Mangadto Kita sa Merkado sa Africa

USA sa kinamaayohang paagi aron masinati nimo ang kultura, kostumbre, ug pagkaon sa usa ka nasod mao ang pag-adto sa merkado. Didto maobserbahan nimo ang mga tawo, matilawan ang ilang pagkaon, ug makapalit sa ilang mga baligya. Makahimamat ka usab ug mga namaligya nga maningkamot gayod sa pagpakig-estorya kanimo—bisag unsa pay imong pinulongan.

Lahi ra gayod ang mga merkado sa Africa. Dinhi magdugok ang mga tawo ug nagkalidadis ang mga produkto. Mabati nimo ang talagsaong kisaw ug kasadya sa mga tawo sa Africa. Tana, mangadto ta sa merkado sa Douala sa Cameroon.

Kon Unsaon Pag-adto sa Merkado sa Africa

Sa mga dagkong siyudad sa Africa, ang pagsakayg motorsiklo mao ang kinabaratohan ug kinadaliang paagi aron makaadto sa merkado. Bisag asa ka diha sa kadalanan, ang mga drayber sa motorsiklo manawag aron pasakyon ka. Kon dili ka hadlokan, mahimo kang moangkas. Sa Cameroon, kini ang labing praktikal nga transportasyon kay gawas nga barato na, paspas pa.

Kon dili ka kursonadang mosakayg motorsiklo, adunay daghang taksi. Sagad ang mga pasahero mag-uban ug sakay sa usa ka taksi ug dayon magtunga sila sa plete.

Daghan Kaayong Tindahan

Sa una nimong pag-adto sa merkado sa Africa, tingali mahingangha ka sa kadaghan sa tawo ug sa mga namaligya diha sa daplin sa karsada. Nagpanon ang mga tawo ug mga bata nga naglukdo ug basket nga punog mga baligya sama sa buhing manok, pinanitang kahil, tambal, ug uban pa.

Naglumbay ang mga lamesa nga napunog mga utanon sama sa repolyo, karots, pepino, talong, kalabasa, batong, kamote, kamatis, ube, ug lainlaing matang sa letsugas. Ang mga taga-laing nasod nga mosuroy dinhi tingali dili makaila sa ubang baligya nga sa Africa lamang makita. Ilabinang nindot kaayong tan-awon ang mga tindahan nga namaligyag pula ug dalag nga atsal nga mao pay pagpupo ug nagsinaw-sinaw sa dihang madan-agan sa adlaw. Daghan usab ang namaligyag abokado, saging, grapefruit, melon, pinya, kahil, ug lemon. Lami kaayo kining  tan-awon ug puwerteng baratoha! Daghan usab ug baligyang ube, balanghoy, ug bugas—nga mapalit kanunay—hasta sibuyas ug ahos nga gikan pa sa laing nasod.

Diha sa usa sa mga merkado sa Douala, daghan sa mga namaligya maoy gikan sa mga tribong Hausa ug Fula. Mailhan nimo sila sa ilang tag-as nga asul, puti, o dalag nga mga besti nga gitawag ug gandoura o boubou, ug sa ilang mahigalaong pagtimbaya sa pinulongang Fulfulde. Daw wala magdali ang mga tawo sa merkado. Gani si Ibrahim, ang tindero nga akong nahimamat, mitunol kanakog tulo ka dagkong sibuyas. Siya miingon: “Ingna ang imong asawa nga kuhaan niya kanag sulod, dayon palamanag halang nga kan-on, ug lutoon nga inanay.”

Sa unahan lag gamay, dunay baligyang mga karneng baka ug kanding nga bag-o pang ihaw. Makakita usab kag maskuladong mga lalaki nga nagpas-an sa giihaw nga mga hayop ug dayon ipatong nila kana sa mga lamesa. Ang mga matadero nga nagbaid-baid sa ilang tag-as nga mga sundang manawag nimo ug papilion ka kon unsang parte sa karne ang gusto nimong paliton. Makapalit sab kag buhing kanding, manok, ug baboy kon gusto kang ikaw ray moihaw.

Mangaon Ta sa Chophouse

Dili gyod mahimo nga walay kan-anan diha sa mga merkado sa Africa. Sa Cameroon, ang mga kan-anan gitawag nilag chophouse. Ang uban magpatokar ug kusog aron modugok ang mga kustomer, apan duna usay mga kan-anan nga dili banha ug makaorder ka ug mga pagkaon nga komon sa Africa ug makaestorya nimo ang ubang nangaon didto. Ang ilang baligyang potahe gisulat diha sa blackboard, ug makapangutana ka kon wala ka masuheto sa potahe.

Ang komon nga pagkaon mao ang kan-on ug fufu, nga linubok nga kamoteng kahoy, saging tindok, o ube. Makaorder sab ka ug sinugbang isda, karneng baka, ug manok nga gisagolag sarsa nga gama sa okra, ginaling nga mani, o kamatis. Relaks ra kaayo ang mga tawo sa chophouse mao nga daghan kag panahon nga makig-estorya.

Gisilbihan mi sa duha ka silbidora. Ang usa nagdalag dakong tray nga dunay mga plato nga punog nag-aso-asong kan-on, beans, ug fufu. Kini gisagolag sarsa sa okra, gibarbekyung karne, ug tinap-anang isda. Duna usay gamayng garapon nga gisudlag sarsa nga sili kon gusto kag halang. Ang laing silbidora nagdalag tualya ug plangganita nga may tubig aron makapanghunaw mi. Kinahanglan gyod kang manghunaw kay nabatasan nila nga magkinamot pagkaon. Ang mga tawo didto mag-ampo ayha mokaon ug inig-Amen nila, mo-Amen pod ang mga nagkaon sa pikas lamesa.

Pagsangyaw sa Maayong Balita Diha sa Merkado

Importante kaayo sa daghang komunidad ang mga merkado. Dili lamang kini baligyaanan ug palitanan ug mga produkto kondili makapaambit usab ka dinhi ug mga balita, makahimamat ug mga higala, ug makakita usab ka dinhig trabaho. Ang Bibliya nag-ingon nga si Jesus nagtudlo bahin sa Diyos ug nag-ayog mga masakiton diha sa mga merkado. Si apostol Pablo usab nagsangyaw ‘diha sa mga tiyanggihan.’ (Buhat 17:16, 17; Marcos 6:56) Maingon man usab karon, ang mga Saksi ni Jehova sa Cameroon nagsangyaw sa maayong balita sa Gingharian sa Diyos diha sa mga merkado.—Tinampo.

[Hulagway sa panid 24]

Nindot ug kolor nga mga sili