Ang Hunahuna sa Bibliya

Gusto ba sa Diyos nga Madato Ka?

“Gikaluy-an ako sa Diyos, madato na gyod ko!”

“Gusto kong madato kay pagbuot sa kahitas-an nga ako madato.”

“Gitugahan kita sa Diyos ug abilidad aron kita madato.”

“Ako nadato tungod sa Bibliya.”

DAGHANG relihiyosong mga grupo nag-ingon nga grasya sa Diyos kon ang usa madato. Sila nagwali nga kon imong buhaton ang husto sa panan-aw sa Diyos, hatagan ka niyag abilidad aron ikaw madato niining kinabuhia ug gantihan ka pa sa umaabot. Daghan kaayo ang nagtuo niining doktrinaha, ug ang mga basahon nga nagpasiugda niini himalitan. Apan nahiuyon ba sa Bibliya ang doktrina nga madato ka kon imong buhaton ang husto sa panan-aw sa Diyos?

Ang tinuod, ang atong Maglalalang, nga gitawag sa Bibliya nga “malipayong Diyos,” buot nga kita makabatog malipayon ug malamposong kinabuhi. (1 Timoteo 1:11; Salmo 1:1-3) Dugang pa, iyang panalanginan kadtong nagpahimuot kaniya. (Proverbio 10:22) Apan materyal nga panalangin ba lamang ang iyang ihatag kanato karon? Matin-awan unya kita kon atong masabtan kon hain na kitang bahina sa yugto sa panahon sumala sa katuyoan sa Diyos.

Panahon ba Karon nga Magpadato?

Sa karaang panahon gipadato ni Jehova nga Diyos ang iyang pipila ka alagad, sama kang Job ug Haring Solomon. (1 Hari 10:23; Job 42:12) Apan daghang alagad sa Diyos dili dato, sama kang Juan Bawtista ug Jesu-Kristo. (Marcos 1:6; Lucas 9:58) Unsay gipakita niini? Sumala sa Bibliya, ang Diyos nakiglabot sa iyang mga alagad sumala sa iyang katuyoan alang kanila. (Ecclesiastes 3:1) Sa unsang paagi aplikado kanang prinsipyoha kanato karon?

Ang tagna sa Bibliya nagpakita nga kita nagkinabuhi na sa “konklusyon sa sistema sa mga butang,” o sa “kataposang mga adlaw” sa presenteng kalibotan. Ang ilhanan niini mao ang mga gubat, sakit, kagutom, linog, ug kagubot sa katilingban—mga kahimtang nga giantos sa katawhan sukad sa 1914. (Mateo 24:3; 2 Timoteo 3:1-5; Lucas 21:10, 11; Pinadayag 6:3-8) Sa laktod, kining kalibotana nahisamag barko nga hapit nang malunod! Tungod niini, makataronganon bang panalanginan sa Diyos ang tanan niyang mga alagad ug materyal nga bahandi, o duna bay laing katuyoan ang Diyos alang kanato?

Gitandi ni Jesu-Kristo ang atong panahon sa mga adlaw ni Noe. Si Jesus miingon: “Kay ingon nga sila niadtong mga adlawa sa wala pa ang baha, ang mga lalaki nangaon ug nanginom, nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan, mao man usab unya ang presensiya sa Anak sa tawo.” (Mateo 24:37-39) Gitandi  usab ni Jesus ang atong mga adlaw sa mga adlaw ni Lot. Ang mga tawo sa Sodoma ug Gomora ‘nanagpangaon, nanag-inom, nanagpamalit, nanagbaligya, nanagtanom, ug nanagpanukod.’ “Apan sa adlaw nga si Lot migula sa Sodoma, miulan ug kalayo ug asupre gikan sa langit ug gilaglag silang tanan,” ug si Jesus dugang miingon: “Maingon usab unya niini sa adlaw nga igapadayag ang Anak sa tawo.”—Lucas 17:28-30.

