ako molakaw sa unahan, diin wala ako makaila sa tanang tawo, [ug] ako moingon, Buot kong makigsulti kaninyo tungod kay ako nabalaka bahin sa pagkuha sa basura, tungod kay ako nabalaka bahin sa atong Kongresista, o bisan unsang butang. Kinahanglan bang mananghid ako sa Gobyerno una ako makahimo niana?” Midugang siya, “Katingalahan ang maong ideya.”

Unya si Justice Sandra Day O’Connor miapil sa argumento, nga nangutana: “Unsa na man ang mga tigdula sa trick-or-treat panahon sa Kalagkalag? Kinahanglan bang mokuha silag permiso?” Gipadayon ni Justice O’Connor ug Scalia ang maong matang sa pangatarongan. Gipasulod ni Justice O’Connor ang laing argumento: “Unsa na man ang paghulam ug usa ka tasang asukar gikan sa imong silingan? Kinahanglan bang mokuha akog permiso aron mohulam ug usa ka tasang asukar gikan sa akong silingan?”

Mga Tigkambas ba ang mga Saksi?

Si Justice David H. Souter nangutana: “Nganong ang ordinansa gipadapat man sa mga Saksi ni Jehova? Sila ba mga tigkambas, mga tigpanukot, mga tigbaligya sa balay-balay, mga tigbulanti? Ingon ba sila niana?” Ang abogado sa Balangay detalyadong mihisgot bahin sa ordinansa ug midugang nga gibatbat sa ubos nga korte nga ang mga Saksi ni Jehova maoy mga tigkambas. Niana mitubag si Justice Souter: “Malangkobon diay kaayo ang imong kabatbatan sa mga tigkambas, kon kana naglakip sa mga Saksi ni Jehova.”

Unya gikutlo ni Justice Breyer ang kabatbatan sa diksiyonaryo sa usa ka tigkambas nga nagpakita nga dili kana mapadapat sa mga Saksi. Midugang siya: “Wala ako makabasa diha sa imong pormal nga argumento nga nagsulti kon unsay katuyoan sa pag-obligar sa maong mga tawo [mga Saksi ni Jehova] nga dili interesado ug kuwarta, nga dili interesadong mamaligya, nga dili gani interesado sa mga botos, nga moadto pa sa city hall ug magparehistro. Unsa bay katuyoan sa siyudad?”

Ang “Pribilehiyo” sa Pagpaambit ug Impormasyon

Unya ang abogado sa Balangay miergo nga “ang katuyoan sa siyudad mao ang pagsanta sa pagsamok sa tag-iya sa balay.” Dugang niyang gipatin-aw nga ang katuyoan mao ang pagpanalipod sa mga molupyo gikan sa panikas ug sa mga kriminal. Gikutlo ni Justice Scalia ang ordinansa aron ipakita nga ang alkalde makapangayog dugang impormasyon maylabot sa nagparehistro ug iyang katuyoan aron “tukmang mabatbat ang matang sa pribilehiyong gitinguha.” Sa pintok iyang gidugang: “Sumala sa ordinansa ang pagpamalaybalay aron sa pagdani sa imong isigkalungsoranon bahin niini o nianang butanga maoy usa ka pribilehiyo​—dili ko gayod kana masabtan.”

 Si Justice Scalia miinsistir na usab: “Busa angay bang iobligar nimo nga ang tanang motimri sa timrihan sa usa ka pultahan kuhaag tamla sa mga tudlo sa dili pa [siya] makatimri sa timrihan sa pultahan? Ang gamayng risgo sa pagkahitabo sa usa ka krimen igo bang rason nga obligahon ang tanang buot motimri sa timrihan sa usa ka pultahan sa pagparehistro sa city hall? Dili gayod hinuon.”

Ang Ordinansa Nanalipod ba sa mga Molupyo?

Kay natapos na ang iyang 20 minutos, gihatag sa abogado sa Balangay ang higayon sa pag-ergo ngadto sa abogado heneral sa estado sa Ohio. Miergo siya nga ang ordinansa labot sa dili pagpamalaybalay nanalipod sa mga molupyo gikan sa mga pagduaw sa estranghero, “nga tinong usa ka tawo nga wala-dapita, [kinsa] anaa sa akong propiedad . . . ug sa akong hunahuna ang balangay may katungod sa pag-ingon, ‘Mabalak-on kami nianang matanga sa kalihokan.’”

