Gikan sa Among mga Magbabasa

Postpartum Depression Kinasingkasing nga pasalamatan ko kamo sa artikulong “Nabuntog Nako ang Akong Pagpakigbisog sa Postpartum Depression.” (Hulyo 22, 2002) Ako nanganak usa ka tuig ug tulo ka bulan sa miagi. Sa kalit lang, nausab ang akong pagkatawo. Usahay akong mapasakitan ang pagbati sa akong mga minahal, kay dili nako ikasaysay kon unsay nagakahitabo kanako. Sa pagkakaron miarang-arang na ang akong kahimtang. Ang artikulo nakatabang kanako.

A. P., Romania

Human mabasa ang artikulo, ang akong estudyante sa Bibliya miingon nga siya may sakit nga sama niini. Moadto siya sa ospital kada semana ug, tungod sa pagtambal, malipayon na siyang makabuhat sa iyang mga responsabilidad.

A. M., Hapon

Kining artikuloha maoy tubag sa akong mga pag-ampo. Minahal nga mga igsoon nahibalo gayod kamo sa panginahanglan sa inyong mga igsoong babaye. Ang pagdawat niining artikuloha nahisamag pagdawat ug hugot nga mabinationg paghalog gikan kang Jehova ug sa iyang organisasyon.

C. W., Tinipong Bansa

Padulong na sa pagkaayo ang akong postpartum depression, ug kining artikuloha nakapalig-on ug nakapadasig kanako. Gilakip ninyo ang mga detalye nga masabtan lamang pag-ayo sa usa nga nakaagi niining problemaha. Nagplano ako sa pagtipig niining isyuha sa Pagmata! sa luwas nga dapit ug konsultahon ang mapuslanong mga sugyot niini sa panahong ako magkinahanglag pagdasig.

E.V.F., Brazil

Wala pa ako makabasa ug artikulo nga nakatandog pag-ayo sa akong kasingkasing sama niining artikuloha. Nabungkag ang akong kaminyoon tungod sa akong postpartum depression. Singko-anyos na ang akong anak nga babaye, ug gimahal ko siya pag-ayo. Gidangtan ug mga tulo ka tuig ang pagbuntog nako sa maong kahimtang.

A. O., Puerto Rico

Nakigbisog ako sa postpartum depression sulod na sa tulo ka bulan. Sa dihang giingnan ako nga ang kinaulahiang Pagmata! dunay artikulo bahin niini, ako mihilak pag-ayo nga wala gani ako makasulti. Kadto mao ang labing maayong artikulo bahin sa postpartum depression nga akong nabasa sukad. Mapasalamaton ako kang Jehova ug sa iyang organisasyon sa maayong pag-atiman kanamo!

A. L., Canada

Mga Batan-on Nangutana Dawata ang akong tim-os nga pasalamat sa artikulong “Mga Batan-on Nangutana . . . Unsay Mahimo Ko Aron Mahimong Mas Madanihon?” (Hulyo 22, 2002) Bayente dos anyos na ako, ug kanang artikuloha nakadasig kanako sa pagpalambo sa mga hiyas sa akong pagkatawo. Ang akong unang tumong mao ang pagpadapat sa hiyas sa kalumo. Labaw sa tanan, buot ko nga mahimong matahom sa panan-aw ni Jehova. Palihog ipadayon ang pagpatik sa maong maayong mga artikulo.

A. H., Hapon

Kining artikuloha nakatandog sa akong kasingkasing. Ako 18 anyos, ug usahay malimtan nako ang kahinungdanon sa pag-ugmad sa akong espirituwal nga mga hiyas. Sukad karon, uban sa tabang ni Jehova, determinado na ako sa pag-ugmad sa mga bunga sa espiritu.​—Galacia 5:​22, 23.

M.R.A., Brazil

Sulod sa miaging duha ka tuig, naghunahuna ako kon giisip ba sa mga tawo nga ako madanihon, ug usahay bation nako nga ako dili maanyag. Human mabasa kining artikuloha, ako mapasalamaton kaayo sa pagkahibalo nga pinaagi sa pagkahimong alagad ni Jehova, ako magmadanihon ngadto kaniya ug kini ang labing hinungdanon.

I. P., Tinipong Bansa