Ang Maanindot nga Batong Moldavite

TINAMPO SA MAGSUSULAT SA PAGMATA! SA CZECH REPUBLIC

Unsay mosantop sa imong hunahuna kon makadungog ka ug pulong “moldavite”? Sa ubang mga pinulongan ang pulong makapahunahuna sa tawo ug usa ka butang nga naggikan sa suba sa Moldau, nga gitawag karon ug Vltava River, sa Sentral nga Uropa. O tingali makahunahuna ka ug talagsaon, maanindot nga bato. Makaiikag, ang moldavite naggikan sa suba ug usa usab kini ka bato.

Ang moldavite maoy berde, bildohon nga bato. Kini makita sa habagatang bahin sa Czech Republic, sa kadaplinan sa Vltava River. Kini giklasipikar ingong tektite​—usa ka termino nga gikuha gikan sa Gregong pulong tektos, nga nagkahulogag “natunaw,” o “tinunaw.” Ang Encyclopædia Britannica nagpatin-aw: “Ang mga tektite gipanukiduki ug maayo sa siyensiya sa halos tibuok bahin sa ika-20ng siglo tungod kay misteryoso ang gigikanan niini o posible nga gikan kini sa ubang mga planeta, apan karon kini gidawat nga naporma gumikan sa pagkatunaw ug kalit nga pagkabugnaw sa mga bato sa yuta nga napulpog tungod sa hilabihan ka kusog nga pagkahagsa sa dagkong mga meteor, mga kometa, o mga asteroid ibabaw sa Yuta.”

Ang mga tektite makita diha sa tanang kontinente gawas sa Antartika ug sa Amerika del Sur. Tungod sa pagkatagsaon sa gigikanan sa moldavite, ang ubang mga tawo nagtuo nga kini dunay misteryosong enerhiya sa uniberso ug may mga gahom nga makaayo. Bisan pa niana, ang mga moldavite maoy ordinaryong mga bato lamang​—apan mga bato nga puwerteng nindota ug makabibihag.

Kining tagsaong mga bato may kolor nga lutaw-dulomon nga pagkaberde. Lahi sa ubang mga tektite, kini matabas sa pagkahimong nindot kaayong mga bato para sa alahas. Ang mga bisita sa Czech Republic mabihag gayod sa mga moldavite nga makita diha sa seksiyon sa National Museum sa Prague diin gieksibit ang mga mineral.

Ang Bibliya nagpahinumdom kanato: “Iya ni Jehova ang yuta ug ang tanan nga anaa niini.” (Salmo 24:1) Lakip na niini ang tanang mahalong mga bato sa kalibotan. Tingali mao kanay mosantop sa imong hunahuna kon makahigayon ka man ugaling sa pagtan-aw sa maanindot nga moldavite!

[Hulagway sa panid 31]

Wala pa maproseso nga mga moldavite

[Hulagway sa panid 31]

Natabas na nga moldavite

[Hulagway sa panid 31]

Moldavite nga alahas

[Picture Credit Line sa panid 31]

Cut moldavite and bottom photos: Z knihy Svĕt drahých kamenů