Aduna Kahay mas Masanag nga Kaugmaon?

Ang kaugmaon maoy usa ka ulohan nga gikaikagan pag-ayo sa mga tawo. Kinsa goy dili gustong mahibalo kon unsay atong buhaton sa sunod bulan, sunod tuig, o kaha usa ka dekada gikan karon? Sa mas dakong sukod, unsa na unyay kahimtang niining kalibotana mga 10, 20, o 30 ka tuig gikan karon?

MASANAG ba ang imong panglantaw sa umaabot? Ingon niana ang panglantaw sa milyonmilyong tawo, ug sila mahimong bahinon sa duha ka grupo: kadtong moingon nga lig-on ang ilang mga rason sa pagtuo nga moarang-arang ang kahimtang, ug kadtong naghupot ug masanagong panglantaw tungod lang kay ang ubang mga kapilian makapaguol ra man gihapon.

Siyempre, ang ubang mga tawo walay makitang maayong kahimtang sa umaabot. Lakip kanila mao ang mga tigpanagna ug kalaglagan nga mora bag malipay hinuong mopahibalo ug makalilisang nga kalaglagan sa planetang Yuta. Matod nila nga adunay pipila nga maluwas, kon ugaling duna may maluwas.

Unsay imong panglantaw sa umaabot? Napanglantawan mo ba ang kalaglagan, o ang kalinaw ug kasegurohan? Kon naglaom kag kalinaw ug kasegurohan, gipasukad sa unsa ang imong paglaom​—sa panghanduraw lang o sa malig-ong ebidensiya?

Dili sama sa mga tigpanagna ug kalaglagan, ang mga magpapatik sa Pagmata! wala magtuo nga ang mga tawo mapuo. Sa kasukwahi, ang Bibliya naghatag ug malig-ong rason sa pagtuo nga adunay mas maayong mga kahimtang sa umaabot.

[Picture Credit Line sa panid 5]

U.S. Department of Energy photograph