Depresyon—Unsa Kini?

SI James a miingon: “Nakamata ako usa ka buntag niadtong 12 anyos pa ako nga naglingkod sa akong katre ug nangutana sa akong kaugalingon, ‘Karong adlawa kaha ako mamatay?’” Ang depresyon ni James grabe kaayo. Paglabay ug 30 ka tuig, si James miingon: “Tibuok kinabuhi akong nag-antos niining akong sakit sa emosyon ug sa hunahuna.” Sa batan-on pa si James, siya mibati nga wala siyay pulos nga tungod niana iyang gigisi ang iyang mga letrato niadtong bata pa siya. “Para nako dili ako takos hinumdoman pa,” siya miingon.

Sanglit kitang tanan mobati man usahay ug kaguol, kita makaingon nga nakasabot kita kon unsa kining depresyon. Apan unsay bation niadtong nag-antos nianang gitawag ug clinical depression?

Usa ka Makapaluyang Pagbati

Ang clinical depression dili kay ordinaryong kaguol lang, kondili kini maoy usa ka grabeng problema sa hunahuna nga kasagarang makabalda sa tawo sa iyang mga kalihokan matag adlaw.

Pananglitan, si Álvaro nag-antos sa “kahadlok, kalibog, kabalaka, ug grabeng kaguol” sulod sa kapin sa 40 ka tuig. Siya miingon: “Tungod sa akong depresyon maapektohan ko sa opinyon sa uban. Nagtuo ko nga akoy nakaingon kon may problemang motungha.” Iyang gihubit ang depresyon ingong “pag-antos ug grabeng kasakit nga wala mahibalo kon diing dapita ang sakit, kahadlok nga wala mahibalo kon ngano, ug mas grabe pa, kawalay ganang makig-estorya bahin niini.” Hinunoa, nahupayan siyag diyutay sa pagkahibalo kon unsay nakaingon sa iyang depresyon. Siya miingon, “Miarang-arang ang akong gibati dihang nahibaloan nako nga dili kay ako lang ang nag-antos niini.”

Sa Brazil, ang 49-anyos nga si Maria dili makatulog, may gibating kasakit, sapoton, ug “magul-anon kanunay” tungod sa depresyon. Sa gidayagnos ang iyang sakit, si Maria nahupayan nga dunay ngalan ang iyang sakit. “Apan mas nabalaka hinuon ko,” matod pa niya, “kay pipila lang ang nakasabot kon unsa ang depresyon ug kini makahatag pag kaulawan.”

Wala bay Angayng Ikaguol?

Bisan tuod ang depresyon usahay dunay hinungdan, kasagaran mokalit lang kinig tungha sa kinabuhi sa usa ka tawo. “Kalit ka lang maguol nga walay hinungdan,” miingon si Richard nga taga-Habagatang Aprika. “Wala kay paryente o higala nga namatay, ug walay makapaguol nga nahitabo kanimo. Apan naguol ka ug naluya. Ug walay makawala sa imong kaguol. Gusto ka nang mosurender, apan wala ka mahibalo kon ngano.”

Ang depresyon dili angay ikaulaw. Bisan pa niana, si Ana nga taga-Brazil naulaw nga nadayagnos nga dunay depresyon. “Gani, bisag walo na ka tuig ang milabay maulaw gihapon ko,” siya miingon. Naglisod siya ilabina sa pagsagubang sa iyang hilabihang kaguol. “Grabe usahay kaayo ang akong pag-antos,” siya miingon, “nga tungod niana nanakit ang akong lawas.” Usahay maglisod ako pagbangon. Ug dunay mga panahon nga dili makapugong si Ana sa paghilak. “Nautas kog hinilak,” matod pa  niya, “nga morag namanhod ang akong kalawasan.”

Ang Bibliya nag-ingon nga ang tawo mahimong mobatig grabeng depresyon. Pananglitan, nabalaka si apostol Pablo nga basin ang usa “dag-on sa hilabihang kaguol.” (2 Corinto 2:7, Ang Biblia Bag-ong Hubad Nga Binisaya) Ang ubang tawo nga nag-antos sa depresyon mawad-ag paglaom nga mangandoy sila nga mamatay na lang. Daghan ang mibati sama kang manalagnang Jonas: “Mas maayo pa nga ako mamatay kay sa ako mabuhi.”—Jonas 4:3.

Unsay mahimo niadtong nag-antos sa depresyon aron mamaayo ug makaantos niining makapaguol nga sakit?

[Footnote]

[Blurb sa panid 3]

“Kalit ka lang maguol nga walay hinungdan”