Unya si Justice Scalia miingon: “Ang balangay nagaingon nga bisan kadtong mga tawo nga modawat sa mga Saksi ni Jehova, bisan pag naglingkod sila didto nga nag-inusara, bisan gusto nilang makigsulti bahin sa bisan unsang ulohan, ug kining mga tawhana [mga Saksi ni Jehova] kinahanglan gihapong magparehistro sa alkalde aron makapribilehiyo sa pagtimri sa ilang timrihan sa pultahan.”

“Gamay Rang Restriksiyon”

Panahon sa pagsukitsukit si Justice Scalia nakahimog puwersadong punto sa miingon siya: “Kitang tanan makatuo nga ang labing dili-peligrosong mga katilingban sa kalibotan mao ang totalitaryanhong diktador nga mga pagmando. Talagsa ra ang krimen. Kini nahibaloan sa kadaghanang tawo, ug usa sa mga bugti sa kagawasan mao ang mas dakong risgo nga mahitabo ang malapasong buhat, ug ang isyu maoy kon ang ordinansa igo bang makasanta sa malapasong buhat mao nga angayng iobligar ang pribilehiyo sa pagtimri sa timrihan sa pultahan sa usa ka tawo.” Unya ang abogado heneral mitubag nga “kini gamay rang restriksiyon.” Si Justice Scalia mitubag nga kana gamay ra mao nga “dili kita makakaplag ug bisan usa ka kaso nga nagtaho nga ang usa ka munisipyo nagpatuman sukad nianang matanga sa ordinansa. Sa akong hunahuna kana dili gamay.”

Sa kataposan, kay giapeke sa usa sa mga huwes, ang abogado heneral miangkon: “Mag-ukon-ukon ako sa pagsulti nga mahimong bug-os idili ang pagtimri sa mga timrihan sa pultahan o ang pagpanuktok.” Uban sa maong komento, ang iyang argumento natapos.

Panahon sa sumbalik-argumento, gipunting sa abogado sa mga Saksi nga ang ordinansa walay paagi sa pagsusi kon tinuod ba ang sulti sa usa ka tawo. “Makaadto ako sa munisipyo ug moingon, ‘Ako si Tanpulano,’ ug mokuhag permiso ug mamalaybalay.” Gipunting usab niya nga ang alkalde may gahom nga dili moisyu ug permiso sa usa ka tawo nga moingong siya dili kaanib sa usa ka organisasyon. “Nagtuo kami nga kini sa tin-aw maoy paggamit sa awtoridad sa pagdesisyon,” siya miingon ug midugang: “Sa pagkamatinahoron ikasulti ko nga ang among [mga Saksi ni Jehova] kalihokan nalambigit gayod sa diwa sa Unang Enmiyenda.”

Sa taudtaod, si Chief Justice Rehnquist nagtapos sa panag-ergo, nga miingon: “Ang kaso ihatag ngadto [sa Korte Suprema].” Ang tibuok proseso mikabat lang ug kapin sa oras. Kon unsa ka hinungdanon kadtong orasa gipakita sa sinulat nga desisyon nga gipahibalo niadtong Hunyo.

[Mga hulagway sa panid 6]

Chief Justice Rehnquist

Justice Breyer

Justice Scalia

[Credit Lines]

Rehnquist: Collection, The Supreme Court Historical Society/Dane Penland; Breyer: Collection, The Supreme Court Historical Society/Richard Strauss; Scalia: Collection, The Supreme Court Historical Society/Joseph Lavenburg

[Mga hulagway sa panid 7]

Justice Souter

Justice Kennedy

Justice O’Connor

[Credit Lines]

Kennedy: Collection, The Supreme Court Historical Society/Robin Reid; O’Connor: Collection, The Supreme Court Historical Society/Richard Strauss; Souter: Collection, The Supreme Court Historical Society/Joseph Bailey

[Hulagway sa panid 8]

Sulod sa korte

[Credit Line]

Photograph by Franz Jantzen, Collection of the Supreme Court of the United States