Sa pagkatinuod, dili isyu ang pagkaon, pag-inom, pagminyo, pagpamalit, ug pagpamaligya. Ang daotan kon kita malinga na pag-ayo niining mga butanga nga malimot kita sa pagkadinalian sa panahon. Busa pangutan-a ang imong kaugalingon, ‘Ikaingon ba nato nga gipanalanginan kita sa Diyos kon iya kitang hatagan ug mga butang nga makabalda sa atong kinabuhi?’ a Dili gayod. Makahatag lang hinuon kinig dakong kadaot kanato. Dili gayod kana himoon sa usa ka mahigugmaong Diyos!—1 Timoteo 6:17; 1 Juan 4:8.

Panahon sa Pagluwas ug Kinabuhi!

Niining makuyaw nga panahon, ang katawhan sa Diyos may dinaliang buluhaton nga pagahimoon. Si Jesus miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Gituman gayod kana sa mga Saksi ni Jehova. Busa ilang giawhag ang ilang mga isigkatawo sa pagkat-on bahin sa Gingharian ug sa mga kinahanglanon sa Diyos aron makabaton ug kinabuhing walay kataposan.—Juan 17:3.

Apan wala sa hunahuna sa Diyos nga ang iyang matinumanong mga alagad magkinabuhi nga samag ermitanyo. Hinunoa, buot niya nga sila magmakontento sa pangunang mga panginahanglan sa kinabuhi aron ilang mahatagan ug pagtagad ang pag-alagad kaniya. (Mateo 6:33) Sa baylo, iya gayod silang tagan-an sa ilang materyal nga mga panginahanglan. Ang Hebreohanon 13:5 nag-ingon: “Himoa ang inyong paagi sa pagkinabuhi nga mahigawas sa gugma sa salapi, samtang kamo magmakontento sa presenteng mga butang. Kay [ang Diyos] nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’”

Tumanon gayod sa Diyos kining maong saad sa dihang iyang luwason ang “usa ka dakong panon” sa matuod nga mga magsisimba inig-abot sa kataposan sa sistema sa mga butang ug pasudlon ngadto sa bag-ong malinawon ug madagayaon gayod nga kalibotan. (Pinadayag 7:9, 14) Si Jesus miingon: “Ako mianhi aron sila [iyang matinumanong mga sumusunod] makabaton ug kinabuhi ug makabaton niini nga dagaya.” (Juan 10:10) Ang ‘dagaya nga kinabuhi’ nagtumong, dili sa pagkaadunahan sa materyal karon, kondili sa walay kataposang kinabuhi diha sa Paraiso ilalom sa pagmando sa Gingharian sa Diyos.—Lucas 23:43.

Ayaw pagminantinil nianang doktrina nga padatoon ka sa Diyos kon motuman ka sa iyang kabubut-on, kay kini sa pagkatinuod makabalda lang kanimo sa pag-una sa kon unsa gayoy importante. Hinunoa, pamatia ang mahigugmaon apan dinaliang awhag ni Jesus: “Bantayi ang inyong kaugalingon nga ang inyong mga kasingkasing dili mabug-atan sa pagpalabig kaon ug sa pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat kaninyo ingon nga usa ka lit-ag.”—Lucas 21:34, 35.

[Footnote]

NAKAPAMALANDONG KA BA?

◼ Panahon na karon sa unsa?—Mateo 24:14.

◼ Gitandi ni Jesus ang atong panahon sa kang kinsang panahon diha sa Bibliya?—Mateo 24:37-39; Lucas 17:28-30.

◼ Unsay atong kinahanglang likayan kon gusto kitang makabaton ug kinabuhing walay kataposan?—Lucas 21:34.

[Blurb sa panid 13]

Ang doktrina nga padatoon ka sa Diyos kon motuman ka sa iyang kabubut-on, sa pagkatinuod makabalda lang kanimo sa pag-una sa kon unsa gayoy importante